बहनी छगू पेग कयादिसँ !

सछिदँ दुम्ह सत्यमोहन जोशीया सुझाव

यल- थःगु सछिदँ बुन्हिया लसताय् यल महानगर–पालिकापाखें याःगु हनाज्याझ्वलय् न्ववासें वाङ्मय शताब्दीपुरुष सत्यमोहन जोशीं ताःहाकः जीवन म्वायेगु खःसा नसात्वँसाय् ध्यान बीमाः धासें छगू सुझाव नं बियादिसँ, ‘…तर बहनी छगू पेग चाहिँ कयादिसँ !’

वय्कलं अथे धयादीबलय् ज्याझ्वलय् वयाच्वंपिं सकलें न्हिलाहःगु खः । संसारय् चुरोस मत्वंपिं यक्व दु तर अय्लाः मत्वंपिं सुं मखना धासें वय्कलं यदि मात्रा मिले यानाः त्वन धाःसा अय्लाः नं वासः जुइगु खँ कनादिल । तर यक्व त्वन धाःसा थ्व विष जुइगु ख्याच्वः नं वय्कलं बियादिल । अय्नं वय्कलं थःगु दीर्घजीवनया रहस्य कनादिल, ‘जिं निदँ स्वदँया उमेरय् तकं मांया दुरु त्वनाच्वनागु जुयाच्वन, उकिं जि थथे स्वस्थ जुइखंगु खः ।
दीर्घजीवी जुइगु खःसा चिन्ता यायेगु त्वःताः चिन्तन यायेत नं वय्कलं सुझाव बियादिल । थःत याःगु थपाय्जि सम्मानया लागिं सुभाय् बिसें वय्कलं धयादिल, ‘थ्व सम्मान काये खनाः जितः मेगु दछि निदँ अझ म्वाये दःसा जिउ थें च्वंच्वन ।’

थौंकन्हय् देशय् न्ह्यानाच्वंगु समृद्धिया नारा बारे खँ तसें ततःखागु छेँ दनेवं जक विकास जुइगु मखु, देय्या कला संस्कृति व सम्पदाया संरक्षण याये फुसा जक देश समृद्ध जुइगु बिचाः नं तयादिल ।

मूपाहां कथं झाःम्ह कावा प्रधानमन्त्री ईश्वर पोखरेलं सत्यमोहन जोशी थः हे छगू सम्पदा खः धासें वय्कलं चीनय् वनाः कलाकार अरनिको बारे यानादीगु अनुसन्धानयात नेपाल सरकारं सम्मान याना धयादिल । लिसें यल मनपां वय्कःया सम्मानय् दछियंकं यायेत्यंगु ज्याझ्वःयात नेपाल सरकारया समर्थन दइगु बचं नं बियादिल ।

ज्याझ्वःया सभापति लिसें ग्वसाः खलः यल मनपाया मेयर चिरिबाबु महर्जनं शताब्दीपुरुष जोशीया सछिदँ बुन्हिया लसताय् म्हिगः शुरु जूगु ज्याझ्वः दछि तक न्ह्यानाः वय्कःया १०१ दँ बुन्हि कुन्हु समापन जुइगु जानकारी बियादिल ।

ज्याझ्वलय् येँ मनपाया मेयर विद्यासुन्दर शाक्य, समारोहया कजि श्रीगोपाल महर्जनपिंसं नं न्ववानादीगु खः । भाजु जोशीयात भारतीय राजदूत मंजित सिंह लिसें नगरपालिका फोरमं नं सम्मान याःगु खः । उगु हे ज्याझ्वलय् यलय् च्वंपिं मेपिं सछिदँ पुलेधुंकूपिंत नं हनेगु ज्या जूगु खः ।
ज्याझ्वः न्ह्यः वय्कःयात बग्गीइ तयाः देय् चाःहीकूगु खःसा सुथय् वय्कःया छेँय् पुजाया ज्या जूगु खः । अन राष्ट्रपति विद्या भण्डारीं छ्वया हःगु पौ नं ब्वनाः न्यंकूगु खः ।

सम्बन्धित बुखँ

LEAVE YOUR COMMENTS