ने. सं. ११४३ चौलाथ्व तृतीया -

येँया पुलांगु विद्यालयया योगदान

येँ – नेपालय् शिक्षा जागरणया जग तयेत वि.सं. २००७ या क्रान्ति लिपा स्थापना याःगु येँया पुलांगु विद्यालयया महत्वपूर्ण योगदान दयाच्वंगु दु । मोहनि, स्वन्ति, नेपाल संवत् न्हूदँ व छठ पर्वया लसताय् थनया थँहितिइ च्वंगु शान्ति शिक्षा मन्दिरय् ग्वसाः ग्वःगु भिंतुना कालबिल ज्याझ्वलय् नवानादीपिं वक्तातय्सं येँया पुलांगु विद्यालयया योगदानया स्मरण यानादीगु खः ।

अज्याःगु विद्यालय संरक्षण यायेत सरकार, अभिभावक व दक्वं पक्षया अग्रणी भूमिका दयेमाःगु खँय् वक्तातय्सं बः बिउगु दु । पुलांगु स्थापित विद्यालयमध्ये शान्ति शिक्षा मन्दिर माध्यमिक विद्यालय, परोपकार माध्यमिक विद्यालय, नेपाल आदर्श माध्यमिक विद्यालय, कान्ति ईश्वरी माध्यमिक विद्यालय, विश्व निकेतन माध्यमिक विद्यालय, भानु माध्यमिक विद्यालय आदि उगु ईया नांजाःगु विद्यालयय् लाः ।

विश्व निकेतन व परोपकार आदर्श मा.वि. थेंज्याःगु सरकारी विद्यालयं तःक्वः तःक्वः हे उत्कृष्ट लिच्वः हयेगु यानाच्वंगु खःसा मेमेगु विद्यालय नं उतिकं प्रसिद्ध जू । स्वनिगलय् निजी विद्यालय दुहां वयेवं सरकारी विद्यालय ध्याकुनय् लाःगु खनेदुसां विश्व निकेतन मा.विं. तःक्वः तःक्वः हे राष्ट्रिय ध्वाँय् प्राप्त यायेत सफल जूगु दुसा परोपकार आर्दश विद्यालय नं उत्कृष्ट नमूना विद्यालयय् लाः ।

वि.सं. २००७ सालय् स्थापना जूगु शान्ति शिक्षा मन्दिर मा.वि.इ थुगुसी थप स्वसःम्ह विद्यार्थी न्हूपिं भर्ना यायेत सफल जूगु विद्यालयया प्रधानाध्यापक सुदामप्रसाद गौतमं जानकारी बियादिल । २०७२ सालया भुखाचं प्रभावित उगु विद्यालयया भवन निर्माणया निंतिं इजरायली राजदूतावास, एशियाली विकास बैंक, स्थानीय १७ वडा ज्याकू, उगु क्षेत्रया प्रतिनिधिसभा सदस्य रामवीर माअनन्धर लगायत आपालं संघसंस्थां ग्वाहालि याना वयाच्वंगु दु ।

विद्यालयया निंतिं झिंन्यागू लाख बजेट विनियोजन यायेत भूमिका म्हितादीगु धासें सांसद मानन्धरयात विशेष सम्मान नं याःगु खः । नेपालय् थौंकन्हय् ८० प्रतिशत स्वयां अप्वः विद्यार्थी सार्वजनिक विद्यालयय् अध्ययन याना वयाच्वंगु दुसा २० प्रतिशत विद्यार्थी निजी ख्यःया विद्यालयय् ब्वनाच्वंगु दु ।

सांसद मानन्धरं नेपालय् गणतन्त्र हयेत द्वलंद्वः मनुखं सहादत प्राप्त याःगु व अझं लखौं मनू छेँ मदयेकाः च्वनेमाःगु अवस्था दुगु धासें इमिगु म्हगस पूवंकेत गुणस्तरीय शिक्षाया माध्यमं जागरण हयाः देय्यात आर्थिक विकासया लँपुइ यंकेमाःगु खँय् बः बियादिल । प्रदेश नं. ३ या प्रदेशसभा सदस्य वसन्त मानन्धरं विद्यालययात ग्वाहालि याःगु थीथी संघसंस्था व व्यक्तियात प्रशंसापत्र लःल्हानादिसें सामुदायिक विद्यालयपाखें उत्पादन जूगु जनशक्तिं नं देय्या थीथी ख्यलय् योगदान यानाच्वंगु कनादिल ।

नेपाःया निंतिं इजरायली राजदूत बेनी ओमारं गुणस्तरीय शिक्षाया निंतिं लगानी यायेगु देय्या विकासया निंतिं अतिकं महत्वपूर्ण जूगु खँ न्ह्यथँसें इजरायलं शिक्षाया क्षेत्रय् यानाच्वंगु उपलब्धिया अनुभव नेपाः थेंज्याःगु देय्या निंतिं नं उपयोगी जुइगु विचाः प्वंकादिल ।
विद्यालय व्यवस्थापन समितिया अध्यक्ष लक्ष्मीदास मानन्धरं शान्ति शिक्षा मन्दिर माध्यमिक विद्यालयं स्थापनाकालनिसें हे देय्या शिक्षाया ख्यलय् म्हिता वयाच्वंगु भूमिका धाथें हे च्वछायेबहजू धयादिल ।

ज्याझ्वलय् विद्यालयया निंतिं ग्वाहालि यानादीम्ह प्रतिनिसभाया सांसद रामवीर मानन्धर, प्रदेशसभा सदस्य वसन्त मानन्धर, राष्ट्रिय समाचार समिति (रासस)या महाप्रबन्ध ओपेन्द्र शर्मा, साल्ट ट्रेडिङ कर्पोरेसनया महाप्रबन्ध उर्मिला श्रेष्ठ, विद्यालय व्यवस्थापन समितिया अध्यक्ष लक्ष्मीदास मानन्धर, विद्यालयया प्रधानाध्यापक सुदामप्रसाद गौतम, नेपाःया निंतिं इजरायली राजदूत बेनी ओमार लगायतया विशिष्ट व्यक्तित्वया नं प्रशंसा याःगु खः ।