नालिस ! नालिस ! नालिस !

धाइ । कलियुग । थौकन्हय् छु ठीक, छु बेठीक । न्ह्यागु नं सम्भव । थ्व जुइ मखु । अथे जुइ सम्भव हे मदु । धुक्क जुइ फइगु ई मखु । जुइ फइमखु धइगु खँत मिखाया न्ह्यःने हे जुयाच्वंगु दइ । न्यने हे माली मखुगु थेंज्याःगु खँत न्यने मालाच्वंगु दइ । का स्वरे ! छम्ह कायं थः अबुयात नालिस तल हँ ! अंश मबिउ धकाः मखु ।

कायया थ्व धरतीइ जन्म जुइगु इच्छा हे मदु हँ ! इच्छा मदयेक हे जबरजस्ती अबुं बुइकल । अनिच्छां थ्व संसारय् वयेमाल । थ्व अबुया सरासर अन्याय खः । थः अबु थ्व खँय् दण्डित जुइमाः । न्याय कायेत हे कायं अबुया नामय् अदालतय् उजुरी याइ । निसाफ फ्वनी । छु धाइगु थ्व । न्यने मात्रं गज्जबगु ।

आः बौ नं काययाके बुइ न्ह्यः हे ‘बाबु, छंत बुइके त्यना, छं जन्म काये यः ला कि मयः ?’ धकाः गथे न्यनगु ? शुक्रकीटलिसे अनुमति कायेमाःगु खँ वल । थ्व जुइ हे मफइगु खँ । गुगु खँ सम्भव हे मदु, अज्याःगु खँयात कयाः अबुयात नालिस तयेगु गुलित जायज ? थ्व ला सरासर सन्की ज्या जुइ । तर ! थज्याःगु सन्की ज्या थौंकन्हय् खूब बुद्धिमानी खनीगु ।

मनूतय् आकर्षणया विषय जुइगु । अखबारय् नं थज्याःगु खँ जुल कि महत्वपूर्ण जुइ । आः धाथें अबुपिंसं थज्याःगु आरोपय् फसे जुइमालीगु खःसा मचा दयेकेत झिकः विचाः यायेमालीगु खँ जुइ । मचा दयेके । कायम्ह्याय्या अबु जुइ । सुखी परिवार दयेके धयां छु याये छखे मचा दयेकी, मेखे ‘जिमि इच्छा मदयेक छाय् बुइका ?’ धकाः कायम्ह्याय्चं नालिस तयाबिल कि अदालतंं अदालत जुइमाली ।

मुद्दा ल्वा ल्वां हे गाइमखु । सन्तानपाखें सुख काये धात्तलें द्यवं मबिउगु दुःखय् फसे जुइ । हाकनं अदालतं गज्याःगु न्याय बीगु खः ?! अदालत नं व हे कलियुगया अदालतया ला खः नि । छु भाः वया ? बडो न्याय बिया थें यानाः जन्म कैद बीगु जकं खःला ? कायम्ह्याय् दयेके ! जोशय् होस मदयेकां छु याये ? म्वाःम्वाकं सीमालीगु दण्ड फयेमाली ।

कायं नालिस तयेका च्वनेमाःम्ह अबुया हालत छु जुयाच्वन जुइ ?! थज्याःगु संकट फये मालीगु जूसा आः निःसन्तान जुइगु हे भिं जुइ । कायम्ह्याय्पिनि ‘छाय् बुइका’या सम्भावित नालिसपाखें मुक्त जुइ ।

क्या फसाद ! आः स्वरे ! मचा दुम्ह मय्जु ब्याहा यायेगु खःसा ला खः का ! ब्याहा याये न्ह्यः हे मचा याके न्यने ‘छिमि मांलिसे ब्याहा यायेत्यना, छ जिमि मचा जुइ न्ह्याः ला कि म्हां ?’ अनुमति बिउ । थनथाय् लाक्क मचाया स्वइच्छा कयाः न्ह्यसुकाय, न्ह्यसुम्ह्याय् दयेके सम्भव जुइ ।

आः शुक्रकीटया रुपय् च्वंम्ह किटाणुयाके ‘छ बुइ न्ह्याः ला, म्हांला छंगु इच्छा छु ? धकाः न्यनेकने यानाः च्वनेगु गथे सम्भव जुइ ?! व्यावहारिक ज्या मखु । थज्याःगु असम्भव खँया दोष फयेमाल कि अबुपिनि जीवन तसकं हे कष्टपूर्ण जुइ । संकटय् लाइ । अथे धयां छु याये ?! ‘जिगु इच्छा विपरित जितः छाय् बुइका’ धकाः कायं नालिस तयेका च्वनेमाःम्ह अबुया हालत छु जुयाच्वन जुइ ?!

