स्वन्ति नखःया विवादया सवाल

थौंकन्हय् नेवाःतय्गु छेँय् छेँय् अले त्वाः त्वालय् तकं बहसया विषय जुयाच्वंगु दु स्वन्ति नखःया झ्वलय् लक्ष्मी पुजा, म्ह पुजा व किजा पुजा गबले हनेगु धइगु सवालय् । नेवाः भाय्या संचार माध्यमय् नं तसकं बहस जुयाच्वंगु दु । थःथःगु कथंया तर्क तयेगु यानाच्वंगु दु । संघ संस्थानिसें नेवाः न्ह्यलुवातय्सं नापं सरोकारवालापिन्सं तकं थःथःगु मत तयेगु यानाच्वंगु दु ।

सामाजिक सञ्जाल फेस बुकय् तकं तिब्र रुपं हे बहस जुयाच्वंगु दु । यलय् च्वंपिन्सं लक्ष्मी पुजा, म्ह फुजा, किजा पुजा छसिं कथं कार्तिक १० गते, ११ गते व १२ गते हनीगु अले येँय् च्वंपिन्सं लक्ष्मी पुजा ११ गते, म्ह पुजा १२ गते अले किजा पुजा १३ गते हनेगु धकाः थःथःगु मत तयाच्वंगु दु ।

थथे सामाजिक सञ्जालय् मत तयेगु नाप नापं छगू थासय् च्वंपिन्सं मेगु थासय् च्वंपिन्त कुंखिनेगु नापं छगू कथं ब्वःबिइगु तकं यानाहःगु दु । थुगु कथंया नेवाःतय्गु दथुइ स्वन्ति नखःया बारे विवाद जुयाच्वंगुया खना मेपिं न्हिली अले नेवाः नेवाःया दथुइ एकता जुइ मफुगुया संकेत खः धकाः तकं टिप्पणी यानाहःगु दु ।

थ्व विवाद धइगु चन्द्रमासयात प्रधान नाला वनेगु ला कि सौर्यमासयात प्रधान नाला वनेगु धइगु सवालय् नेवाःत अलमल जूगुलिं हे खः धकाः तकं धाइपिं मदुगु मखु । बास्तवय् नेवाःतय्सं चन्द्रमास व सौर्यमासयात निगुलिं नाला वयाच्वंगु दु । नेवाःतय्सं सूद्र्यः लूगु छु तिथिइ लात उगु हे तिथि कथं न्हिच्छियात नाला वयाच्वंगु दु धाइपिं छथ्वः दुसा मेगु पक्षयापिं धाःसा शास्त्रया आधारय् तिथि क्यनीगु ई अले संस्कृति हनेगु ई नाप स्वनाच्वंगु दु धकाः धायेगु यानाच्वंगु दु ।

सौर्यमास धइगु न्हि व चाया आधारय् ल्याः खाइगु खःसा चन्द्रमास धइगु पूर्वीय दर्शन कथं चन्द्रमाया आधारय् ल्याः खाइगु खः । तर नेवाःतय्सं धाःसा चन्द्रमास व सौर्यमास निगुलिं नाला वयाच्वंगु खने दु । चन्द्रमास कथं संस्कार व संस्कृति माने यायेमाः धाइगु मनूतय्गु मान्यता दु । चन्द्रमास कथं माने यायेगु धाःगु शास्त्रया आधारये खः ।

तिथिया आधारय् खः । तिथिया ल्याखं स्वल धाःसा कार्तिक १० गते अक्टुबर १२७ आइतवाः धइगु चतुर्दशी तिथि खः, सुथय् ११ः५० तकया ई चर्तुदशी खःसा अनं लिपा अमै खः । अथे हे कार्तिक ११ गते अक्टुबर २८ सोमवाः सुथय् ९ः४५ता ई तक अमै अले अनं लिपा पारु खः । अथे हे कार्तिक १२ गते अक्टुबर २९ मंगलवाः सुथय् ७ः५० तक पारु खःसा अनं लिपा दुतिया खः ।

