उत्कृष्ट लिच्वः हःपिं ब्वँमि, स्यनामि व ब्वनेकुथियात सम्मान
येँ (नेपालभाषा टाइम्स) – येँ महानगरपालिकां शिक्षा ख्यलय् उत्कृष्ट लिच्वः हयेत ताःलाःपिं ब्वनामि, स्यनामि व ब्वनेकुुथियात नगदसहित सम्मान याःगु दु । महानगरपालिकाया शिक्षा विभागं शैक्षिक सत्र ०८२ लय् प्राप्त याःगु उत्कृष्ट लिच्वःया लिधंसाय् सामुदायिक ब्वनेकथिया ब्वनामि, लिच्वः हयेगु निंतिं भूमिका म्हितूपिं स्यनामि व ब्वनेकुथियात नगदसहित बिस्कं बिस्कं सम्मान याःगु खः ।
थनया राष्ट्रिय सभागृहय् वंगु शुक्रवाः जूगु ज्याझ्वलय् ०८२ सालया माध्यमिक शिक्षा परीक्षा (एसइइ परीषा)य् सामुदायिक ब्वनेकुथिपाखें ४ जीपीए हायेत ताःलाःपिं नीगुम्ह ब्वनामिपिंत म्हतिं नीन्याद्वः तका दांलिसें सम्मान याःगु खः । ०८२या एसइइ परीक्षाय् ज्ञानोदय माध्यमिक विद्यालयपाखें २१ म्ह, विश्वनिकेतन उच्च माध्यमिक विद्यालयपाखें ३ म्ह, रत्नराज्या मा.वि व तरुण माध्यमिक विद्यालयपाखें निम्ह निम्ह, शिवपुरी माध्यमिक विद्यालयपाखें छम्ह ब्वनामिं ४ जीपीए हःगु खः ।
थुकथं हे थुगुसीया एसइइ परीक्षाय् शतप्रतिशत विद्यार्थी उत्तीर्ण (ग्रेडेड) जूगु बालसेवा माध्यमिक विद्यालय (न्हूसाः), बाल व्यवसायी केन्द्र माध्यमिक विद्यालय (सिफः), श्रम राष्ट्रिय माध्यमिक विद्याय (कुमारिगाल) व केन्द्रीय बहिरा माध्यमिक विद्यालय (नंसाः)यात नं नीन्याद्वः तका दांसहित पुरस्कृत याःगु खः ।
थुकियालिसें एसइइइ उत्कृष्ट लिच्वः हयेत ताःलाःगु विषयगत स्यनामियात नं सम्मान याःगु खः । थुकी अनिवार्य विषयय् न्याम्ह व एच्छिक विषयया प्यम्ह यानाः गुम्ह स्यनामिपिंत नं म्हतिं नीन्याद्वः तका दांलिसें पुरस्कृत याःगु खः ।
थुकथं हे थुगु दँया एसइइइ दकलय् अप्वः औसत स्तरीकृत अंक प्राप्त याःगु स्वंगू सामुदायिक व स्वंगू संस्थागत (निजी) ब्वनेकुथियात नं सम्मान याःगु खः । सामुदायिकपाखे ज्ञानोदय मावि (३.२९ अंक)यात छगू लख, विश्व निकेतन उमावि (३.२८)यात न्यय्न्याद्वः व तरुण मावि (३.२३)यात न्यय्द्वः दांसहित पुरस्कृत याःगु खः । थुखे संस्थागतपाखे औसत स्तरीकृत ३.९ अंक प्राप्त याःगु विजकिड एकदेमि, ३.७८ अंक प्राप्त याःगु विजेश्वरी ज्ञान मन्दिर सैनिक महाविद्यालय व ३.७६ अंक प्राप्त याःगु मेरिडियन इन्टरनेशनल स्कुलयात नं सम्मानपत्रसहित पुरस्कृत याःगु खः ।
उगु हे ज्याझ्वलय् आर्थिक दँ ०८२/८३ लय् अनिवार्य अवकाश कायेत्यंपिं ५० स्यनामिपिंत नं हनेज्या याःगु खः । वय्कःपिंत येँ महानगरपालिकाया कार्यवाहक प्रमुख सुनिता डंगोल, शिक्षा व स्वास्थ्य समितिया संयोजकलिसें २२ वडाअध्यक्ष चिनिकाजी महर्जन व प्रमुख प्रशासकीय अधिकृत सरोज गुरागाइँ लगायतं सम्मान व पुरस्कृत यानादीगु खः ।
LEAVE YOUR COMMENTS