राष्ट्रपति सीया सन्देशं लुम्बिनीया प्रवद्र्धन जुइगु विश्वास
चिनिया राष्ट्रपति सी जिनपिङया नेपाः भ्रमणं बुद्ध जन्मस्थल लुम्बिनीया पर्यटन प्रवद्र्धनय् ग्वाहालि जुइगु विश्वास याःगु दु । चिनिया राष्ट्रपतिं सीं थः नेपाः भ्रमणय् वये छन्हु न्ह्यः बियादीगु सन्देशय् नेपाः चिनिया नागरिकया निंतिं दक्षिण एशियाया प्रमुख गन्तव्य जुइगु खँ न्ह्यथनादीगुलिं बुद्ध जन्मस्थल लुम्बिनीया आकर्षण अप्वःगु खः ।
राष्ट्रपति सीं बुद्ध धर्मया प्रचारप्रसार, प्रवद्र्धनलिसें लुम्बिनीया विकासय् चिनिया भूमिकाया विषयय् बियादीगु सन्देशं नं चिनियातय् नेपाः आः प्रमुख गन्तव्य लुम्बिनी जुइ फइगु बल्लाःगु सम्भावना खने दया वःगु दु । राष्ट्रपति सीया नेपाः भ्रमण मुक्कं देय्यालिसें बुद्ध जन्मस्थल लुम्बिनीया निंतिं नं थप महत्वपूर्ण जुइगु खने दया वःगु दु ।
थुकिया प्रमुख कारण करिब १६०० दँ न्ह्यः चिनिया महान भिक्षु फाहियान व नेपाःया महान भिक्षु बुद्धभद्र छम्हं मेम्हेसिया देय्या भ्रमण यानाः मंकाःकथं बौद्ध धर्मया शास्त्रपद, अनुवाद याःगु न्ह्यथँसें बुद्ध धर्मया संरक्षण, संवद्र्धन व प्रचारप्रसारय् महत्वपूर्ण भूमिका म्हितूगु राष्ट्रपति सीं थःगु सन्देशय् न्ह्यथनादीगु दु ।
वय्कःया थुकथंया सन्देशं नेपाः व चीन दथुया द्वलंद्वः दँ पुलांगु सम्बन्धया महत्वयात थप उजागर याःगु स्पष्ट खने दु । थुकिया लिसें चिनिया राष्ट्रपति सीं महान भिक्षु हुएन साङं शाक्यमुनि बुद्धया जन्मस्थल लुम्बिनीया वर्णन थःगु यात्रा वृत्तान्तय् च्वःगु खँ नं न्ह्यथनादीगु दु ।
वय्कलं लुम्बिनीइ चीनं दयेकूगु चिनिया बौद्ध देगः चीन व नेपाःया दथुइ धार्मिक व सांस्कृतिक आदानप्रदानया प्रतीक जूगु व दँय्दसं स्वंगू लाख स्वयां अप्वःसिनं छम्हं मेम्हेसिया देय्या भ्रमण याःगु नं लुमंकादीगु दु । राष्ट्रपति सीं थःगु नेपाः भ्रमण स्वयां न्ह्यः बियादीगु सन्देशय् पहाड व खुसिं स्वानाच्वंगु युगौं न्ह्यवंनिसेंया निगू देय्या दथुइ मैत्रीपूर्ण सम्बन्ध दया वयाच्वंगु खँ न्ह्यथनादीगु दु ।
चिनिया राष्ट्रपति सी जिनपिङं आः नकतिनि यानादीगु नेपाः भ्रमण चर्चाया उत्कर्षय् थ्यंगु जक मखसे विशेष महत्व नं दयाच्वंगु दु । राष्ट्रपति सीं याःगु राजकीय भ्रमण नेपाःया निंतिं गर्वया विषय जूगु दु । थ्व भ्रमण नेपाः व चीन निगुलिं देयया सामाजिक, सांस्कृतिक, आर्थिक व थवंथवय् सम्बन्ध थप अभिवृद्धि यायेत नं महत्वपूर्ण जुइकथं काःगु दु ।
