फेसबुक जक चले यानाः द्वलंद्वःयात छात्रवृत्ति

येँ – सामाजिक सञ्जाल फेसबुकय् छगू नारा दु ‘सकसियां निंतिं गुणस्तरीय शिक्षा’ । थुकिया आज्जु खः गां गामय् च्वंपिं मस्तय्त गुणस्तरीय शिक्षा बीगु जक मखु उमित स्कुल तक थ्यंकेगु । उकिया अभियन्ता खः येँया कोटेश्वरय् च्वंम्ह मय्जु पुनम खड्गी । फेसबुकपाखें ग्वाहालि कयाः न्ह्याकूगु थुगु अभियानं २००० म्ह मस्तय्त छात्रवृत्ति व ३०० म्ह मस्तय्त पूर्ण छात्रवृत्ति चूलाकूगु दु । शुरुइ न्यागू जिल्लाय् अभियान न्ह्याकेगु ग्वसाः दुगु खःसां थाकुइगु थें च्वनाः स्वनिगः लिक्क लाःगु जिल्लाय् निं अभियान न्ह्याकेगु ग्वसाः दयेकाः काभ्रेया भुमेस्थान प्राथमिक विद्यालय व धादिङया श्री जनता प्राथमिक विद्यालयया विद्यार्थीपिंत छात्रवृत्ति इनेगु ज्या न्ह्याकागु खँ् वय्कलं कनादी ।

तःभुखाय् लिपा वय्कलं थ्वहे फेसबुक अभियान मार्फत भुखाचं क्षति जूगु स्कूल दयेकेगु लागिं दां मुंकेत समेत ताःलाकूगु खः । ०६६ सालय् एसएलसी क्वचायेकाः २०६७ सालय् पिस फर पिपुल नांगु संस्थाय् आवद्ध पुनमं ‘प्रेरक छात्रवृत्ति’ धकाः शुरुइ फेसबुक मार्फत अभियान न्ह्याकूगु खः । शुरुइ उगु अभियानयात मनूतय्सं विश्वास मयाःगु खः । नकतिनि एसएलसी क्वचायेकूम्ह मचा गुकथं थ्व अभियान न्ह्याके फइ धाइगु । गुलिस्यां ला थ्व अभियान धइगु ध्यबा कमे यायेगु त्वह जक खः धकाः नं द्वपं बिल । वय्कः आः उगु संस्थाया डाइरेक्टर जुयादी ।

वय्कःयात ग्वाहालि याइपिं आपाः धइथें विदेशय् च्वनाच्वंपिं नेपाःमि जूगु खँ कनादिसें थुगु अभियानं थः सन्तुष्ट जूगु धयादी । वय्कलं उगु निगुलिं स्कुलय् छात्रवृत्ति लिसें ड्रेस, कापी, कलम, किताब, ब्याग लगायतया ज्वलं इनेगु यानाच्वंगु दु । लिसें गुणस्तर शिक्षाया निंतिं स्कुलया शिक्षक शिक्षिकापिंत तालिम नं बीगु यानाच्वंगु दु गुकिं यानाः अन मस्तय्त ब्वनेगु लकस ब्वलनाच्वंगु दु ।

वय्कलं धयादी, ‘न्हापा मस्तय्सं छुं द्वंकल धाःसा सजाय बीगु खः गुकिं यानाः मस्तय्सं आखः ब्वनेगु हे त्वःता बी । तर आः तालिमं यानाः शिक्षकतय्सं मस्तय्त न्ह्याइपुगु वातावरणय् ब्वंकाच्वंगु दुसा मस्त नं म्हिताः म्हिताः ब्वनेगु यानाच्वंगु दु ।’थगुने ६५ म्हेसित छात्रवृत्ति बिउगु खःसा थुगुसी सछिम्हेसित छात्रवृत्ति बीगु वय्कःया योजना दु । थौंकन्हय् उकिया लागिं मनूतय्त स्वापू तयेगु ज्याय् वय्कः व्यस्त जुयाच्वनादीगु दु ।

सम्बन्धित बुखँ

LEAVE YOUR COMMENTS