ने. सं. ११४३ ञलागा चौथी -

वालुवाटारं मालाच्वन वकिलत, सर्वोच्चया मुद्दा प्रधानमन्त्रीं बिचाः याः थें मजुइगु खतरा

येँ (नेपालभाषा टाइम्स) – प्रधानमन्त्री केपी शर्मा ओलीं यानादीगु संसद विघटनया समर्थनय् आः तक सुं छम्ह हे कानूनविद्त कुहां मवःगुलिं थुकियात कयाः आः सर्वोच्चय् जुइगु वहस तकं प्रभावित जुइ फइगु खतरा वालुवाटारं खंका हःगु सीदुगु दु । वालुवाटारं आः तक संसद विघटन बारे राजनीतिक रूपं जक न्ववानाच्वंगु खःसां दुनें दुनें धाःसा कानून व्यवसायीतय् टीम नं तयार यानाच्वंगु खँ सूत्रं धाःगु दु । थ्व ज्याय् थौंकन्हय् प्रमया सतीम्ह कानून व्यवसायी बाबुराम दाहाल दकलय् सक्रिय रुपं खटे जुयाच्वंगु खँ नं सूत्रं धाःगु दु ।

सर्वोच्चय् थुकिया सुनुवाइ जुइबलय् वहस यायेगु लागिं वालुवाटारं कानून व्यवसायीत मालेगु ज्या शुरु याःगु खँ सूत्रं धाःगु दु । तर थुकी आः तक राजनीतिक आस्था दुपिं वकिलत बाहेक मेपिंसं उलि चिउताः मतःगु खँ नं सीदुगु दु । नांजाःपिं वकिलतय्सं थःगु फी कयाः जक वहसय् ब्वति काः वयेधकाः लिसः बियाहःगु खँ नं सूत्रं धाःगु दु ।

न्हापा वामपन्थी पृष्ठभूमि दुपिं सकलें धइथें कानून व्यवसायीतय्सं संसद विघटनया विपक्षय् बिचाः तयेगु नापनापं अदालतय् तकं उकिया विरोधय्व हस याना बिउगु कारणं पक्षय् वनीपिं वकिलतय्त थाकुयाच्वंगु नं सूत्रया दावी दु । वालुवाटारं माक्व फी पुलाः जूसां वहस याकेत तयार याये हःम्ह छम्ह वरिष्ठ अधिवक्ता सुशिल पन्त जुयाच्वंगु खँ धाःगु दु ।

थ्व इलय् प्रधानमन्त्रीयात ग्वाहालि यायेगु लागिं महान्यायाधिवक्ताया कार्यालय चान्हि मधासे खटे जुयाच्वंगु दु । सर्वोच्च अदालतय् थुकियात कयाः न्ह्यागु हे वहस जूसां अन्तिमय् सर्वोच्चया फैसला संसद विघटनया पक्षय् हे वनी कथं प्रधानमन्त्रीं सेटिङ मिले याना तयेधुंकल धाइपिनिगु छगू पुचः नं सक्रिय दु । उमिसं थ्व इलय् सर्वोच्च अदालतया प्रधानन्यायाधीश चोलेन्द्र शम्शेर जबरां क्यना हयाच्वंगु रवैयायात न्ह्यःने तसें थःपिनि दावी प्रमाणित जुइगु खँ धायेगु यानाच्वंगु दु । तर विज्ञ सूत्रतय्सं धाःसा प्रमपाखें अज्याःगु सेटिङ मिले यानातःगु हे खःसां नं थौंकन्हय् कानुनी ख्यलय् जुयाच्वंगु चर्चा व गतिविधिं यानाः सर्वोच्चं नं उगु सेटिङ कथं ज्या याये मफइगु अनुमान याना हःगु खँ दु। वहे कारणं नं थौंकन्हय् वालुवाटारं वकिलत ल्ययेगु ज्याय् समेत ध्यान बियाहःगु सूत्रया दावी दु ।

विघटित प्रतिनिधिसभाया सभामुख अग्नी सापकोटां समेत अदालतय् वनाः संसद विघटनया विपक्षय् राय बीगु खँ सार्वजनिक रूपं धायेधुंकूगु दु । थुकिया असर समेत फैसलाय् लायेफुगु खँ नं सूत्रं धाःगु दु ।