१३ वडाय् घरबाटोया विवाद

येँ (नेपालभाषा टाइम्स)- येँ मनपा वडा नं. १३ पाखें वडा अध्यक्ष ध्रुवनारायण मानन्धरं म्हिगः छगू वक्तव्य पिकासें घरबाटो सम्बन्धी छगू विवादय् असम्बन्धित मनूतय्सं न्हिंन्हिं वडा कार्यालयय् वयाः वडाया ज्याय् पंगः थं वयाच्वंगु खँ धयादीगु दु ।

१३ वडा दुने लाःगु छगू जग्गा राष्ट्रिय वाणिज्य बैंकपाखें लिलाम यानाः मीधुंकाः उकियात माःगु घरबाटो बीगु सवालय् विवाद पिहां वःगु खः । १३ वडा कार्यालयपाखें घरबाटो मबिउ धकाः थ्व विवाद पिहां वःगु खः ।

१३ वडाया अध्यक्ष मानन्धरं कनादीकथं १३ वडा दुने लाःगु छेँबुँ लिलाम जुइबलय् वडाया प्रतिनिधि समेत तयेमाःगु खः । तर थ्व मुद्दाय् २४ वडाय् च्वनाः बैंकं गोप्य रुपं जग्गा लिलाम याना छ्वःगु खनेदु । लिलाम बारे वडायात छुं जानकारी तकं मबिउ । थज्याःगु मामिलाय् घरबाटो बीगु गैरकानुनी जुइगु खने दुगुलिं वडापाखें घरबाटो मबिउगु खँ वय्कलं कनादीगु दु ।

थःथःपिं जक च्वनाः याःगु उगु लिलामय् जग्गा न्याना काःम्ह गौतमराज खड्का नांयाःम्ह मनुखं दंक जग्गा न्याना कायेगु लागिं अथे थःथः जक च्वनाः लिलामया ज्या क्वचायेकूगु खनेदु धाःगु दु ।

थ्व केशयात कयाः छानबिन यायेमाः धकाः १३ वडा कार्यालयपाखें अख्तियार दुरुपयोग अनुसन्धान आयोग व राष्ट्रिय सतर्कता केन्द्रयात नापं इनाप याना छ्वयेधुंकूगु दु । उकिं वडाध्यक्ष मानन्धरं उगु निकायपाखें गज्याःगु निर्देशन वइ वहे यायेगु जुइ धयादीगु दु ।

जग्गा न्याना काःपिं मनूतय्सं धाःसा वडा अध्यक्ष मानन्धरं २ करोड दां माग याःगु व उगु ध्यबा मबिल धकाः घरबाटो मबिउगु खः धासें पोष्टर हे तिकाः प्रचार यानाच्वंगु दु । वडा अध्यक्ष मानन्धरं थ्व मुद्दायात थःपिंसं हे अख्तियारय् उजुरी तयेधुनागु जूगुलिं अनया फैसला पीत इनाप यानादीगु दु । वय्कलं लिलामय् सहभागी बैंक व जग्गा न्याःपिं मनूत थःगु खँ न्यनेत तयार जुइधुंकूसां थौंकन्हय् असम्बन्धित मनूत सक्रिय जुयाः ख्याच्वः बिउ वयाच्वंगु खँ नं कनादिल ।