पीपीजीयुकेया दुजःपिनि दथुइ अनलाइन सहलह मुँज्या

येँ (नेपालभाषा टाइम्स) – पासा पुचः गुथि, युके लन्दनया ग्वसालय् छगू अनलाइन सहलह मुँज्या जुल । ‘गुथि दुजःया खँल्हाबल्हा’ ज्याझ्वःया नामं जूम अनलाइनपाखें उगु सहलह मुँज्या जूगु खः ।

सहलह मुँज्याया मुख्य उद्देश्य अनौपचारिक रुपं अन्तरक्रिया या यायेगु खःसां नं गुथिया दुजःपिनि दथुइ कोरोना संक्रमणया महामारीया इलय् थःथःगु अनुभव कालबिल यायेगु ज्या जूगु खः । मुक्कं नीम्ह दुजःपिनि दथुइ जूगु सहलह मुँज्याया झ्वलय् वइगु दिनय् गुथिं यायेमाःगु ज्याझ्वः व भावी रणनीतिया विषययात कयाः सहलह जूगु गुथिं जानकारी बिउगु दु ।

पीपीजी युके लन्दनया वर्तमान कार्यसमितिया दुजःपिंसहितया मुँज्याया इलय् लकडाउनया कारणं न्हियान्हिथंया जीवनय्ला नाच्वंगु प्रभा व्यावसायिक व निजी जीवनय् लानाच्वंगु असरयात कयाः सहलह जूगु खः । भौतिक रुपं सक्रिय जुइगु, मानसिक स्वास्थ्ययात कयाः सचेत जुयमाःगु व चुलिंचू च्वनाः नाप लायेगु वातावरण तसकं चुनौतिपूर्ण जुया वनाच्वंगु खँय् नं गुथिया दुजःपिंसं चिउताः प्वंकूगु दु ।

उगु इलय् मनोचिकित्सक डा. निक्की शाक्यं छेँजः व पासापिं अनलाइनपाखें सम्पर्कय् च्वनाच्वनेत इनाप यासें महामारीया इलय् स्वसचेतना अभिवृद्धि यायेगु नापं आत्मबल बल्लाकेमाःगु अतिकं महत्वपूर्ण जूगु खँ धयादीगु खः । कोभिड-१९या कारणं झीगु मानसिक स्वास्थ्यय् प्रभाव लाकाच्वंगुलिं थः हे सचेत जुइमाःगु व पासापि दथुइ नं खुल्ला रुपं खँल्हाबल्हा ब्याका च्वनेमाः धयादिसें गुथिया दुजःपिंसं नं नियमित रुपं ब्यायाम
यायेगु व स्वस्थ नसाज्वलं जक नयेगुपाखे ध्यान बीत नं इनाप यानादिल ।

गुथिया दुजःपिंसं लकडाउन शुरु जूगु इलंनिसें हे छगूकथंया ग्याःचिकु दयाच्वंगु खःसां आः बुलुहुं सकसितं सामान्य जुइधुंकूगु धयादिल । संक्रमणपाखें बचे जुइत सामाजिक दूरी कायम यायेगु, सरकारं बिउगु निर्देशनत पालना यायेमाःगु खँय् नं बः बिउगु दु। गुथिया नायः मय्जु रुक्मणी मानन्धरं वइगु दिनय् यायेगु ज्याझ्वःया बारे जानकारी बियादीगु खःसा मूछ्याञ्जे मय्जु प्रणिशा शाक्य, कासा सचिव सुमित वज्राचार्यं लगायतं नुगःखँ लिसें वइगु दिनय् अनलाइनपाखें कासा संचालन यायेगु योजना दुगु जानकारी बियादीगु खः ।

सम्बन्धित बुखँ

LEAVE YOUR COMMENTS