दिपा महर्जनया याकः शाे, कलाकार स्वास्थ्य कोषय् न्यागू लाखं मल्याक दां मुन

येँ औ  कलाकारतय् उपचारया निंतिं ग्वाहालि यायेगु ताः तयाः नीस्वंगु ‘नेपाः आर्टिस्ट हेल्थ फण्ड’ निंतिं न्यागू लाखं मल्याक दां मुंगु दु । कोषया ग्वाहालिया निंतिं शनिवाः थनया पाँचतारे होटल याक एण्ड यतिइ जूगु मेलोडि क्वीन दिपा महर्जनया ‘लाइभ म्युजिकल इभेन्ट’य् हे थीथी व्यक्तिपिंसं कोषय् दां तयेगु घोषणा यानादीगु खः ।

सुखावति मल्टि प्रोडक्सनया ग्वसालय् जूगु शोलय् म्येँ हालामि महर्जनं नेवाः व खस नेपाली यानाः झिंप्यपु म्येँ न्यंकादीगु खः । दिपाया याकः शोलय् वय्कःयात गायकपिं सानुबाबु महर्जन, सतिस महर्जन, नील शाक्य, राजेश महर्जन व राकेश वज्राचार्यपिंसं साथ बिउगु खः ।

ज्याझ्वलय् ख्यालि जुजु मदनकृष्ण श्रेष्ठं नं निपु नेवाः म्येँ व निपु खस नेपाली म्येँ न्यंकादीगु खः । थः जहान मदुगु लछि हे मदुनिवं स्टेजय् दं झाःम्ह ख्यालि जुजु श्रेष्ठं थ्व दुःखया इलय् नं थन वयाः थःगु दुःख ल्वःमंगु दु धासें धयादिल, ‘मदुम्ह जि जहानं नं न्ह्याथाय् च्वनाच्वंगु दुसां जि थन वयागु खनाः लय्तायाच्वंगु दु जुइ । न्हिकेगु न्हिलेगु याना वयाच्वनाम्ह जि थन वल धकाः व तंचाइ मखु जुइ ।’

ज्याझ्वःया अन्तय् न्ववानादिसें मू पाहाँ येँ महानगरपालिकाया मेयर विद्या सुन्दर शाक्यं थः जहान मदुगु दुःखया इलय् नं सकसितं न्हिकेत वयेफुम्ह ख्यालि जुजु मदनकृष्ण श्रेष्ठपाखें सकसिनं प्रेरणा कायेमाः धयादिल । कलाकारतय् स्वास्थ्यया निंतिं ग्वाहालि याइगु कोष दयेकेगु थें ज्याःगु छगू बांलाःगु उद्देश्यया निंतिं स्टेजय् दं झाःगु खनाः न्ह्याथाय् दुसां वय्कःया तिरिमय्जु नं लय् हे ताःगु दइ जुइमाः धयादिसें मेयर शाक्यं जीवनयात थूम्ह मदनदाईपाखें झीसं नं प्रेरणा कायेमाः धयादिल । अथे हे वय्कलं कलाकारतय् ग्वाहालि यायेगु पवित्र उद्देश्य ज्वनाः न्ह्यानाच्वंगु सुखावति मल्टि प्रोडक्सनया ज्या सुथां लायेमाः धकाः भिंतुना देछायादिल ।

ज्याझ्वःया सुरुइ ख्यालि जुजु श्रेष्ठं कलाकार स्वास्थ्य कोषया लोगो उलेज्या यानादीगु खः । थुगु ज्याझ्वःया झ्वलय् हे कोषया निंतिं ४ लाख ५९ हजार, ९९९ तका दां मुंगु खँ सुखावतिया नायः सुरेन्द्र तुलाधरं धयादीगु दु । कोष सुखावतिपाखें दकलय् न्हापां छगू लाख तका दां तयाः नीस्वंगु खः । ज्याझ्वलय् हे समाज सेवी विश्वरत्न तुलाधरं १,११,१११।–, नेपाल चलचित्र समाजया सचिव एस के श्रेष्ठं १,१०,०००।–, महर्जन कम्प्लेक्सया कृष्ण लाल महर्जनपाखें ५५,५५५।–, चलचित्र वितरक गोपालकाजी कायस्थं लाखेभाजु संकिपापाखें ३३,३३३।–, अमेरिका, बोस्टनया मधुकर श्रेष्ठं ७५,०००।–, न्यू जेनिथ इंग्लिस स्कुलया प्रिन्सिपल राजु महर्जनपाखें २५,०००।–, आर बी फिल्म्सया रविन्द्र साहीपाखें २५०००।–, शाही वास इन्डस्ट्रिजया भरत सापकोटापाखें २५०००।– तका दां तयेगु घोषणा यानादीगु खः ।

ज्याझ्वलय् चलचित्र वितरक गोपालकाजी श्रेष्ठं गायिका महर्जनयात थःगु खस नेपाली भाय्या फिल्मय् म्ये हायेकेगु बचं नं बियादीगु खः ।

ज्याझ्वःया अन्त्यय् गायिका महर्जनयात ‘सरप्राइज’ बिइगु झ्वलय् नायः तुलाधरं मय्जु महर्जनया छगू एल्बम सुखावति पाखें पिथनेगु घोषणा यानादीगु खः । थ्व एल्बमय्संगीत गुज्ये मालाकार व निल शाक्यया, बाजं ग्वसाः (एरेन्ज) जीवित जल्मी व भुपेन्द्र वज्राचार्य दइगु व म्येँया रेकर्ड हरिशरण साय्मि, सुरेन्द्र श्रेष्ठया स्टुडियोय् यायेगु घोषणा यानादीगु खः । अथेहे एल्बमय् दुथ्याःगु फुक्क म्येँया म्युजिक भिडियो दयेकेगु खँ नं वय्कलं धयादीगु दु ।

सम्बन्धित बुखँ

LEAVE YOUR COMMENTS