प्रज्ञा प्रतिष्ठानय् एमाले दुमथ्यात

येँ (नेपालभाषा टाइम्स)- सरकारं म्हिगः स्वंगू प्रज्ञा प्रतिष्ठानय् प्राज्ञत नियुक्त याःगुली एमालेपाखें छम्हेसित हे दुमथ्याकूगु खँय् एमाले कार्यकर्तात तम्वःगु दु । एमालेपाखें जनसांस्कृतिक मञ्चं सम्भावित प्राज्ञतय् नांधलः दयेकाः संस्कृतिमन्त्री सुदन किरातीयात लःल्हाःगु खः । तर मन्त्री किरातीं एमालें छ्वया हःगु नांपाखें धाःसा छम्हेसित हे दुमथ्याकू ।

एमाले कार्यकर्तातय्सं आः माओवादी सरकार एमालेयात त्वःताः न्ह्याः वनेत्यंगुया थ्व नं छगू संकेत खः धकाः टिप्पणी याना हःगु दु । थुकियात कयाः एमालेया जनसांस्कृतिक मञ्चं विरोध यायेफुगु खँ धाःगु दु ।

स्वंगू प्रज्ञा प्रतिष्ठान मध्ये साहित्य विषयलिसे सरोकार दुगु नेपाल प्रज्ञा प्रतिष्ठानय् भूपाल राईयात कुलपति दयेकूगु दुसा ध्याचू च्वमि विमल निभायात उपकुलपति दयेकूगु दु ।
प्राज्ञ परिषद्य् खस नेपाली व नेपाल–भाषा निगुलिं भाषां साहित्य सिर्जना यानादीम्ह च्वमि अगिव बनेपालीयात नं दुथ्याकूगु दु ।