संकिपाया मोहय् रुपेन्द्र
दच्छि न्ह्य युट्युबय् छपु नेवाः म्युजिक भिडियो अपलोड जुल— ‘मुसु मुसु न्हिलाः छं हायेकः वयेमते…..।’
थ्व म्युजिक भिडियो अपलोड जूगु म्होचा इलय् हे थुकिया ‘भ्युअर्स’ ल्याः छगू लाखं मल्याक थहां वन । नेवाः म्युजिक भिडियोय् म्होचा इलय् छगू लाख भ्युअर्स पार याःगु थ्व हे न्हापांगु म्युजिक भिडियो जुइमाः । कमेडि टाइपया थ्व म्युजिक भिडियोयात स्वःपिं सकसिनं धयाथें ययेकल, अले सकसिनं बांलाः धयागु हे कमेन्ट यात । छम्ह स्वकुमि उकेश वज्राचार्यं कमेन्टय् च्वःगु दु ‘New revolution in newari music’ ।
अथेहे kind heard नामं मेगु कमेन्ट वयाच्वंगु दु, ‘यक्व लिपा नेवाः म्येया ख्यलय् जिं फरक, तर तसकं न्ह्यइपुगु म्येँ स्वया वा न्यना धायेमाल । म्येँ हालादीम्ह व कलाकारपिंत यक्व यक्व सुभाय् ।’
थ्व म्युजिक भिडियोया निर्देशक रुपेन्द्र श्रेष्ठ ‘थक्वाःमि’ खः । रुपेन्द्र थुकिया निर्देशक जक मखु, म्येँ च्वमि, म्येँ हालाःमि, संगीतकार, मू कलाकार नं खः । थुलि जक मखु रुपेन्द्रया थ्व म्युजिक भिडियोलिसे गज्जबया संयोग नं दु, व छु धाःसा रुपेन्द्रं संगीत तयादीगु, हालादीगु, च्वयादीगु, निर्देशन यानादी थ्व हे न्हापांगु रेकर्ड जूगु म्येँ खः ।
नेपालभाषा संकिपा ख्यलय् रुपेन्द्र सकसिनं म्हसिउगु हे नां खः । झिगुलिं मल्याक नेवाः संकिपाय् वय्कलं म्हितादीधुंकूगु दु । तर वय्कःयात थ्व म्यूजिक भिडियों निर्देशक, गायक, संगीतकःमि फुक्ककथंया म्हसीका बियाबिउगु दु ।
न्हापा वय्कलं थ्व म्येँयात हल्का फास्ट रोमान्टिक म्येँ दयेकादीगु जुयाच्वन । थम्हं दयेकागु म्येँ म्यूजिक अरेन्जर पासा अन्जन श्रेष्ठयात न्यंकूबलय् अन्जनं थ्व म्येँयात कमेडीइ यंकूसा बांलाइ धयागु सुझाव बिल । ‘जितः नं कमेडीइ हे इच्छा जुयाच्वंगु, पासाया सुझाव नालाकया’ रुपेन्द्रं धयादिल, ‘धाथें थ्व म्येँ तसकं न्ह्यइपुगु जुल । थ्व म्युजिक भिडियो दयेकाबलय् सल्हा सुझाव बियादीपिं सुरेन्द्र मानन्धर, राजीव शाहीपिंत जिगु यक्व यक्व सुभाय् दु ।’
रुपेन्द्र थौंकन्हय् तसकं चर्चाय् वयाच्वंगु ‘च्वापुफय्’, ‘लाखेभाजु’ थेंज्याःगु फिल्म व्यस्त जुयाच्वंगु दु । ‘लाखेभाजु’इ छगू लुमंकेबह जुइगु भूमिकाय् म्हिताच्वनागु दु’ वय्कलं धयादी, ‘न्हापा अप्वः थें हास्य भूमिकाय् जक म्हिताच्वनागु, थुकी भावुक टाइपया भूमिका दु ।’
