झिंन्यागू जलविद्युत आयोजना दयेके क्वचाल
येँ – आर्थिक दँ २०७४÷७५ य् तःधंगु चिधंगु यानाः मुक्कं झिंन्यागू जलविद्युत आयोजना दयेके क्वचाःगु दुसा थुपिं आयोजना पाखें १०० मेगावाट मत राष्ट्रिय प्रशारण लाइनय् थप जूगु दु । विद्युत विकास विभागया कथं नेपाल विद्युत प्राधिकरणं दयेकूगु ३० मेगावाट क्षमताया चमेलिया जलविद्युत आयोजना थ्व दँय् दयेके क्वचाःगु दु ।
थ्व आर्थिक दँय् दयेके क्वचाःगु थ्व दकलय् तःधंगु जलविद्युत आयोजना खः । दार्चुलाय् दयेकूगु थ्व आयोजना झिंछदँ लिपा थुगुसी दयेके क्वचाःगु खः । थ्व बाहेक मझौला खलाया झिंछगू आयोजना व निगू लघु जलविद्युत आयोजना थ्व दँय् दयेके क्वचायेकूगु खः । विभागया कथं ६ मेगावाटया पञ्चकन्या हाइड्रो पावरया माथिल्ला माई सी आयोजना दयेके क्वचाःगु दु ।
अथेहे ४ मेगावाटया सभाखोला, ४ मेगागाटया हे पुवोखाला –१, १३.६० मेगवाटाया थापाखोला, २ मेगावाटया चाके खोला, ३ मेगावाटया दिमि, ७ मेगावाटया मोलङ, १३ मेगावाटया मदक्युखोला, ८ मेगावाटया माइ साना क्यासकेड, ४ मेगावाटया सार्दी खोला, ५ मेगावाटया फावाखोला, ३.७५ मेगावाटया द्वारीखोला आयोजना दयेके क्वचाःगु दु ।
थुकिया लिसें दोलखया ढुङ्गे जिरी ०.६० मेगावाट, सिउरी भूम लघुजलविद्युत ०.२३ मेगावाटया आयोजना दं दयेके क्वचाःगु दु । विभागं थौंकन्हय् तःधंगु व मझौला यानाः झिंछगू आयोजनाया सम्भाव्यता अध्ययन यानाच्वंगु खँ धाःगु दु । अथेहे १० हजार ८०० मेगावाटया कर्णाली चिसापानी जलविद्युत आयोजनाया वातावरणीय अध्ययन ज्या क्वचायेकेधुंकूगु दु ।
सरकारं थ्व आयोजनायात दक्षिण एशियाया हे दकलय् तःधंगु आयोजना कथं न्ह्यःने यंकेगु लक्ष्य तयातःगु दु । अथेहे ८४ मेगवाट क्षमताया कन्काई बहुउद्देश्यीय आयोजना, ९३ मेगावाटाय शारदा बबई व १०२ मेगावाटया दुधकोशी–५ आयोजना नं अध्ययन चरणय् दु ।
२८१ मेगावाटया कर्णाली स्टेज १, ४३७ मेगवाटया जलाशययुक्त नौमुरे आयोजना, ३७२ मेगावाटया अरुण ४, ६७९ मेगावाटया तल्लो अरुण, २८७ मेगवाटया सेती, १११६ मेगावाटया सुनकोशी २, ५४० मेगावाटया सुनकोशी–३ आयोजनाया नं अध्ययनया थीथी चरणय् थ्यनेधुंकूगु खँ विभाग महानिर्देशक नविनराज सिंहं धयादीगु दु ।
विभागं आः नं ५ हजार मेगावाट बराबरया मत उत्पादनया निंतिं १५९ गू आयोजनायात अनुमति बियातःगु दु । थ्व मध्ये ३५०० मेगवाटया मत उत्पादनया निंतिं थीथी कम्पनीतय्सं वित्तीय व्यवस्था यानाः निर्माण चरणय् थ्यनेधुंकूगु दु ।
LEAVE YOUR COMMENTS