फिल्मं तापाना वनेत्यंपिं हिरोइनत
फिल्म धइगु ग्ल्यामरया ख्यः जूगुलिं थ्व ख्यःपाखे आकर्षित जुयाच्वंपिं यक्व दयाच्वनी, अले थ्व ख्यलय् छक्वः दुहां वयेधुंकूपिं याकनं थ्व ख्यलं पिहां नं वनी मखु । अथे धायेवं थ्व ख्यलय् पलाः न्ह्याकूपिं दक्वं थः यःतले थ्वहे ख्यलय् च्वनाच्वने दइमखु । विशेष यानाः फिल्मय् हिरो हिरोइन वा मेन रोल म्हितीपिं स्टारतय्गु क्यारियरया आयु धइगु उलि ताहाः जुइमखु ।
झिदँ झिंनिदँ हे जक स्टारया रुपय् थःत धस्वाकातये फइसा वयां लिपा उमिगु क्यारियरया घःचाः बुलुहुं फ्यासुयावनी । उमित थःगु फिल्मय् काइपि नं मदयावनी । थथे पलाः फ्यासुया वंसां थःत स्टार धायेकेगु मन धाःसा सदां चंचं धाया हे च्वनी । विशेष यानाः छगू इलय् तसकं बय्बय् जूपिं हिरोइनत लिपा वनाः फिल्म छगू चूलाइ ला धकाः आसकुति पहलं च्वनाच्वने माली । थुकिया दकलय् न्हूगु दसु कथं रेखा थापा व प्रियंका कार्कीयात कायेजिउ ।
रेखा थापा
रेखा थापा छगू इलय् तसकं नांजाःम्ह व लोकंह्वाःम्ह हिरोइन खः । नीदँ न्ह्यः “हिरो” नांयागु फिल्मपाखें कलिउडय् दुहां वःम्ह रेखा थापां निगू दशकतक फिल्म ख्यलय् हिरोइनया रुपय् राज हे यात धाःसां छुं पाइमखु ।
रेखा थापां थःत छम्ह हिरोइन सिबें नं छगू फिल्म याकःचां हे थःगु ब्वहलय् क्वबी फुम्ह स्टारया रुपय् थःत धस्वाकाक्यन । निर्माता छविराज ओझालिसे इहिपा यानाः छुं ई तक तिपू जीवन हंम्ह रेखां थःत छम्ह फिल्म प्रोड्युसरया रुपय् नं न्ह्यब्वलसा छम्ह फिल्म निर्देशकया रुपय् नं न्ह्यब्वल ।
प्रोड्युसरया रुपय् वयागु पलाः क्वातुसां निर्देशकया रुपय् धाःसा वयागु पलाः उलि क्वातुइ मफुत । अले बुलुहुं छम्ह स्टारया रुपय् वयागु पलाः छ्वासुयावन ।
लिपांगु इलय् रेखा थापां म्हितुगु पलाँस, डायरी लगायतया फिल्म फ्लप जुलसा वयागु होम प्रोडक्शनं पिहां वःगु रुद्रपिया व मालिकाया बनेज्या नं ताःलाये मफुबलय् वयात थःगु फिल्मय् काइपिं मेपिं सुं नं पिहां मवल, अले व थःम्हेसिनं नं फिल्म दयेके मफयाच्वंगु दु । खय्त ला रेखा थापां “ईन्टु मिन्टु लण्डनमा” फिल्मया निर्देशक रेनेशा बान्तवा राईलिसे जानाः फिल्म निर्देशन यायेगु धकाः नं घोषणा यानातःगु दु, तर थ्व फिल्म शुरु जुइगु संकेत धाःसा आःतक खनेमदुनि ।
प्रियंका कार्की
प्रियंका कार्कीयात रेखा थापाया थाय् काये फइम्ह हिरोइनया रुपय् बय्बय् याःगु खः । झिदँति न्ह्यः “मेरो बेस्ट फ्रेण्ड” फिल्मपाखे कलिउडय् डेब्यु याःम्ह प्रियंका कार्कींं म्हो इलय् हे थःत छम्ह स्टारया रुपय् धस्वाकेत ताःलाःगु खः ।
तर वयात सोलो हिरोइनया रुपय् काइपिं धाःसा उलि मदु । “सुन्तली”, “माला”, “आवरण” व “झोले” थेंज्याःगु वयागु सोलो हिरोइन फिल्मं बनेज्या उलि ताःलाके मफुसां वयागु अभिनययात धाःसा आपाःसिनं तारीफ हे याःगु खनेदु ।
