ने. सं. ११४४ कछलागा सप्तमी -

अनिश्चितताय् लानाच्वंगु राजनीति

प्रधानमन्त्री केपी शर्मा ओलीं वंगु पुस ५ गते भंग याःगु संघीय संसदया प्रतिनिधिसभा सर्वोच्च अदालतं पुनस्र्थापना यायेधुंकाः आः नेपाःया राजनीति गुकथं न्ह्याःवनी धइगु न्ह्यसः आम जनताया दथुइ ब्वलनाच्वंगु दु। संसद पुनस्र्थापना लिपा राजनीतिक पार्टी दथुइ थीथी कथंया गठबन्धनया निंतिं सहलह जुयाच्वंगु जक मखु विशेष यानाः नेकपाया निगू गुटया सांसदपिंत नं थःपाखे सालेगु ज्या शुरु जुयाच्वंगु दु। नेकपाया सत्तारुढ जुयाच्वंगु छगू पुचलं मेगु पुचःया सांसदपिंत थःगु पक्षय् सालेत मेगु हे छगू पुचः हे सक्रिय यानातःगु जक मखु। सांसदपिंत थःगु पक्षय् वल धाःसा आर्थिक प्रलोभन क्यनेगुनिसें मन्त्री पद तकं बीफइगु आश्वासन बियाच्वंगु खँ सार्वजनिक जूगु दु ।

उकथं हे नेकपाया मेगु पक्ष प्रचण्ड-नेपाल पुचलं नं सांसदपिंत थःगु पक्षय् हयेगु निंतिं कुतः यानाच्वंगु दु। निगुलिं पक्षं सांसदपिंत थःगु पक्षय् हयेगु निंतिं यानाच्वंगु कुतःया दथुइ नेपाःया राजनीतिइ आः हाकनं छक्वः सांसदत न्याये-मीगु ज्या जुयाः न्हापा थें संसदय् विकृति जकं वइगु मखुला धइगु न्ह्यसः नं ब्वलनाच्वंगु दु। विशेषतः नेकपाया सत्तारुढ पक्षं आर्थिक नापं मन्त्री पद नं बीगु आश्वासनया शुरुवात यायेधुंकूगु दुसा मेगु पक्षं वर्तमान इलय् राजनीतिइ नैतिकताया आधार कयाः सांसदत थःगु पक्षय् वयेमाःगु खँ धायेगु यानाच्वंगु दु ।

थ्व निगू पुचःया दथुइ जुयाच्वंगु सांसद सालेगु ज्याय् गुगु पक्ष सफल जुइ नेपाःया राजनीतिक भविष्य नं उकिं हे निर्धारण याइ । वर्तमान नेपाःया राजनीतिया केन्द्र जुयाच्वंम्ह प्रधानमन्त्री केपी शर्मा ओलीं थःगु पद ल्यंका तयेत न्ह्याग्गु कथंया भूमिका म्हिते फुगु सम्भावना दु। तर प्रधानमन्त्रीं न्ह्याकाच्वंगु गुगु प्रतिगमनया लँपु दु उकी वनेगु वा मवनेगु धइगु मू न्ह्यसः नेकपाया सांसदपिनि न्ह्यःने नं दनाच्वंगु दु। खः, राजनीतिया मूल्य मान्यता धइगु नैतिकता खः । तर थ्व नैतिकता नेकपाया सांसदपिंसं क्यनी कि क्यनी मखु धइगु खँ संसद न्ह्यायेवं तिनि सीदइगु जुल । सांसदतय्सं थःत नैतिकताया कसी गुलि तक लनी धइगु खँ हे आःया इलय् आम जनताया दथुइ ब्वलनाच्वंगु न्ह्यसः खः ।

प्रधानमन्त्रीं न्ह्याकाच्वंगु गुगु प्रतिगमनया लँपु दु उकी वनेगु वा मवनेगु धइगु मू न्ह्यसः नेकपाया सांसदपिनि न्ह्यःने नं दनाच्वंगु दु । खः, राजनीतिया मूल्य मान्यता धइगु नैतिकता खः । तर थ्व नैतिकता नेकपाया सांसदपिंसं क्यनी कि क्यनी मखु धइगु खँ संसद न्ह्यायेवं तिनि सीदइगु जुल ।

नेकपा दुने सांसदत थःथःगु पक्षय् सालेगु ज्यालिसें नेकपा पार्टीया भविष्य नं निर्धारण जुइ । नेकपा छप्पँछधी जुयाच्वनी वा ब्यागलं ब्यागलं पार्टी कथं न्ह्याःवनी । प्रधानमन्त्री केपी ओलीं थः अःपुक बर्हिगमन मजुइगु खँ स्पष्ट रुपं धायेगु यानाच्वंगु दुसा मेखे प्रचण्ड-माधव पुचलं आः गुगुं नं हालतय् प्रम ओलीलिसे नापं न्ह्याःवने फइमखु धकाः धायेगु यानाच्वंगु दु। छगूकथं निगू पुचलं यानाच्वंगु थुगु गतिविधियात कयाः स्वयेगु खःसा पार्टी कानूनी रुपं विभाजित मजूसां राजनीतिक निगू पुचलय् स्पष्ट रुपं विभाजन जुइधुंकूगु दु ।

