‘सहिदपिनि योगदानयात मस्तय्सं नं सीकातयेमाः’
येँ (नेपालभाषा टाइम्स)÷ येँया २३ वडाय् च्वंगु सहिद धर्मभक्त माथेमाया सालिकय् स्वां देछासें सहिद दिवस हंगु दु । सहिद दिवसया लसताय् सहिद धर्मभक्त माथेमा स्मृति गुथिया ग्वसालय् येँय् २३ वडाय् च्वंगु सहिद धर्मभक्त माथेमाया सालिकय् स्वांमाः देछाःगु खः ।
गुथिया अध्यक्ष पवित्र वज्राचार्यया सभापतित्वय् जूगु ज्याझ्वलय् मूपाहाँ कथं झाःम्ह येँ महानगरपालिकाया उपमेयर सुनिता डंगोलं सालिकय् स्वांमा देछायादीगु खः ।
ज्याझ्वलय् न्ववासें वय्कलं देशय् राजनीतिक हिउपाः हयेगु निंतिं सहिदपिनि योगदान तःधंगु दु धासें सहिदपिनि योगदान बारे मस्तय्सं नं सीकेमाःगु आवश्यक दुगु खँ धयादिल ।
वय्कलं धयादिल, ‘थौं देशय् नागरिक हे सत्ताय् वनेफुगु अवस्था दु । थथे जूगु सहिदपिनि योगदानया कारणं हे खः, उकिं सहिदतय् बारे लिपाया पुस्तां नं सीका तयेगु निंतिं सहिदपिंत लुमंकीगु थज्याःगु ज्याझ्वलय् मस्तय्त सहभागि यायेमाःगु आवश्यक
दु ।’
सहिदपिनि लुमंति छगू मिनेट मौन धारण यानाः न्ह्याःगु ज्याझ्वलय् येँ महानगरपालिका २३ वडाया अध्यक्ष मचाराजा महर्जनं लसकुस यानादीगु खः ।
LEAVE YOUR COMMENTS