थुकिया लिसें वय्कः थौंकन्हय् टेलिभिजनय् वयाच्वंगु ‘ड्याड, सन एण्ड मम’ व ‘समय्बजि’, ‘ख्वताबजि’इ निरन्तर खने दयाच्वंगु दु ।
आर्यम नकःमिया ‘सुभाय्’ संकिपापाखें नेवाः संकिपा ख्यलय् दुहां वंम्ह रुपेन्द्र ‘थः कतः, कतः थः’, ‘गज्याःगज्याःपिं मनूत दइ’, ‘तिमिला’, ‘चन्द्रमान’, ‘ब्याहा याये म्हाः’, ‘एक से एक’, ‘पागलपन’, ‘तीनतिकः महाःबिकः’, ‘बांलाः मय्जु’, ‘धौबजि’ (ख्यालः पार्ट १–२) थेंज्याःगु संकिपा म्हितादीधुंकूगु दु ।
झिंप्यदँ–झिंन्यादँया नच्चागु वैंशया इलं निसें कला क्षेत्रय् सक्रियम्ह खः – रुपेन्द्र । नैकापय् च्वनादीम्ह ३८ दँया रुपेन्द्रं धयादी, ‘थौं स्वयां नीदँ–नीनिदँति न्ह्यः हे थक्वाः, सतुंगः, बोसीगां आदि थासय् थीथी नखःचखःबलय् जुइगु सांस्कृतिक ज्याझ्वलय् म्येँ हालेगु, ख्यालः क्यंवनेगु यायेगु । उबलय् सकस्यां बांलाः बांलाः धाइगुलिं थुखेपाखे पलाः न्ह्याकेत झन् हःपाः दत ।’ थ्व झ्वलय् वय्कलं आर.आर. क्याम्पसया सुकुन्दा साहित्य पालाःपाखें निगू नाटक नं म्हितादीधुंकूगु दु ।
कला ख्यलय् वयेगु इच्छा धाःसा वय्कःयात नेपाल टेलिभिजनं वइगु ‘ट्वाक्क टुक्क’ ज्याझ्वलं ब्वलंकाबिउगु जुयाच्वन । ‘ट्वाक्क टुक्क’ स्वयाः वय्कःयात नं टिभीइ ख्वाः क्यनेगु इच्छा जुल । इच्छाया लिसें संघर्ष नं सुरु जुल । अले वय्कःया ज्या हे जुल, न्हिं न्हिं पत्रिका स्वयेगु, ‘कलाकार माल’ धकाः वःगु विज्ञापन कटिङ यायेगु, अले फोन यायेगु ।
‘जि सुनां नं घ्वानाः अथवा सालाः संकिपा ख्यलय् थ्यंम्ह मखु, सुं गडफाडर नं मदु । जि ला संघर्ष यानाः हे थनतक थ्यंम्ह खः’ वय्कलं धयादिल ।
संघर्षया झ्वलय् वय्कलं २५ तका निसें १५०० तका तक ध्यबा पुलाः कलाकार जुइगु निंतिं फारम भरे यानाः अन्तर्वार्ता बिउझाल । पत्रिकाय् विज्ञापन बिइपिं अप्वः थें झंगः लाइपिं नं लानाच्वन । ध्यबा कयाः फारम जायेकेबीगु, अले अन्तर्वार्ता कयाः फिलिमसिलिम मदयेकुसे कुँइच जुइक बिसिउँ वनीगु ।
संघर्षया झ्वलय् टेलिफिल्म, भिडियो फिल्मपाखे वय्कःया सुरुवात धाःसा खस नेपाली भासं जुल । ‘अनुराग’, ‘गहना’, ‘पुरुष’, ‘तितो सत्य’, ‘हिजो आजका कुरा’, ‘डर’ थेंज्याःगु टेलिसिरियल, ‘अन्यौल यात्रा’ थेंज्याःगु भिडियो फिल्म म्हितादिल । थ्व झ्वलय् राष्ट्रिय नाचघरय् वीरेन्द्र हमाल, हरिहर शर्मा, प्रभाकर शर्मा निसें सर्वनाम थियटरय् अशेष मल्लपाखें अभिनय, नृत्य तालिम नं कयादिल ।