वय्कःया थुकथंया सन्देशं चिनियातय् निंतिं पर्यटकीय, औद्योगिक व व्यावसायिक लगानीया प्रमुख छनोट नेपाः जुइ फइगु तकं अपेक्षा याःगु दु । प्रदेश नं. ५ उकिसनं लुम्बिनीप्रति चिनिया चिउताः अप्वयाच्वंगु दु ।
प्रदेश ५ या विकासया निंतिं चिनियातय् थुगु क्षेत्रया भ्रमण व प्रदेशया थीथी तहया व्यक्तितय् चीन भ्रमणया ज्याझ्वः व अनुभव कालबिलया अप्वया वनाच्वंगु अवस्था दुगुलिं नं चिनियात थुगु क्षेत्रप्रति आकर्षित जूगु माने याये फइगु अवस्था दु ।
प्रदेश सरकारयापाखें करिब निला न्ह्यः जक चिनिया सरकारया ब्वनाय् थीथी प्रान्तया भ्रमण यानाः लिहां झायादीम्ह उद्योग, पर्यटन, वन तथा वातावरणमन्त्री लिल गिरीं थःगु चीन भ्रमणया झ्वलय् चिनिया पक्षलिसे जूगु सहलह व अन्तक्र्रियाय् चिनियात लुम्बिनीइ लगानी यायेत तसकं आकर्षित जुयाच्वंगु धयादी ।
वय्कलं भैरहवाय् गौतमबुद्ध अन्तर्राष्ट्रिय विमानस्थल संचालनय् वइबलय् उगु क्षेत्रय् होटल, व्यवासयय् चिनिया लगानी दुहां वइगु व थुकिया निंतिं प्रदेश सरकारपाखें लगानी वातावरणया निंतिं आवश्यक पूर्वाधार निर्माण यायेगु जुुइ धयादिल । लुम्बिनी भ्रमणया निंतिं वइपिं चिनिया पर्यटकतय् तथ्यांक दँय्दसं अप्वयाच्वंगु दु ।
चिनिया बुद्ध धर्म व लुम्बिनीप्रति तसकं प्रभावित जूगुलिं इमिगु गन्तव्य लुम्बिनी जुइगु यानाच्वंगु दु । लुम्बिनी विकास कोषया लिपांगु छगू तथ्यांककथं नं थुगु दँया जनवरीनिसें सेप्टेम्बर तकया दुने १०५ गू देय्या छगू लाख गुद्वः व चय्गुम्ह स्वंगूगु देय्या पर्यटकं लुम्बिनी भ्रमण याःगु दु । थुकीमध्ये चिनियातय् ल्याः झिंस्वद्वः न्हय्सः व ग्वीन्याम्ह दु ।
थ्व ल्याः लुम्बिनी भ्रमण याःपिं स्वंगूगु देय्या पर्यटकया तथ्यांकय् प्यंगूगु थासय् दुगु खनेदु । लुम्बिनी चाःहिले वइपिं चिनिया पर्यटकया ल्याः वार्षिक नीप्यद्वः स्वयां अप्वः दु । पर्यटकया आगमनया ल्याखं थ्व ल्याः धइगु स्वंगूगु वा प्यंगूगु थासय् दुसां नं चिनिया पर्यटकया खर्च यायेगु क्षमता अप्वः दुगु लुम्बिनी विकास कोषया निमित्त सदस्य सचिव इन्जिनियर सरोज भट्टराईं कनादी ।
लुम्बिनीया विकासया निंतिं चिनिया चिउताः अप्वया वनाच्वंगु दु तर सरकारयापाखें समन्वय व कार्यान्वयनय् अलमल थेंज्याःगु अवस्थां चिनिया लगानी विचाः याःथें अझं दुहां वये मफयाच्वंगु वय्कःया धापू दु ।
नेपाः भ्रमणय् वये स्वयां न्ह्यः चिनिया राष्ट्रपति सीं बियादीगु सन्देशय् चीनं नेपाःया ‘नेपाल पर्यटन वर्ष २०२०’या पूर्ण समर्थन यासें अझ अप्वः चिनिया नागरिकयात नेपाः भ्रमण यायेत प्रोत्साहित याइगु विश्वास याःगु दु ।
LEAVE YOUR COMMENTS