निर्देशक खड्गीया निपु म्येँया म्युजिक भिडियो पिदन
येँ (नेपालभाषा टाइम्स) – नेपालभाषाया मनोरञ्जन ख्यलय् नांजाःम्ह निर्देशक, कलाकार, च्वमि रामकृष्ण खड्गीया निर्देशनय् निपु म्येँया म्युजिक भिडियो पिदंगु दु ।
निर्देशक खड्गीया निर्देशनय् खस नेपाली व नेपालभाषाया म्येँया म्युजिक भिडियो पिदंगु खः । जयनेपाल सिनेमा हलय् गोदावरी नगरपालिकाया प्रमुख गजेन्द्र महर्जनया प्रमुख आतिथ्यताय् जूगु ज्याझ्वलय् खस भाषाया ‘साइली’ व नेपालभाषाया ‘छ लिसे’ म्येँया म्युजिक भिडियो पितब्वज्या याःगु खः ।
बीआर प्रोडक्सनया प्रस्तुति निगुलिं म्युजिक भिडियोय् कृषल श्रेष्ठ व श्रीतिका श्रेष्ठया मुख्य अभिनय दुथ्यानाच्वंगु दु । हिमाल पारीया जिल्लाया नामं म्हसिउगु पर्यटकीय ल्याखं नांजाःगु मुस्ताङ, मार्फा, जोमसोम, अपर मुस्ताङलिसें पर्यटकीय नगरी पोखराय् छाँयाकनं यानातःगु म्युजिक भिडियोया छाँयाकन रक्की महर्जनं यानादीगु खः ।
निर्देशक खड्गीया परिकल्पनाय् निर्माण जूगु म्युजिक भिडियोया सम्पादन नं वय्कः व छाँयाकार महर्जनं यानादीगु खः । नेपालभाषाया म्युजिक भिडियोया म्येँय् विराज महर्जन व दीपा महर्जनं सः बियादीगु दुसा थुगु म्येँया म्येँच्वमि, लय्चिनामि नं निर्देशक खड्गी हे खः । संगीत संयोजन जुगल डंगोलं यानादीगु खः ।
खस् नेपाली भाय्या म्येँ विराजया याकः सलय् दुथ्यानाच्वंगु दुसा थुगु म्येँया च्वमि, लय्चिनामि व म्युजिक एरेन्ज जुगल डंगोलं यानादीगु खः ।
ज्याझ्वलय् मूपाहां महर्जन, विशेष पाहां संकिपा निर्देशक प्रकाश साय्मि, म्युजिक भिडियोया निर्देशक खड्गीलिसें मेपिं पाहांपिंसं नुगःखँ तयादीगु खः ।
LEAVE YOUR COMMENTS