प्रेमशान्ति तुलाधरयात बैकुण्ठ लाकौल सिरपाः लःल्हात
यल (नेपालभाषा टाइम्स)÷बागमती प्रदेशया सामाजिक विकास मन्त्री हरिप्रभा खड्गीं नेपालभाषा, साहित्य व संस्कृति ल्यंकेगु खःसा पुस्तान्तरण यायेमाःगु खँ धयादीगु दु । म्हिगः नेपालभाषा केन्द्रीय विभागया ५४ क्वःगु बुदिं लिसें लाकौल व चैन लाकौल सिरपाः लःल्हायेगु ज्याझ्वलय् मूपाहां कथं न्ववासें वय्कलं उगु खँ धयादीगु खः ।
मन्त्री खड्गीं स्वनिगः सांस्कृतिक नगरी जूगुलिं थनया मूर्त अमूर्त सम्पदा ल्यंकेमाः धकाः थः उपमेयर जुयाच्वनागु इलंनिसें हे ज्या न्ह्यानाच्वनागु धासें आः नं थःगु मन्त्रालयपाखें माःगु ग्वाहालि यायेगु खँ कनादिल ।
ज्याझ्वलय् नेपालभाषा, साहित्य व समालोचना विधाय् महत्वपूर्ण योगदान यानादीम्ह प्रेमशान्ति तुलाधरयात लाकौल सिरपाः लःल्हाःगु खः ।
उकथं हे नेपालभाषा केन्द्रीय विभागय् मिसा विद्यार्थीतय्त प्रोत्साहनया निंतिं स्वनातःगु चैन लाकौल सिरपाः स्वम्हेसित बिउगु दु । नेपालभाषा स्नाकोत्तरय् दकलय् अप्वः ल्याः हयाः उत्तीर्ण जूपिं विद्यार्थीत कृष्णप्यारी श्रेष्ठ, पद्मा खयरगोली व रजनी श्रेष्ठयात चैन लाकौल सिरपाः लःल्हाःगु खः ।
नेपालभाषा केन्द्रीय विभाग प्रमुख सह प्रा. राजनलाल जोशीया सभापतित्वय् उगु जूगु ज्याझ्वलय् लसकुस यायेगु झ्वलय् प्रमुख जोशीं नेपालभाषा केन्द्रीय विभागय् थीथी कथंया अनुसन्धान जुयाच्वंगु खँ कनादिसें बागमती प्रदेशं नेपालभाषा व तामाङ भाषायात सरकारी ज्याखँया भाय् दयेकेधुंकाः अन ज्या यायेगु लागिं भाषा सःपिं जनशक्ति माःगु खःसा थःपिंसं ग्वाहालि यायेफुगु खँ कनादिल ।
उकथं हे वय्कलं मदुम्ह नेपालभाषा शिरोमणि बैकुण्ठप्रसाद लाकौलं निरन्तर रुपं यानाच्वंगु ग्वाहालिया नितिं च्वछायादिसें मिसापिं विद्यार्थीयात प्रोत्साहन बीकथं चैन लाकौल सिरपाः स्वनादीगुलिं थःपिं आभारी जुयागु खँ नं कनादिल ।
ज्याझ्वलय् सिरपाःया दाता बैकुण्ठप्रसाद लाकौलाया काय् भाजु श्रीकण्ठ लाकौलं बैकुण्ठ लाकौल सिरपाः व चैन लाकौला सिरपाःया नितिं अक्षष कोषया व्यवस्था यानागु जानकारी अन याकादीगु खः ।
ज्याझ्वलय् नेपालभाषा केन्द्रीय विभागया संस्थापक प्रमुख प्रा.डा. सुन्दरकृष्ण जोशी, पाटन क्याम्पसया प्रमुख लक्ष्मणसिंह कुँवर व सिरपाः त्याकादीम्ह प्रेमशान्ति तुलाधरं नं न्ववानादीगु खःसा उप प्रा. जीवनकुमार महर्जनं तुलाधरया म्हसीका बियादीगु खः ।
LEAVE YOUR COMMENTS