थज्याःगु संकट फये मालीगु जूसा आः निःसन्तान जुइगु हे भिं जुइ । कायम्ह्याय्पिनि ‘छाय् बुइका’या सम्भावित नालिसपाखें मुक्त जुइ ।
थौंकन्हय् कायम्ह्याय्पिनि ब्याहा यानाः जक गन मन याउँके फइ । मत्ती वइ म्ह्याय्यात बियाछ्वये । थःगु कर्तव्य पूवंके । मन आनन्द जुइ । थौंकन्हय् अथे मखु । ब्याहा यानाः दछि दइमखु, सम्बन्ध विच्छेदया खँ वइ ।

‘का फलाना मिसां ब्याहा यानाः दछि मदुनिबलय् हे मिजं त्वःतल’ ‘फलाना मय्जु ब्याहा यानाः लछि मदुनिबलय् भाःतयाथाय् मवं ।’ थज्याःगु वैवाहिक खटपटया समस्या थौंकन्हय् अप्वया च्वनी । मचाखाचाया ब्याहा सिधल धकाः मांअबुया मन धुक्क तये दइगु ई मखयेधुंकल । गज्याःगु कलियुग ! मांअबुया नुगः न्ह्याबलें खाका च्वनेमाः ।

मांअबुया इच्छा जुइ । म्ह्याय्या दाम्पत्य जीवन सुखमय जुइमा । छुं अप्रिय घटना मजुइमा । बांलाक सुथां लाक्क न्ह्याः वनेमा । तर मांअबुं नं चितय् यानां जक जिउगु मखु । थौंकन्हय् न्हापा थें कायम्ह्याय्पिंत मांअबुं स्वयाः ब्याहा याना बीगु मखु । न्हापा कायम्ह्याय्यात ब्याहा यायेत जातःया भर काइ । तर थौंकन्हय् अथे मखु ।

अप्वःसिनं यःत्यः यानाः ब्याहा याइ । ब्याहा याये न्ह्यः हे नापं च्वनी । हनी । सनी । प्रेम विवाहया जमाना थौं । तर प्रेम विवाह । न्यनेबलय् न्ह्यइपुसे च्वं । प्रेम विवाहय् प्रेमया प्रेम जक दइ । छुं असमझदारी दइमखु । अनुमान जुइ । विश्वास दइ । तर आधुनिक प्रेम विवाह याइपिनि दथुइ थौंकन्हय् सम्बन्ध विच्छेदया ल्याः अप्वयाच्वन धइगु तथ्यांक पिहां वयाच्वंगु दु ।

प्रेम विवाह याइपिनि दाम्पत्य जीवन झन मजबूत जुइ । विश्वास जुइ । तर ग्व ! थौंकन्हय्या प्रेम नं विकासे प्रेम खःला मसिउ । स्वयेबलय् झःझः धाइ । हृष्टपुष्ट खने दइ । तर दुनें दुनें फुस्कुलु । थौंकन्हय् सम्बन्ध विच्छेदय् नं गाक्कं आपालं ध्यबाया कालबिलया विषय जुइ । करोडौं तका दां स्वहायेकेगु वि चाः यानाः जाली प्रेम विवाह याइपिं नं दु ।

ब्यापक हल्ला जुइ । प्रेम विवाह नं थौंकन्हय् जोखिमपूर्ण जुया वल । छम्ह मय्जुं ला मिजंया लि· हे चीहाकः धकाः अदालतय् नालिस तयाः सम्बन्ध विच्छेद फ्वन । ल्वापु यायेत अनेक त्वह दयेकी थौं । नालिस, नालिस, नालिस । थौंया जीवनय् ब्याहा याःसां नालिस, मचा दयेकी नालिस, थौंया नियति । विडम्बना !

सम्बन्धित बुखँ

LEAVE YOUR COMMENTS