तर वय्कःया संघर्ष खस नेपाली भाषाय् धाःसा ताःलायेमफुत । ‘छगू ला नेपाली संकिपाख्यलय् थम्हं म्हसिउपिं सुं मदु, मेगु ‘नेवाः टोन’या कारणं नं समस्या जुल । ध्यबा तःसा मू भूमिका बी धाःपिं ला वःगु खः, तर जिं अथे यानाः फिल्म मम्हिता’ वय्कलं थःगु असफलताया कारण कनादी ।
थ्वया हे दथुइ नेवाः संकिपा ‘सुभाय्’या निंतिं कलाकार माल धकाः विज्ञापन वल । थुकिया निंतिं नं वय्कलं अन्तर्वार्ता बियादिल । थ्व संकिपा निसें रुपेन्द्रया नेवाः संकिपाख्यःया यात्रा नं सुरु जुल ।
नेवाः संकिपाख्यःया यात्रा निसें वय्कःयात थ्व ख्यलय् मोह जुयावन । मोह नं थुलितक जुल कि वय्कलं थः चिधिकःम्ह म्ह्याय्या नां हे ‘संकिपा’ धकाः तयादिल ।
निदँ दुम्ह संकिपा लिसें गुदँ दुम्ह मेम्ह छम्ह म्ह्याय् सिम्रिक नं दु वय्कःया । वय्कःया जहान सरिना वज्राचार्य नं नेवाःख्यलय् लगे जुयाच्वनादीम्ह खः । थौंकन्हय् सरिना नेपालभाषा एकेदेमिया नेवाः एफएमय् कार्यक्रम संचालक खः । अथेहे वय्कः ‘पागलपन’ फिल्मया धकिंबाखं च्वमि नं जुयाच्वन ।
रुपेन्द्रयात ताः आःतकया संघर्षं अझ नं फल धाःसा चूलाःगु मदुनि । वय्कःया हे कथं अझं यायेगु यक्वं दनि । तिनतिकः महाःबिकः फिल्म पाखें बेस्ट एक्टरया पेजथ्री अवार्ड त्याकादीम्ह वय्कलं धयादी, ‘सन्तुष्टिं प्रगति जुइमखु । यक्व सुधार यायेमाःगु दनि ।’
नेवाः संकिपा ख्यलं नं यक्व याये ल्यंदनिगु वय्कःया बिचाः दु । ‘नेवाः संकिपाःख्यः पृथक रुपं न्ह्याःवनेफुगु मदुनि । नेवाः फिल्म मस्वइपिंत स्वःवइगु वातावरण दयेकेमफुनि’ वय्कःया बिचाः दु ।
वय्कःया बिचारय् थुकिया छगू कारण अध्ययन मगाक्क संकिपा दयेकाच्वंगु नं खः । वय्कःया सुझाव दु ‘संकिपा दयेकीपिं, म्हितीपिं अप्वः थें लहडय् हे वःगु खना, भचा तालिम कयाः वःगु खःसा अझ बांलाइगु खः ला ?’
‘अथे धकाः सकलें लहडं जक वःपिं नं मखु’ वय्कलं धयादी, ‘नेवाः संकिपाख्यः नं बुलुहुं व्यावसायिकरण जुयावःगु दु । न्हापा ध्यबा तःम्ह हिरो जुइगु खः, आः कलाकारयात ध्यबा बियाः म्हितकेगु सुरु जुयावःगु दु । थ्व बांलाःगु लक्षण खः । अथेहे सःसिउपिं, प्रविधि बांलाक थुपिं लगे जुयावःगु दु । थुकथं हे न्ह्याःवन धाःसा लिपा बांलाना वनी ।’
नेवाः संकिपाख्यः नं व्यावसायिक जुयावःसां थुकिं हे जक म्वायेफइग वय्कलं नं खंकामदी । अथे जुयाः वय्कलं थःगु बिस्कं हे लजगाः नं ज्वना वयाच्वनादीगु दु । छगू ला वय्कःया ट्रान्सपोर्टया व्यवसाय दु, अले याकनं हे तौदहय् छगू रिसोर्ट नं चायेकादीत्यंगु दु ।
LEAVE YOUR COMMENTS