खुदँ दुम्ह मचाया विश्व कीर्तिमान

छम्ह मचा, व नं नकतिनि खुदँ दुम्ह । अज्याम्ह मचां याये फइगु हे छु दु धकाः ? गुकिं छगू रेकर्ड कायम जुइ । नयेगु, त्वनेगु, म्हितेगु, चाःहिलेगु थ्व उमेरय् अज्याःम्ह मचां छुं याये फइ धइगु मती सुनानं तःगु दइमखु । तर कुतः यात धाःसा सु मचा सु बुरा । छुं याये फइमखु धइगु हे दइमखु ।

खः छम्ह नकतिनि खुदँ जक दुम्ह मचां छगू अज्याःगु हे रेकर्ड कायम जुइगु ज्या याःगु दु । व नं विश्व रेकर्ड । उम्ह मचा खः रुसया इब्राहिम लियोनोभ । उमेरं नकतिनि खुदँय् क्यंम्ह इब्राहिमं मात्र २ घन्टाया दुने ३,२७० क्वः ‘पुसअप’ यानाः विश्व रेकर्ड हे कायम याःगु दु । लि जक मखु इब्राहिमं थःगु रकेर्डयात ‘रसियन बुक अफ रेकर्ड’य् तकं दुथ्याकेत सफल जूगु दु ।

संचारमाध्यमया रिपोर्टकथं इब्राहिमया उगु कीर्तिमानं लय्तायाः रुसया छगू स्थानीय क्लबं पुरस्कार स्वरुप वयात छखा छेँ हे बीगु घोषणा तकं याःगु दु । खतुं इब्राहिम व वया अबु निम्हं उगु क्लबया सदस्य नं खः । इब्राहिमं थःगु नां रसियन बुक अफ रेकर्डय् तयेत ला सफल जूगु हे जुल । तर थुकी हे व सन्तुष्ट धाःसा मदु ।

वयागु लक्ष्य धइगु ला ‘गिनिज बुक अफ वल्र्ड रेकर्डय् थःगु नां तयेगु खः । उकिया निंतिं वं न्हियान्हिथं हे पुसअप यायेगु यानाच्वंगु दु । इब्राहिकं पुसअप यानाच्वंगु भिडियो थ्व इलय् सामाजिक संजालय् तसकं भाइरल नं जुयाच्वंगु दु । थ्व स्वयां न्ह्यः थुगु रेकर्ड रुसया हे छम्ह न्यादँ दुम्ह मचाया नामय् दयाच्वंगु खः । उम्ह मचां मदिक्क ४,१०५ क्वः पुसअप यानाः रेकर्ड तःगु खः । अबलय् उम्ह मचायात रुसया राष्ट्रपति भ्लादिमिर पुटिनं मर्सिडिज कार उपहार बिउगु खः ।