सफुतिइ चिनिया राष्ट्रपतिया नेपाः भ्रमण

येँ (नेपालभाषा टाइम्स) – चिनिया राष्ट्रपति सी जिनपिङं नेपाः भ्रमण याःगु दछि पूवंगु अवसरय् लाकाः ‘प्रेसिडेण्ट सि जिझफिङ्स नेपाल भिजिट : अ पिक्टोरियल गाइड’ सफू पिदंगु दु। नेपाल-चाइना मिडिया फोरमं पिथंगु उगु सफू पुलांम्ह प्रधानमन्त्रीलसें नेकपाया वरिष्ठ नेता माधवकुमार नेपालं पितब्वज्या यानादीगु खः ।

ज्याझ्वलय् नवासें पार्टीया विदेश विभाग प्रमुख तकं जुयादीम्ह नेपालं नेपाः व चीनया सम्बन्ध न्ह्याबलें हार्दिक व सुमधुर जूगु खँ न्ह्यथँसें थ्व सम्बन्धयात अझ क्वातुका यंकेमाःगु खँय् बः बियादिल । चिनिया राष्ट्रपतिया भ्रमणं नेपालं गुलि लबः काये फत धइगु खँया समीक्षा यायेगु ई वःगु खँ न्ह्यथनादिसें वय्कलं भ्वँतय् जक लबः काय फत आः व्यावहारिक रुपं गुलि लबः काये फत? बेल्ट एण्ड रोड इनिसियटिभ्सपाखें गुलि लबः काये फत धइगु खँया समीक्षा यायेगु ई वःगु दु धयादिल ।

चीनया निंतिं नेपाःया पुलांम्ह राजदूत लिलामणि पौड्यालं सन् १९६५ लय् निगू देय्या दथुइ कूटनीतिक सम्बन्ध स्थापना लिपा थीथी महत्वपूर्ण आयामया बारे चर्चा यानादिल । फोरमया अध्यक्ष किशोर श्रेष्ठं चिनिया राष्ट्रपति सीपाखें २३ दँ लिपा जूगु भ्रमण नेपाःया निंतिं विशेष दिं जूगु व थुकिं निगू पक्षया सम्बन्धय् विशेष महत्व दुगु चर्चा यानादिल ।

पितब्वज्या जूगु सफुतिइ चिनिया राष्ट्रपति सी, नेपाःया पुलांपिं प्रधानमन्त्रीपिं पुष्पकमल दाहाल प्रचण्ड, माधवकुमार नेपाल, शेरबहादुर देउवा लगायतया नेतातय् च्वसु दुथ्यानाच्वंगु दु ।

सम्बन्धित बुखँ

LEAVE YOUR COMMENTS