न्हूदँ समारोह समितिया क्यालेण्डर

येँ (नेपालभाषा टाइम्स) – नेपाल संवत् राष्ट्रिय न्हूदँ समारोह समिति-११४१ पाखें थुगुसी नं न्हूदँया लसताय् तिथिपौ पिथनीगु जूगु दु । समितिं दँय्दसं थें थुगुसी नं नगुमा अर्थात क्यालेण्डर पिथनेत्यंगु खः । न्हूदँया लसताय् भिंतुना र्‍याली लिपा बसन्तपुलिइ जुइगु भिंतुना सार्वजनिक सभाय्मू पाहांकथं झायादीम्ह प्रधानमन्त्रीपाखें पितब्वज्या यायेगु याना वयाच्वंगु खः ।

समितिया निंतिं तिथिपौ पिथनेगु तयारी जुइधुंकूगु तिथिपौ प्रकाशन उपसमितिया कजि देवदास मानन्धरं कनादीगु दु । थुगुसी पिथनेत्यंगु तिथिपतिइ तिथिमितिया धलःनापं नेपाल संवत् तिथिपौया महत्व नं थुइकेकथं विशेष जुइगु समितिं धाःगु दु । नेपाल संवत्या महत्वयात सकल नेपाःमिपिंसं थुइके फयेमा धइगु ल्याखं नेपालभाषा, खस व अंग्रेजी स्वंगू भासं सामाजिक संजालपाखें प्रचार प्रसार नं यायेगु ग्वसाः दुगु समितिं जानकारी बिउगु दु ।