सरकारय् माधवयात अप्वः सित

येँ- सत्ता गठबन्धनया शीर्ष नेतातय्गु बैठक लिपा सम्भवतः थौं मन्त्रिपरिषद् विस्तार याइगु खँ धाःगु दु । म्हिगः प्रधानमन्त्री शेरबहादुर देउवां मन्त्रिपरिषद् विस्तारया नितिं नेकपा माओवादीया अध्यक्ष पुष्पकमल दाहाल व नेकपा (ए–स) या अध्यक्ष माधव नेपाललिसे सहलह यानादीगु खः ।

म्हिगः गठबन्धन दलया स्वम्ह अध्यक्षया दथुइ निघौ तक मन्त्रिपरिषद विस्तार बारे सहलह जूगु खः । बैठकय् सरकार सञ्चालनया विषययात कयाः नं सहलह जूगु खः । थ्व स्वयां न्ह्यः गठबन्धन दथुइ सरकार सञ्चालन सम्बन्धी स्वंगू बुँदे आचार संहिता दयेकाः न्ह्याः वनेगु सहमति जुइधुंकूगु खः।

देउवायात विश्वासया मत बिउगु नेपाल नेतृत्वया नेकपा ए–स व महन्थ ठाकुर नेतृत्वया लोकतान्त्रिक समाजवादी पार्टीया दर्ता प्रक्रिया क्वचायेवं मन्त्रिपरिषद्यात पूर्णता बीगु खँ जुयाच्वंगु खः । प्रधानमन्त्री शेर देउवा असार २९ गते प्रधानमन्त्री जुयादीगु खःसा माधव नेपालया पार्टी दर्ता सम्बन्धी ज्या क्वमचाःगुलिं मन्त्रिपरिषद विस्तार मयासे तयातःगु खः । प्रम देउवां थःत विश्वासया मत बिउगु दलयात नं सरकारं दुथ्याकेगु योजना कथं मन्त्रिपरिषद विस्तार मयासे च्वनाच्वंगु खः ।

देउवाया सरकार दयेकेगु ज्याय् थःगु पार्टी दुने विद्रोह यानाः जूसां विशेष भूमिका म्हितादीम्ह वरिष्ठ नेता माधव नेपालयात सत्ता गठबन्धनं सम्मानपूर्ण थाय् बीगु लागिं मन्त्रिमण्डलय् छगू निगू अप्वः मन्त्रालय बीगु सोच दयेकाच्वंगु खँ धाःगु दु । उकिया लागिं आवश्यक जुल धाःसा कांग्रेस व माओवादी केन्द्रं थःगु भागय् लाःगु छगू छगू मन्त्रालय त्वःतेमाःसां त्वःतेगु धकाः सहमति दयेकूगु खँ नं सीदुगु दु । लिसें नेपालयात वय्कःयात यःगु मन्त्रालय ल्ययादिसँ धकाः ‘ओपन’ त्वःता बिउगु खँ नं धाःगु दु ।

पार्टीयात मान्यता प्राप्त जुइवं नेकपा ए–स संसदीय दलया नेता कथं माधव नेपालयात हे ल्यःगु दुसा सरकारय् वनीपिं मन्त्रीत ल्ययेगु जिम्मा नं पार्टीपाखें आः नेता नेपालयात हे बिउगु दु ।