शतक हिदाता कर्माचार्यपाखें १८७ क्वःगु हिदान
येँ (नेपालभाषा टाइम्स) – नेपालय् दकलय् अप्वः हिदान यानादीम्ह शतक हिदाता प्रेमसागर कर्माचार्यं १८७ क्वःखुसी हिदान यानादीगु दु । नेपाल स्वयंसेवी रक्तदाता समाजया केन्द्रीय नायःलिसें नेपाल रेडक्रस सोसाइटीया केन्द्रीय कोषाध्यक्ष कर्माचार्यं कर्णाली प्रदेशया विकट हिमाली जिल्ला मुगुया गमगढीइ हिदान यानादीगु खः ।
कर्माचार्यं थीथी जिल्लाया स्वलाय् छक्वः वनाः हिदान याना वयाच्वनादीगु दु । वय्कलं थुकथं जिल्ला जिल्लाय् वनाः हिदान यायेगु धइगु अनच्वंपिं ल्याय्म्हतय्त मानवीय जीवन बचे यायेत हिदान यायेमाः धइगु सचेतना ब्वलंकेगु निंतिं खः धयादिल ।
विशेष यानाः पहाडी जिल्लाय् हि उपलब्ध याकेत तसकं थाकूगुलिं १८ दँ उमेर थ्यंपिं व ४५ किलो तौल दुपिं सकल ल्याय्म्हतय्त थःगु जन्मन्हिया लिसें हिदान यायेत नं वय्कलं इनाप यानादिल ।
स्थानीय स्वयमसेवी हिदाता बलिबहादुर बुढां दकलय् अप्वः हिदान यानादीम्ह शतक हिदातायात थःगु जिल्लाय् हिदानया निंतिं ब्वनादीगु वय्कलं जानकारी बियादिल ।
कर्माचार्यं थ्व स्वयां न्ह्यः प्रदेशया हे सुर्खेत, जुम्ला, जाजरकोट लगायत देय्या मेमेगु दुर्गम जिल्लाय् वनाः ल्याय्म्हतय्त हिदान यायेत अभिप्रेरित यायेगु ल्याखं हिदान यानादीधुंकूगु दु ।
LEAVE YOUR COMMENTS