थुगु कथंया विवाद नं स्वंगू दशकसिबें न्ह्यःतकं मजू, तर आः वया जुयाच्वन धकाः स्वयं नेवाः न्ह्यलुवाः नापं ज्योतिषतय्सं तकं धायेगु याना वयाच्वंगु दु । थुगु ल्याखं स्वल धाःसा नेपाल संवतया न्हूदँ आन्दोलनया इलंनिसें हे उगु हे कथं विवाद ब्वलना वःगु खनेदु धकाः अःपुक धायेफइगु अवस्था दु ।

अथे हे कार्तिक १३ गते अक्टुबर ३० बुधवाः सुथय् ६ बजे तक दुतिया खःसा अनं लिपा तृतिया खः । शास्त्रया ल्याख धायेगु खःसा सामान्यतया जप, तप, श्राद्ध, दन यायेगु ज्या सुथय् खः । अले कर्म गबले लाइ अबले हे मेमेगु कथंया संस्कार याना वयाच्वंगु दु । लक्ष्मी पुजा धइगु बहनी याइगु संस्कृति खः । अथे हे म्ह पुजा धइगु सनिलय् याइगु खः ।

तर नेवाःतय्गु थ्या सफुति धाःसा चन्द्रमा खने दयेवं याइगु धाइ । अथे हे किजा पुजा धइगु न्हिनय् व सनिलय् याइगु खः धकाः शास्त्रय् उल्लेख दु धकाः ज्योतिषतय्सं धायेगु याना वयाच्वंगु दु । नेवाःतय्गु दथुइ आः जुयाच्वंगु विवाद आइतवाः १० गते लक्ष्मी पुजा हनेगु ला कि महनेगु ? सोमवाः ११ गते लक्ष्मी पुजा यायेगु ला कि म्ह पुजा यायेगु ? सोमवाः १२ गते म्ह पुजा यायेगु ला कि किजा पुजा यायेगु ? धइगु सवालय् खः ।

तिथिया घडी पलाःया ल्याखं स्वल धाःसा १० गते चर्तुदशी नापं अमैं नं क्यं । अले आमै धाइगु ११ः५० लिपा खः । यदि सुथय् नसंचाया इलय् छु तिथिइ क्यन व हे तिथि न्हिच्छियात मानेयायेगु धकाः धाल धाःसा १० गतेयात चर्तुदशी नालेमाल । अथे हे लक्ष्मी पुजा धइगु बहनी यायेगु संस्कृति खः धकाः नालेगु खःसा उकुन्हु अर्थात १० गते हे लक्ष्मी पुजा यात धाःसां जिउगु जुल ।

अथे हे कार्तिक ११ गते सोमवाः सुथय् ९ः४५ता ई तक आमै अले अनं लिपा पारु खः । सुथय् नसंचाया इलय् आमै क्यंगुलिं न्हिच्छियात हे आमै कथं नालेगु धाःसा ११ गते हे लक्ष्मी पुजा यायेमाल । मखु म्ह पुजा धइगु बहनी याइगु पर्व खः धकाः नालेगु ज्या जुल धाःसा उखुन्हु हे म्ह पुजा याःसां छुं मपाइगु जुल ।

अथे हे कार्तिक १२ गते मंगलवाः सुथय् ७ः५० तक पारु खःसा अनं लिपा दुतिया खः । सुथय् नसंचाया इलय् छु तिथिइ लात उगु हे तिथि न्हिच्छि नालेगु खःसा १२ गतेयात किजा पुजा कथं नालेमाल । मखु म्ह पुजा धइगु बहनी यायेगु संस्कृति खः धकाः नालेगु जुल धाःसा म्ह पुजा यायेमाल ।

