आयोगया सिफारिस १३ प्रतिशत जक कार्यान्वयन
येँ (नेपालभाषा टाइम्स) – राष्ट्रिय मानवअधिकार आयोगं मानवअधिकारया विषययात कयाः सरकारयात याःगु सिफारिस कार्यान्वयनया अवस्था सन्तोषजनक मजूगु खँ धाःगु दु । प्रतिनिधिसभाया कानुन, न्याय तथा मानवअधिकार समितिया म्हिगः च्वंगु बैठकय् न्ववायेगु झ्वलय् आयोगया अध्यक्ष तपबहादुर मगरं उगु खँ धयादीगु खः । वय्कलं आयोगं सरकारयात याःगु सिफारिस मध्ये १३ प्रतिशत जक पूर्ण रुपय् कार्यान्वयन जूगु खँ धयादीगु दु । वय्कःया कथं आयोगं सिफारिस याःगु मध्ये ३४ प्रतिशत आंशिक रुपय् जक कार्यान्वयन जूगु दुसा ५२ प्रतिशत स्वयां अप्वः सिफारिस अझ नं कार्यान्वयन जुइ फयाच्वंगु मदु ।
अध्यक्ष मगरं आः तक १४ हजार स्वयां अप्वः उजुरी दर्ता जूगु व १० हजार ६ सय उजुरी फस्र्यौट जुइधुंकूगु जानकारी नं बियादीगु दु । उकथं हे वय्कलं २ हजार १ सय उजुरी अनुसन्धानया झ्वलय् दुगु खँ नं कनादीगु दु । वय्कलं द्वन्द्वकालीन मुद्दाय् पीडिततय्त क्षतिपूर्ति बीगु व दोषीयात कारबाही यायेत यानागु सिफारिस कार्यान्वयन जुइगु लिबानाच्वंगु खँ नं धयादीगु दु ।
वय्कलं धयादिल, ‘आयोगं आः तक १ हजार ६२० सिफारिस सरकारयात यानागु दुसा ८ हजार २६० उजुरी तामेलीइ तयातइगु दु । तर जिमिसं यानागु अप्वः धयाथें सिफारिस कार्यान्वयन जूगु अवस्था मदु । कार्यान्वयनया अवस्था स्वयेगु खःसा आयोगया सिफारिस मध्ये १३ प्रतिशत सिफारिस जक पूर्ण रुपय् कार्यान्वयन जूगु अवस्था दु ।’ वय्कलं आयोगं सिफारिस याःगुयात कार्यान्वयनया निंतिं पटकपटक धायेगु ज्या जुयाच्वंसां नं उकियात कार्यान्वयन यायेगु ज्या सरकारपाखे मजुयाच्वंगु खँ नं धयादीगु दु ।
अध्यक्ष मगरं आयोगया नियुक्ति प्रक्रिया बारे तकं अन्तर्राष्ट्रिय चिउताःया विषय जुयाच्वंगु धासें उकियात पारदर्शी दयेकेमाःगु खँय् बः बियादिल । वय्कलं स्वास्थ्य, शिक्षा व खाद्य अधिकारया क्षेत्रय् तकं व्यापक सुधार यायेमाःगु खँ नं धयादीगु दु ।
उकथं हे अध्यक्ष मगरं आयोगं आन्तरिक रुपय् तयार याःगु अनुसन्धान वा अनुगमन प्रतिवेदन सार्वजनिक मयायेगु नीति दुगु खँ नं धयादीगु दु । अध्यक्ष मगरं पीडितया उजुरी, साक्षीया बयान, अनुसन्धानया गोप्य खँ व संवेदनशील दस्तावेज दुथ्याइगु जूगुलिं आयोगं तप्यंक सार्वजनिक याये मजिउगु खँ धयादीगु खः । वय्कलं प्रतिवेदनया आधारय् आयोगं याइगु लिपांगु निर्णय व सिफारिस जक सार्वजनिक जुइगु खँ नं धयादीगु दु ।
LEAVE YOUR COMMENTS