बरु प्रियंका कार्कीं म्हितूगु मल्टिस्टारर फिल्मत “छक्का पञ्जा” , “छक्का पञ्जा २”, “शत्रुगते” थेंज्याःगु फिल्म धाःसा सुपरडुपर हिट हे तकं जुल । थुकथं थःत छम्ह स्टारया रुपय् धस्वाके धुंकूम्ह हिरोइन प्रियंका कार्कीया पलाः धाःसा थौंकन्हय् उलि क्वातुयाच्वंगु मदु ।
विशेष यानाः राइजिंग स्टार आयुष्मान देशराज जोशीलिसेया मतिनाया कारणं वं थःगु क्यारियरपाखे उलि ध्यान बियाच्वंगु खनेमदुगुलिं यानाः आपाःसिनं प्रियंका कार्कीयात थःगु फिल्मय् मकायेगु यानाहःगु दु ।
नम्रता श्रेष्ठ
झिंनिदँति न्ह्यः “सानो संसार” नांयागु फिल्मं कलिउडय् डेब्यु याःम्ह हिरोइन नम्रता श्रेष्ठं म्हो इलय् हे थःत बिस्कं हे पहः दुम्ह हिरोइनया रुपय् कलिउडय् धस्वाकेत ताःलात । वयागु “मेरो एउटा साथी छ” नं तसकं हे लोकंह्वाःगु फिल्म खः । न्हापांगु निगू फिल्म लोकंह्वाःबलय् नम्रता श्रेष्ठयात कयाः कलिउडय् छम्ह बांलाःम्ह हिरोइनया प्रवेश कथं चर्चा जुल ।
छगू संजोग हे धायेमाली कि छगू इलय् छम्ह स्टार हिरोइनया रुपय् बय्बय् जूपिं हिरोइनतसें थःत छम्ह फिल्म प्रोड्युसरया रुपय् पलाः न्ह्याकेगु धइगु फिल्म ख्यलं हे तापाना वनेगु लँपु ज्वंगु थें खनेदयावःगु दु ।
वयागु पलाः बांलाक हे न्ह्यानाच्वंगु खः तर आकाझाकां वयागु “सेक्स भिडियो” पिहां वःबलय् वयागु जहाँ थिनाच्वंगु क्यारियर तकं खिउँसे च्वनावंगु खः । अय्सां छफुति हे हारे मचासे थःगु पलाः न्ह्याकाच्वंम्ह नम्रता श्रेष्ठया थगुने “प्रसाद” नांयागु फिल्म बय्बय् जूगु खः, तर थुगुसी वयागु होम प्रोडक्शनय् पिहां वःगुु “जायरा”या गुलि चर्चा जूगु खः फिल्म धाःसा उलि जुइ मफुत । “जायरा” फिल्मया निंतिं बिस्कं गेटअप बिइमाःगुलिं दच्छितक मेगु छुं नं फिल्म मम्हितूबलय् वयागु लुखाखरुइ प्रोड्युसरत वनेगु हे त्वताछ्वःगु खनेदत ।
रिचा शर्मा
झिदँति न्ह्यः “फस्र्ट लभ” फिल्मय् कलिउडय् इन्ट्री याःम्ह रिचा शर्मायात छम्ह ग्ल्यामरया रुपय् मखसे एक्टिंग क्वालिटी दुम्ह हिरोइनया इन्ट्री कथं काःगु खः । थ्व धुंकाः रिचा शर्मां “लुट” थेंज्याःगु कलिउडय् छगू न्हूगु ट्रेण्ड दुथ्याकूगु फिल्मय् खनेदत । मेरो लभ स्टोरी, बाटो मुनिको फुल२ थेंज्याःगु लोकंह्वाःगु फिल्मया नापनापं टलकजंग भर्सेस टुल्के , हाइवे थेंज्याःगु बिस्कं सवाःया फिल्मय् नं रिचां मेन रोल म्हितलसा माओवादी जनयुद्धया बाखनय् दयेकूगु “उमा” फिल्मय् मेन रोल हे म्हितल ।
विनय श्रेष्ठलिसे जानाः नेपाःया उद्योगया ख्यलय् तसकं नांजाःपिं चौधरी ग्रुपलिसेया मंकाः लगानीइ “भिसा गर्ल” नांगु छगू फिल्म प्रोड्युस नं यात । तर थ्व फिल्मया बनेज्या धाःसा ताःमलात । वयां लिपा मेम्ह एक्टर डाइरेक्टर अर्पण थापालिसे जानाः “आधा लभ” नांयागु एक्सपेरिमेन्टल फिल्म नं रिचा शर्मां प्रोड्युस याःगु खः ।
