पेप्सीकोलाया ज्यामित आन्दोलनय्
येँ – पेप्सीकोलाया उत्पादक कम्पनी वरुण वभेरिज प्रा.लि (पेप्सी) कम्पनीइ ज्यामित आन्दोलनय् कुहां वयेवं कम्पनीं नेपाली ज्यामित चिइकाः भारतीय ज्यामियात नियुक्त याःगु दु । कम्पनीया नेपाली ज्यामितय्सं वंगु न्याला न्ह्यवनिसें शान्तिपूर्ण आन्दोलन याना वयाच्वंगु खःसा आः थःपिनि माग पूमवनेवं चरणबद्ध आन्दोलन सुरु याःगु दु ।
आन्दोलनय् वनाच्वंपिं ज्यामितपाखेंया सामूहिक सौदाबाजी समितिया संयोजक रमेश गौतमं आन्दोलनरत ज्यामितय् माग सुनुवाई मयासें अःखःबतं कम्पनीं ५० म्ह नेपाली ज्यामितय्त निष्काशन याःगु खँ धयादीगु दु । पेप्सी कम्पनीं थौंकन्हय् ५२० म्ह ज्यामि व कर्मचारी दु । निष्काशित याःपिं कर्मचारीतय् थासय् आः भारतीय ज्यामित हयाः ज्या याकाच्वंगु खँ धाःगु दु ।
कम्पनीया व्यवस्थापन तःक्वः तक हे ज्यामितलिसे सहमति याःसां निर्णय धाःसा कार्यान्वयन मयाःगुलिं असोज १४ गते तकया अल्टिमेटम बियाः चरणवद्ध आन्दोलन याना वयाच्वंगु खः । सौदाबाजी समूहया संयोजक गौतमं निदँ न्ह्यवनिसें थन ज्या यानाच्वंपिं ज्यामितय्त सप्लायर कम्पनीपाखें दैनिक ज्यालादारीइ ज्या याका वयाच्वंगुलिं थःपिंसं रोजगार सम्झौता यानाः नियुक्तीपत्र बियाः जक ज्याय् तयेत माग याना वयाच्वनागु खँ धयादीगु दु ।
ज्यामित भर्ना याःबलय् स्थानीयवासीयात ग्राह्यता मबिउगु खँ नं वय्कलं धयादीगु दु । वय्कलं आः निष्काशन याःपिं ज्यामितय्त तुरुन्त पुनर्बहाली यायेमाःगु, श्रम ऐनं तोके यानातःकथं पारिश्रमिक बीमाःगु, कम्पनीं तप्यंक नियुक्ती यायेमाःगु, बिनाकारण निष्काशन यायेमफइगु, ठेकेदारी प्रथा अन्त्य यायेमाःगु माग थःपिनिगु दुगु खँ धयादीगु दु ।
पेप्सी कम्पनीया व्यवस्थापन पक्षं श्रमिकतय् माग सम्बोधन यायेगु खँय् आलताल याना वयाच्वंगुलिं इलय् ब्यलय् राजनीतिक दल, सांसद, जिल्ला प्रशासन कार्यालय, उद्योग वाणिज्य संघया पहलय् माग कार्यान्वयन याकेगु निंतिं ज्यामित व कम्पनी दथुइ सहमति जुया वयाच्वंगु दु ।
अथे खःसां कम्पनीं धाःसा थ्व सहमतियात कार्यान्वयन मयाःगुलिं आन्दोलनय् थःपिनिगु समर्थन दुगु खँ नेपाल कम्युनिष्ठ पार्टीया स्थानीय नेता बुद्धन अलीं धयादीगु दु ।
नेपाली कांग्रेसया जिल्ला सचिव विक्रम यादवं नं आन्दोलनय् थःपिनिगु समर्थन दुगु खँ धासें असोज १४ गते परासीइ विरोध प्रदर्शन यानाः जिल्ला प्रशासन कार्यालयय् ज्ञापनपत्र बीगु व थुकी सुनुवाई मजुल धाःसा असोज १७ गते निसें कम्पनीइ अनिश्चितकालिन तालाबन्दी यानाबीगु खँ धयादीगु दु ।
LEAVE YOUR COMMENTS