सरकारं बेरोजगारयात रोजगार बीगु
येँ – सरकारं थ्वहे आर्थिक दँनिसें लागू जुइकथं बेरोजगार नागरिकयात सछि न्हूया रोजगारी बीगु ज्याझ्वः हयेत्यंगु दु । ‘प्रधानमन्त्री रोजगार कार्यक्रम’ या नां सरकारं थ्व ज्याझ्वः हयेत्यंगु खः । थुगु ज्याझ्वः कथं सरकारं फुक्कं बेरोजगार नागरिकयात सछि न्हुया रोजगारी बीगु वा न्यय्न्हुया पारिश्रमिक बराबरया निर्वाह भत्ता उपलब्ध याकेगु सरकारया ग्वसाः दु ।
वंगु मंसिर महिनाय् जक सामाजिक सुरक्षा ज्याझ्वलं यानाः आलोचित जूम्हं सरकारं हाकनं महत्वकांक्षी योजना हःगु दु । सामाजिक सुरक्षा कार्यक्रम लागू यायेफइ मखु धकाः गुलिखें उद्योगीतय्सं विरोध याना वयाच्वंगु दु । संविधानं हे फुक्कं नागरिकया रोजगारीया हकया ग्यारेन्टी याःगु धासें ओली सरकारं उगु ज्याझ्वः हयेगु तयारी यानाच्वंगु खः ।
आःतक सरकारयाके देय्न्यंकं गुलि युवा बेरोजगार दु धइगु तथ्यांक तकं मदुनि । दँय् नेपालय् गुलि शैक्षिक बेरोजगार बजार वइ व बजाःया माग कथं जनशक्ति आपूर्ति जुयाच्वंगु दु मदु धइगु जानकारी तकं सरकार याके मदुगु इलय् हाकनं मेगु लोकप्रिय ज्याझ्वः हयेगु उचित मजुइगु विज्ञतय्सं धाःगु दु ।
तर रोजगार ज्याझ्वलं देय्न्यंकं हे रोजगारीया ह्वःताः मालेत सरकारयात जिम्मेवारी याइगु व युवातय्त नं फुक्कं कथंया श्रमप्रतिया सम्मान बोध जुइगु जूगुलिं थुकिं रोजगारया अवसर चुलाकेत अपुइगु विश्वास ब्वलनाच्वंगु दु । सरकारं घोषित ज्याझ्वःयात ताः लाकेगु निंतिं देय्न्यंकंया स्थानीय निकायसं ‘रोजगार सेवा केन्द्र’ चायेकेगु तयारी नं यानाच्वंगु दु । वइगु मन्त्रिपरिषदया बैठकय् उकिया बारे नियमावली पारित यायेगु तयारी जुयाच्वंगु खँ श्रम तथा रोजगार मन्त्री गोकर्ण विष्ट कनादीगु दु ।
LEAVE YOUR COMMENTS