दीपिका खनाः रणवीर ग्याः !

थौंकन्हय् बलिउडया नव विवाहित जोडी दीपिका पादुकोण व रणवीर सिंह भारतीय संचारमाध्यमय् चर्चाय् दु । इमिगु थ्व चर्चा इहिपा व फिल्मया कारणं धाःसा मखु । बलिउड अभिनेत्री दीपिका पादुकोणं छगू अन्तर्वाताय् रणवीरया बारे गुगु खँ धाःगु खः, उकियात कयाः चर्चा जुयाच्वंगु खः ।

इहिपा लिपा निम्हतिपूया नितान्त व्यक्तिगत जीवनया कारणं निरन्तर चर्चाय् वयाच्वंगु खः । इपिं निम्हेसिनं नं छम्हं मेम्हसिया तारिफ यायेगु यानाच्वंगु दु । गुगुं नं ज्याझ्वः वा शोलय् वनीगु इलय् निम्हं छम्हं मेम्हसिया तारिफ यायेगुलिइ हे अप्वः व्यस्त जुयाच्वंगु दु ।

आः नकतिनि जक फिल्म फेयरं काःगु छगू अन्तर्वार्ताय् दीपिकां इहिपाया इलय् रणवीरं सिन्चा फायेकाच्वंगु इलय् थःगु जीवनया न्हापांगु संकिपा ‘ओम शान्ति ओम’या एक चुट्की सिन्दुर धइगु डाइलग लुमना वयाच्वंगु धाःसा खः । ‘थम्हं आपालं इहिपाया ज्याझ्वलय् ब्वति काये धुंगु तर थ्व विशेष अवस्थायात थःगु हे इहिपाया अनुभव जिं याना’, दीपिकां धाःगु दु ।

अथे हे मेगु छगू न्ह्यसःया लिसलय् दीपिकां रणवीर थः मांअबु स्वयाः थः खनाः तसकं ग्याः धाःगु दु । दीपिका व रणवीरया इहिपा वंगु नोभेम्बर महिनाय् जक जूगु खः । इहिपा इटालीइ जूगु खःसा उकिया लसता भ्वय् धाःसा बेंगलुरु व मुम्बइलय् याःगु खः ।