व धुंकाः अर्पण थापालिसे हे जानाः “सुनकेशरी” नांयागु हरर फिल्म नं प्रोड्युस यात । थ्व निगुलिं फिल्म बांमलाक्क फ्लप जूबलय् रिचा शर्मा व अर्पण थापा दथुया कुलिचिनाय् तकं बाय्भू वल । थथे छम्ह धिसिलाःगु अभिनय प्रतिभा धकाः चर्चा जूसां रिचा शर्माया फिल्मं स्वकुमिया नुगः त्याके मफुबलय् वयात थःगु फिल्मय् काइपिं मदया वनसा वं थःम्हेसिनं प्रोड्युस याःगु फिल्म नं भज्यंक द्याःबलय् थौंकन्हय् रिचाया ल्हातिइ छगूबागू हे फिल्म मदु धाःसां छुं पाइमखु ।
करिश्मा मानन्धर
छगू संजोग हे धायेमाली कि छगू इलय् छम्ह स्टार हिरोइनया रुपय् बय्बय् जूपिं हिरोइनतसें थःत छम्ह फिल्म प्रोड्युसरया रुपय् पलाः न्ह्याकेगु धइगु फिल्म ख्यलं हे तापाना वनेगु लँपु ज्वंगु थें खनेदयावःगु दु । रेखा थापा, नम्रता श्रेष्ठ, रिचा शर्मा थें हे तुं करिश्मा मानन्धर नं छम्ह नांजाःम्ह हिरोइन खः ।
रेखा थापा ला नीदँ न्ह्यःतिनि हिरोइन जुया वःम्ह खःसा करिश्मा मानन्धरया पलाः न्ह्याःगु धयागु स्वीदँ सिबें अप्वः जुइ धुंकल । वयागु डेब्यु फिल्म “सन्तान” पिदंगु धइगु वि.सं २०४४ साल पाखे खः । स्वीदँ तक हिरोइनया रुपय् राज याःम्ह करिश्मा मानन्धरं नं लिपा वनाः “धुकधुकी”, “बाबु साहेब”, “फागु” थेंज्याःगु फिल्म प्रोड्युस यात ।
छम्ह हिरोइन स्वीदँ तक मदिक ज्या यानाच्वंगु धइगु हे छुं म्हो मखु । लिपांगु इलय् करिश्मा मानन्धरं च्यागू तगिमय् त्वःफिउगु अध्ययनयात हाकनं लिसा कयाः न्ह्याकूगु हुनिं फिल्मय् हिरोइन जुइगुलिइ ध्यान म्हो याना यंकूगु खःसा थुगुसी एसईई पास जुइ धुंकाः आः उच्च शिक्षा हासिल यायेगु लँपुइ वनाच्वंम्ह करिश्माया आज्जु धयागु पिएचडी तक यायेगुु जूगुलिं व नं आः फिल्म ख्यलं तापाना वंगु दु ।
मेमेपिं
फिल्म ख्यलय् उमेर वने धुंकाः सुं नं हिरोइनं थःत हिरोइनया रुपय् हे म्वाकातये फइ मखु धइगु खँ सत्य खः । अज्याःपिं मध्ये मौसमी मल्ल नं खः ।
संजोग हे धायेमाली कि मौसमी मल्लं नं लिपांगु इलय् थःत फिल्म प्रोड्युसरया रुपय् न्ह्यःने हःगु खःसा छगू–निगू फिल्मय् क्यारेक्टर रोल नं म्हिताः थःगु एक्टिंगया पलाः न्ह्याकेगु कुतः याःगु खः, तर थौंकन्हय् बनेज्याया सिलसिलाय् नारायणघाट च्वनाच्वंगुलिं यानाः फिल्मपाखे ध्यान बियाच्वंगु मदुसा थन हे च्वनाच्वंम्ह शर्मिला मल्ल धाःसा बाज्यःवंम्ह मिसा ख्वाः वःगुलिं यानाः फिल्म म्हितूगुसिबें घरगृहस्थी हे थःत तक्यंका वयाच्वंगु दु ।
थथे फिल्म ख्यलं तापाना वंपिं पुलांपिं अले बाज्यः वनेधुंकूपिं हिरोइनत मेमेपिं नं दु । तर थन दँबदँ न्ह्यःतक हे हिरोइनया रुपय् बय्बय् जुया च्वंपिनिगु बारे जक चर्चा यानागु जुल ।
LEAVE YOUR COMMENTS