विराटया चि साहित्य मुँज्या

ख्वप(नेपालभाषा टाइम्स)- विराट नेपालभाषा साहित्य सम्मेलन (विराट) गुथिया ग्वसालय् वंगु शनिवाः थःगु हे भवनय् नेपालभाषा साहित्य चि साहित्य मुँज्या जुल । नेपालभाषाया साहित्य ह्यमिपिंत न्हूगु भवनया जानकारी बीगु ल्याखं नासलय् च्वंगु निर्माणाधीन भवनय् उगु ज्याझ्वः याःगु खः ।

विराट गुथिया नायः महेन्द्रगोपाल कर्माचार्यया सभापतित्वय् जूगु ज्याझ्वलय् विराटया संरक्षक साहित्यकार डा. योगेन्द्र प्रधान मूपाहांकथं झायादीगु खः ।

ज्याझ्वलय् त्रिरत्न शाक्य, पशुपतिमान पःमां, तेजकृष्ण श्रेष्ठ, श्याम आशा, वसन्त नकःमि, नरेशमान महर्जन, धनमान श्रेष्ठ, बाबुकाजी सुवाल, विकेश निराशी, रीता महर्जन, किरणकेन रंजितं थःथःगु साहित्यिक रचना पाठ यानादीगु खः ।

उगु चि साहित्य मुँज्याय् विराटया पुलांम्ह नायः नरेन्द्रभक्त हाडा, नेपाल साहित्य मन्दिरया पुलांम्ह संरक्षकलिसें साहित्यकार तिलकप्रकाश कायस्थ, विराटया हे मेम्ह पुलांम्ह नायःलिसें साहित्यकार गोविन्दमान श्रेष्ठलिसें मेपिंसं नं थःथःगु नुगःखँ तयादीगु खः ।

विराटया निर्माणाधीन भवनया निंतिं साहित्यकारलिसें साहित्य अनुरागीपिंसं आर्थिक ग्वाहालि नं यानादीगु खःसा उगु इलय् लखौं तका दांया आर्थिक ग्वाहालि चूलाःगु खः ।