ने. सं. ११४४ कछलागा तृतीया -

जेठ ४ गते हे चुनाव यायेमाःगु ओलीया माग

येँ – प्रतिपक्षी नेता लिसें नेकपा एमालेया अध्यक्ष केपी शर्मा ओलीं निर्वाचन आयोगं सिफारिस याःगु मितिइ हे स्थानीय निर्वाचन जुइमाः खँ धयादीगु दु । म्हिगः पार्टीया केन्द्रीय सचिवालयया बैठकयात सम्बोधन यायेगु झ्वलय् अध्यक्ष ओलीं उगु खँ धयादीगु खः ।

वय्कलं निर्वाचन सरकारया स्वेच्छाया विषय जुइ फइ मखु खँ धासें क्वःछिउगु मितिइ हे चुनाव यायेमाःगु माग यानादिल । वय्कलं धयादिल, ‘संविधानया सही कार्यान्वयन व उत्तरदायित्व पूवंकेगु खःसा फागुन दुने हे निर्वाचन यायेमाःगु खः, थ्व सम्बन्धय् जिमिसं पटक पटक सरकारया ध्यानाकर्षण नं याकागु खः, तर सरकार संविधान कार्यान्वयन व लोकतान्त्रिक अभ्यास, संघीयताया कार्यान्वयन यायेगु स्वयां सत्ता स्वार्थय् केन्द्रित जुल ।’

वय्कलं सरकारय् दुगु पार्टी व उकिया नेतातय्सं २०७९ सालया चैतय् निर्वाचन यायेगु धकाः बकवास यानाच्वंगु द्वपं नं बियादिल ।
थ्वहे झ्वलय् वयेत्यंगु निर्वाचनयात कयाः म्हिगः केन्द्रीय सुरक्षा समितिया बैठक च्वंगु दु । बैठकय् प्यंगुलिं सुरक्षा निकाययात स्थानीय तहया निर्वाचन सम्बन्धी कार्ययोजना पेश यायेत निर्देशन बिउगु खः । गृहमन्त्री बालकृष्ण खाँणया अध्यक्षताय् गृह मन्त्रालयय् हे उगु बैठक च्वंगु खः ।

निर्वाचन आयोगं जेठ ४ गते स्थानीय तहया निर्वाचन यायेत सरकार समक्ष प्रस्ताव छ्वयेधुंकूगु दुसा उगु प्रस्तावयात कयाः सरकारं मन्त्रिपरिषद्पाखें निर्णय यायेगु तयारी यानाच्वंगु दु । आः च्वनीगु मन्त्रिपरिषद् बैठकं चुनावया मिति घोषणा याइगु खँ धाःगु दु । म्हिगःया

बैठकय् सुरक्षा निकाययात चुनावया लागिं तयार जुयाच्वनेत नं निर्देशन बीगु ज्या जूगु खः ।
म्हिगःया बैठकय् गृहसचिव टेकनारायण पाण्डे, नेपाली सेनाया रथि बालकृष्ण कार्की, प्रहरी महानिरीक्षक शैलेश थापा क्षेत्री, सशस्त्र प्रहरी महानिरीक्षक शैलेन्द्र खनाल व राष्ट्रिय अनुसन्धान विभागया प्रमुख यदुलाल खरेलपिंसं ब्वति कयादीगु खः ।