फास्ट ट्य्राकया फर्सिडोलय् ज्या न्ह्याकेगु तयारी

येँ (नेपालभाषा टाइम्स) – येँ–तराई–मधेश फास्ट ट्राय्कया प्रस्थान विन्दु ख्वनाया ३.३ किलोमिटर विवादयात थाति तयाः फर्सिडोल–डुकुछाप पाखेया ज्या न्ह्याकेगु तयारी न्ह्याःगु दु । उगु खण्डया ३.२ किलोमिटर सुरुङय विस्तृत परियोजना प्रतिवेदन (डीपीआर) संशोधन यानाः निपु तां दयेकेगु तयारी जुयाच्वंगु खँ धाःगु दु । ताः इलंनिसें खोनाया खण्डय् ज्या न्ह्याके मफयेवं फर्सिडोलपाखेया ज्या न्ह्याकेत्यंगु खः ।

उगु क्षेत्रय् ज्या न्ह्याकेगु निंतिं रक्षा मन्त्रालयं डीपीआर दयेकाः प्रधानमन्त्री तथा मन्त्रिपरिषदया ज्याकुथिइ छ्वयाः निर्णय याकेगु तयारी जुयाच्वंगु दु । ताः इलंनिसें ख्वनाय् थ्व लँयात कयाः विवाद जुयाच्वंगु खःसा तत्कालीन प्रधानमन्त्री सुशीला कार्कीं वैकल्पिक योजना दयेकाः ज्या न्ह्याकेत निर्देशन बियादीगु खः । उगु हे निर्देशन कथं न्हूगु डीपीआर तयार यायेगु ज्या जूगु खँ आयोजनां धाःगु दु ।

नेपाली सेनां दयेकेगु जिम्मा काःगु च्यादँ दयेधुंकाः नं ख्वनाया विवाद ज्यंके फयाच्वंगु मदु । स्थानीय वासिन्दां ख्वनाय् प्रस्थान विन्दू तलधाःसा सांस्कृतिक सम्पदा म्हासे जुइधासें विरोध याना वयाच्वंगु खः ।

नेपाली सेनाया कथं प्रधानमन्त्री तथा मन्त्रिपरिषदय् छ्वःगु डीपीआर स्वीकृत जुइवं ठेक्का प्रक्रिया न्ह्याकेगु कथं तयारी जुयाच्वंगु दु । खोनाया समस्या मज्यंतले मेमेगु क्षेत्रय् कुचा थलाः जूसां ठेक्का बीगु ज्या न्ह्याकेत्यंगु खः ।