बाहिरी चक्रपथयात बजेट मबीगु !
येँ – सरकारं आः वइगु आर्थिक वर्षया बजेटय् बाहिरी चक्रपथ निर्माणया लागिं बजेट मबीगु जूगु दु ।
शहरी विकास मन्त्री मोहम्मद इस्तियाक राईं बाहिरी चक्रपथ दयेकेगु सरकारया नीति यथावत दुसां नं वइगु आर्थिक दँया बजेटय् थुकिया लागिं बजेट मतयेगु खँ कनादीगु खः । आइतवाः विकास तथा प्रविधि समितिइ वय्कलं झिंनिदँ पुलांगु सम्भाव्यता अध्ययनया आधारय् आः आयोजना न्ह्याके फइ मखु धासें थुकिया लागिं बजेट मतयेगु खँ कनादीगु खः ।
थम्हं जोखिम कयाः आयोजना न्ह्याकाः जेल वनेगु खँ जुइ मखु धासें वय्कलं आयोजना न्ह्यःने न्ह्याकेत अर्थ मन्त्रालयया भूमिका महत्वपूर्ण जुइगु खँ नं कनादिल । न्हापाया सरकारं बजेटया सुनिश्चितता मयासे बजेट तया बिउगुलिं यानाः आः अत्यधिक दायित्व अप्वःगु दु धासें पुलांगु सरकारं याःगु गल्तीया भागिदार थः जुइमाःगु खँ दुःख नं वय्कलं प्वंकादिल ।
७१.९३ किलोमिटर ताःहाःगु बाहिरी चक्रपथ दयेकेत चिनियाँ कम्पनीं चिउताः प्वंकाच्वंसां लागत लिहां वइगु ग्यारेन्टी मजूतले ज्या न्ह्याके फइगु सम्भावना मजुयाच्वंगु दु । सरकारं उगु आयोजना जग्गा एकीकरण (ल्यान्ड पुलिङ) प्रणालीपाखें न्ह्याकेगु योजना दयेकाच्वंगु दु । आयोजना दयेकेगु निंतिं २ खर्ब १३ अर्ब तका तुइगु अनुमान नं मन्त्रालयं यानाच्वंगु दु ।
सरकारं न्हापांगु चरणय् चोभाः–गाम्चा–सतुंगल क्षेत्रया ६.६ किलोमिटर खण्डय् विस्तृत आयोजन प्रतिवेदन स्वीकृत यायेधुंकूगु खः । तर जग्गा एकीकरण यायेगु ज्याय् समस्या वयेवं आयोजना न्ह्याके फयाच्वंगु मदु ।
आयोजना कार्यान्वयन यायेगु निंतिं आवश्यक बजेट मदु धासें स्रोत सुनिश्चित मजुइकं आयोजना न्ह्याकेत थः अनिच्छुक जूगु खँ नं मन्त्री राईं कनादीगु दु । मेखे विकास तथा पूर्वाधार समितिं धाःसा न्ह्याथे यानाः नं आयोजनायात पिने तयेमजिउ धासें आयोजनायात बजेटया व्यवस्था यायेत अर्थ मन्त्रालययात निर्देशन बिउगु दु । समितिया सभापति कल्याणी खड्कां आयोजन स्वनिगःया निंतिं जक मजुसें देय्न्यंकंया नागरिकयात लिच्वः लाइगु धासें बजेटया व्यवस्था यायेत निर्देशन बिउगु खः ।
LEAVE YOUR COMMENTS