ने. सं. ११४४ ञलाथ्व दशमी -

अनलाइन क्लासं यानाः बजारय् ल्यापटप अभाव

येँ (नेपालभाषा टाइम्स) – फुक्क स्कूलतय्सं विद्यार्थीतय्त अनलाइन कक्षा कायेगु शुरु याना हयेवं बजारय् ल्यापटपया अभाव शुरु जूगु दु। चिचीधिकःपिं मस्तय्त तकं अनलाइनमार्फत कक्षा कायेगु शुरु जुइवं बजारय् ल्यापटप तकं न्यायेगु मदयावंगु खः ।

कम्प्युटर पसल्यातय्सं धाःकथं थौंकन्हय् ल्यापटपया तःधंगु माग जुयाच्वंगु दु। तर मागकथं पूर्ति धाःसा याये फयाच्वंगु मदुनि । कोरोनाया कारणं
विश्वन्यंकं यातायात बन्द जुयाच्वंगुलिं पिनें सामान दुहां वयेगु बन्द जुयाच्वंगु दु। थुकिं यानाः बजारय् न्हूगु ल्यापटप वयाच्वंगु मदु। न्हूगु सामान मदुगुलिं बजारय् ल्यापटपया माग दुसां आपूर्ति धाःसा जुयाच्वंगु मदु ।

येँया पाको, दरवारमार्ग आदि थेंज्याःगु बजारय् थौंकन्हय् न्हूगु मोडेलया ल्यापटप न्यायेगु मदया वनाच्वंगु दु। न्हूगु ल्यापटप मवःगु जुयाः बजारय् पुलांगु स्टकय् लानाच्वंगु ल्यापटप समेत मीगु ज्या जुयाच्वंगु खँ कम्प्युटर पसल्यातय्सं धाःगु दु। ‘मोडल पुलां जुयाः लित छ्वयेत ठिक्क याना तयागु ल्यापटप तकं आः मियाच्वनागु दु’ पाकोया छम्ह कम्प्युटर पसल्यां ‘नेपालभाषा टाइम्स’ यात कनादिल ।

माग यक्व वःगु जुयाः बजारय् न्हूगु मोडलया ल्यापटक थिकय्क मीगु ज्या तकं जुयाच्वंगु खँ नं वय्कलं कनादिल । ‘पुलांगु मोडेल ला तये मलाः, न्हूगुया भाः सुनां क्वकाइ ?’ वय्कलं धयादिल ।

स्कूल ब्वनीपिं मस्तय्त ल्यापटप अनिवार्य थें जूगुलिं निम्न आय दुपिं अभिभावकतय्त धाःसा थाकुयाच्वंगु सीदुगु दु। न्हूगु ल्यापटप न्याये मफुपिं
अभिभावकतय्सं पुलांगु ‘सेकेण्ड ह्याण्ड’ ल्यापटप तकं न्यानाः ज्या चले यानाच्वंगु दु ।

ल्यापटप न्याये मफुपिं निम्न आय अभिभावकतय्सं थः मस्तय्त मोबाइल फोन ज्वंकाः जूसां ब्वंकेगु ज्या यानाच्वंगु नं लूगु दु ।