नेकपाया विभाजनया दथुइ देय्यात गुगु लँपुइ यंकेगु धइगु खँय् निर्णायक भूमिका म्हितीगु पार्टी नेपाली कांग्रेसं आतक नं नेकपाया निगू पुचःमध्ये गुगु पक्ष बल्लाः धकाः स्वयेगु ज्या जक यानाच्वंगु दु। थ्व धइगु कांग्रेसं आः थःपिंत गुगु पक्षय् यंकीगु खः उकिं हे देय्या राजनीतिक भविष्य निर्धारण याइ । तर कांग्रेसं आतक गुगुं कथंया निर्णय मयाःगुलिं यानाः छगू कथं देय् अन्यौलय् लानाच्वंगु दु। खय्तला नेकपाया निगुलिं पक्षं कांग्रेसयात
सरकार दयेकेत इनाप यायेधुंकूगु दु। तर नेकपा कानूनी रुपं विभाजन मजूगु कारण क्यनाः कांग्रेसं थःपिनिगु निर्णय याये फयाच्वंगु मदुसा मेखे कांग्रेस दुने नं सरकार वनेगु वा मवनेगु धइगु खँय् छगू मत जुइ फयाच्वंगु मदु ।

खय्तला कांग्रेस सभापति शेरबहादुर देउवा वर्तमान प्रधानमन्त्री केपी शर्मालिसे सतिनाच्वंगु दु। सभापतिया थ्व पलाःयात कयाः कांग्रेस दुने नं विवाद दु। आपालं धयाथें कांग्रेस नेतातय्सं प्रधानमन्त्री ओलीलिसे गठबन्धन याये मजिउ धकाः धयाच्वंगु दु। तर देउवां जिउसा ओलीनाप हे गठबन्धन यायेत स्वयाच्वंगु अवस्था दु। ओलीलिसेया गठबन्धनं पार्टीयात फाइदा वा बेफाइदा छु जुइ धइगु जक लेखाजोखा जुयाच्वंगु दु। देय्यात फाइदा जुइ वा मजुइ धइगु बारे खास हे चिउताः तयाच्वंगु मदु। राजनीतिक पार्टी जूगुलिं राजनीतिक लाभ घाटा स्वइगु स्वाभाविक खः । खः देय्या हित स्वयां नं राजनीतिक लाभ घाटा जुइफइगुपाखे कांग्रेसया ध्यान वनेमाःगु दु। यदि देय्या राजनीति हे मेगु लँपुइ न्ह्याःवन धाःसा गज्याःगु दुर्दशा फयेमाली धइगु खँ आः नं यच्चुक सी दयाच्वंगु दु ।

प्रम ओलीं प्रतिगमनया पलाः ल्ह्वंगु खःसां सर्वोच्चं उकियात भिंकेगु ज्या यायेधुंकल । आः कांग्रेसया न्ह्यःने दनाच्वंगु न्ह्यसः थ्व दु कि, प्रतिगमनया पलाः ल्ह्वंम्हेसित तिबः बियाः हाकनं देय्यात मेगु प्रतिगमनया लँपुइ छ्वयेगु वा ओलीयात हाकुतिनाः देय्यात अग्रगमनया लँपुइ यंकेगु ? संविधानसभां जारी याःगु आःया संविधानय् आपालं कमीकमजोरी दनि धकाः थीथी कथंया आन्दोलन न्ह्यानाच्वंगु दनि । अज्याःगु आन्दोलन निरन्तर रुपं न्ह्याइगु खँ नागरिक समाजं धायेगु यानाच्वंगु दु। प्रम ओलीं ल्ह्वंगु प्रतिगमन पलाः विरुद्ध सतकय् कुहां वःपिं नागरिक समाजया अभियन्तापिंसं सर्वोच्चं संसद पुनस्र्थापना याःसां थःपिंसं ल्ह्वनागु मुद्दायात राजनीतिक पार्टीतय्सं संबोधन याइ मखु धइगु आशंका यासें निरन्तर आन्दोलन यायेगु धकाः धायेधुंकूगु वर्तमान अवस्थाय् ओलीलिसे गठबन्धन यायेगु गुलि तक जायज जुइ धइगु नं न्ह्यसः ब्वलनाच्वंगु दु ।

थौंया राजनीतिक अवस्थाय् निर्णायक भूमिका कांग्रेसया खः । अझ प्रमुख प्रतिपक्ष जुयाच्वंगु इलय् जनतापाखें तापानाच्वंगु पार्टी आः जनताया दथुइ थःगु उपस्थिति क्यनेगु निंतिं नं राजनीतिक रुपं स्पष्ट जुयाः न्ह्यःने वयेमाःगु आवश्यकता जुयाच्वंगु दु। यदि थ्व इलय् नं नेपाली कांग्रेसं राजनीतियात ट्राय्कय् हयेगु कुतः मयात धाःसा सायद नेपाली कांग्रेसया भविष्य छु जुइ धायेफइगु अवस्था मदु। कांग्रेस सरकारय् वनेगु वा मवनेगु प्रमुख खँ मखु, देय्या राजनीतियात खःगु लँपुइ यंकेगु दायित्व आः कांग्रेसया जुयाच्वंगु दु। थ्व खँयात यदि कांग्रेसं इलय् मनन यायेमफुत धाःसा उकिया घाटा स्वयम् कांग्रेसयात हे जुइ ।