महानगरीय प्रहरी परिसरया नागरिक सहायता कक्षया उलेज्या

येँ –  प्रहरी महानिरीक्षक सर्वेन्द्र खनालं प्रहरी परिसर येँय् नं स्थापना याःगु ‘नागरिक सहायता कक्ष’या उलेज्या यानादीगु दु । नागरिकया गुनासो न्यनेत धासें परिसं उगु कक्षया स्थापना याःगु खः । थ्यंमथ्यं १९ लाख न्यय्द्वः तका दां लागतय् निर्माण याःगु सहायता कक्षा समुदाय–प्रहरी साझेदारी अवधारणाकथं स्थापना याःगु खःसा कक्षपाखें नागरिकं महसुस याये फइकथंया सेवा उपलब्ध याकेत प्रहरी महानिरीक्षक खनालं प्रहरी अधिकारीयात निर्देशन बियादिल ।

अप्वःथें स्थानीय तहय् समुदाय–प्रहरी साझेदारी समितित गठन जुइधुंकूगु जानकारी बियादिसें वय्कलं प्रहरीया छगू हे जक उद्देश्य धइगु समुदायनाप जानाः अपराध न्यूनीकरणनापं शान्ति, सुरक्षा व अमनचैन कायम यानाः समृद्ध राष्ट्र निर्माणय् ग्वाहालि यायेगु खः धयादिल । गुण्डागर्दीयात हांनिसें लिनाछ्वयेत निर्देशन बियादिसें वय्कलं अज्याःगु गतिविधि समाजय् खने दत धाःसा उकिया जानकारी बीत वय्कलं समुदाययात इनाप यानादिल ।

ज्याझ्वलय् येँया प्रमुख जिल्ला अधिकारी रामप्रसाद आचार्यं शान्ति व भयरहित समाज निर्माणं जक समृद्ध नेपाल निर्माण याये फइ धासें सकसिनं थुखेपाखे ध्यान बीत इनाप यानादिल । प्रहरी परिसर येँया प्रमुख वसन्त लामां सेवाग्राहीयात अन्योल मजुइमा धकाः अस्थायी ज्याकुथिइ हे सहायता कक्षा स्थापना यानागु जानकारी बिसें येँया शान्ति सुरक्षा कायम यायेत प्रतिवद्ध दु धयादिल ।

ज्याझ्वलय् सामुदायिक सेवा केन्द्रया अच्युत सापकोटां नं नवानादीगु ज्याझ्वलय् सहायता कक्षया निंतिं येँ महानगरपालिका, विश्वास नेपाल, संरक्षक समूहं फर्निचर, टेलिभिजन लगायतया आवश्यक ज्वलं उपलब्ध याकूगु जानकारी प्रहरी नायब उपरीक्षक राजेन्द्र पोखरेलं जानकारी बियादिल ।

 

सम्बन्धित बुखँ

LEAVE YOUR COMMENTS