उगु हे कथं कार्तिक १३ गते बुधवाः सुथय् ६ बजे तक दुतिया खःसा अनं लिपा तृतिया खः । अले सुथय् नसंचाया इलय् दुतिया जूगुलिं नसंचाया ईयात हे न्हिच्छि कथं नालेगु खःसा थुकुन्हु किजा पुजा याःसां छुं पाइमखु तर किजा पुजा धइगु बहनी यायेगु पुजा खः धकाः मधाल धाःसा बांलाइ ।

थ्व हे स्वन्हुयंकंया संस्कृति नाप नापं वयाच्वंगु धइगु नेपाल संवतया न्हूदँ हनेगु खः । न्हूदँ हनेगु धइगु तिथि कथं पारुया दिनय् खः । थ्व सुथय् नसंचा ईयात नाला वयाच्वंगु खः । थुगु ल्याखं कार्तिक १२ गते मंगलवाः सुथय् ७ः५० सिबें न्ह्यः तक पारु जूगुलिं सुथय्या ईयात नाला नेपाल संवतया न्हूदँ हनेगु सवालय् धाःसा छगू हे मत जुयाच्वंगु दु ।

थुगु ल्याखं स्वल धाःसा नेवाः समुदाय दुने छु संस्कृति सुथय्, न्हिनय् वा बहिनी गुगु इलय् हनेगु धइगु सवाल नापं सुथय् नसंचा ईयात हे न्हिच्छिया तिथि नालेगु ला कि मनालेगु धइगु सवालय जूगु मूल विवाद खः । थ्व विवादयात कया स्वल धाःसा लक्ष्मी पुजा, म्ह पुजा व किजापुजा १०, ११ व १२ यात हनीपिन्सं नं थःगु हे कथंया तर्क तयाच्वंगु दुसा ११, १२, व १३ गते हनीपिन्सं नं थःगु हे कथंया तर्क तयाच्वंगु दु ।

तिथिया ल्याखं स्वल धाःसा १० व ११ गते निन्हु हे अमैं लानाच्वंगु दु, ११ व १२ गते पारु लानाच्वंगु दु अले १२ व १३ गते दुतिया लानाच्वंगु दु । उकिं अःपुक धायेगु खःसा थःथःगु तर्क जक खः बास्तवय् थ्व स्वन्हुयंकं झ्वःलकं हनेगु पर्व जूगुलिं थःथःगु चलन कथं हन धाःसां छुं पाइमखु अले छम्हेस्यां हंगुयात मेम्हेस्यां आलोचना यायेगु ज्या जक मयात धाःसां बांलाइ धकाः थुइकेमाः ।

तर नेवाः समाजय् धाःसा तिथियात कयाः थुगु कथंया विवाद धइगु विशेष याना स्वन्ति नखःया इलय् अप्वः जूगु खने दु । मोहनी नखः बाय् मेमेगु नखः जुइगु इलय् तिथिया सवलय् अलमल जूसां थःथःगु कथं हना यंकेगु यानाच्वंगु दु । उकिइ विवाद यानाच्वंगु खने मदु ।

अबले नसंचा इलय् छु तिथिइ लात उगु हे तिथि न्हिच्छि यंकं नाला संस्कृति हनेमाः अले बहनी हनेगु संस्कृति, न्हिनय् हनेगु संस्कृति वा सुथय् हनेगु संस्कृति धकाः नेवाःतय्सं विवाद याःगु खने मदु तर स्वन्ति नखःया सवालय् धाःसा विवाद जुयाच्वंगु दु । थुगु कथंया विवाद नं थौंसिबें स्वंगू दशकसिबें न्ह्यः मजू तर आः वया जुयाच्वन धकाः स्वयं नेवाः न्ह्यलुवाः नापं ज्योतिषतय्सं तकं धायेगु याना वयाच्वंगु दु ।

थुगु ल्याखं स्वल धाःसा नेपाल संवतया न्हूदँ आन्दोलनया इलंनिसें हे उगु हे कथं विवाद ब्वलना वःगु खनेदु धकाः अःपुक धायेफइगु अवस्था दु ।

सम्बन्धित बुखँ

LEAVE YOUR COMMENTS