उद्योग प्रशासन सेवा छथासं बीत एकल विन्दू केन्द्र शुभारम्भ

येँ – उद्योग प्रशासनलिसे सम्बन्धित फुक्क कथंया सेवा छथासं बिउगु ताःतयाः सरकारं बुधवाः निसें एकल विन्दु सेवा केन्द्र सञ्चालनय् हःगु दु । स्वदेशी व विदेशी लगानीकर्तातय्सं ताःई न्ह्यवनिसें माग याना वयाच्वंगु एकल विन्दु सेवा केन्द्रया बुधवाः छगू ज्याझ्वः दथुइ उद्योग, वाणिज्य तथा आपूर्तिमन्त्री मातृकाप्रसाद यादवं शुभारम्भ यानादीगु दु । त्रिपुरेश्वरय् च्वंगु उद्योग विभाग परिसरपाखें संचालनय् हःगु थ्व केन्द्र पाखें सरकारया थीथी निकायं बीगु सेवा इलय् हे छगू हे थासं उपलब्ध याकेगु , स्वदेशी व विदेशी लगानीकर्तातय्सं लगानी परामर्श, उद्योग स्थापनाया अनुमति, दर्ता व विस्तार निसें निर्गमन –एक्जिट) तकया उद्योग प्रशासन सम्बन्धी सेवा छगू हे थासं कायेफइगु खँ धाःगु दु ।

औद्योगिक व्यवसाय ऐन २०७३ व मेमेगु प्रचलित कानुन कथं उद्योग व लगानीकर्तां कायेदयेमाःगु सेवा, छुट, सुविधा, सहुलियत वा प्रोत्साहन सरल व सहज प्रक्रियां उपलब्ध जुइगु खँ धाःगु दु । केन्द्रपाखें फुक्क निकायं अनलाइनपाखें सेवा बी । केन्द्रपाखें कम्पनी रजिष्ट्रारया ज्याकू, उद्योग विभाग व वाणिज्य, आपूर्ति व उपभोक्ता हित संरक्षण विभागपाखें जुयाच्वंगु कम्पनी, फर्म, उद्योग दर्ता, अनुमति, इजाजत, स्थापना, नवीकरण, कारोवार अनुमति, क्षमतावृद्धि व बहिर्गमन थेंज्याःगु सेवा बी । व्यवसाय दर्ताया निंतिं माःगु भ्वँ पहिचान यानाः विद्युतीय स्वरुपय् हइगु व फुक्कं निकायय् विद्युतीय प्रणालीपाखें अन्तरनिकायं छ्यलेगु कथं प्रणालीया विकास यानाः कार्यान्वयन यायेगु, निश्चित रकम तकया विदेशी लगानी स्वीकृति व विदेश लित यंकेगु ज्याया निंतिं सहमति बीगु, केन्द्रयात प्रत्यायोजित यानातःगु अधिकार स्वयां पिनेगु निर्णय यायेमाःगु जुल धाःसा केन्द्रं हे पहल यानाः आवश्यक निर्णय यायेत सहजीकरण यायेगु ज्या याइ ।

कानुन कथं उद्योगयात बियातःगु कर व राजश्व छुट थेंज्याःगु मेमेगु प्रोत्साहन, सुविधा व सहुलियत बीगु, उद्योग प्रशासनलिसे सम्बन्धित कानुन कथं उद्योगयात आवश्यक जुइगु हदबन्दी स्वयां अप्वः जग्गा छुटया निंतिं सिफारिस यायेगु, उद्योगयात जग्गा प्राप्ती, उद्योगयात आवश्यक जुइगु वन क्षेत्रया जग्गा लगायत मेमेगु विषय व वातावरणीय अध्ययन सम्बन्धी ज्याया स्वीकृति बीगु व सरकारी जग्गा बालं बीगु विषयय् सहजीकरण यायेगु, उद्योगयात आवश्यक जुइगु मत, मेमेगु ऊर्जा, सञ्चार, लःया सुविधा व पहुँच सतक निर्माणया निंतिं आवश्यक औद्योगिक पूर्वाधार दयेकेत समन्वय व सहजीकरण यायेगु ज्या नं थ्व केन्द्रं याइ ।

केन्द्र विदेशी लगानीकर्ता व ज्यामितय्त श्रम स्वीकृति बीगु प्रवेशाज्ञा बीगु, उद्योगयात आवश्यक जुइगु कच्चा पदार्थ आयातय् सहजीकरण यायेगु व आयात अनुमति कायेमाःगु वस्तु जुल धाःसा फुक्क कथंया अनुमति बीगु व उकिया निंतिं सिफारिस यायेगु, उद्योग स्थापना यायेत प्रारम्भिक वातावरणीय परीक्षण स्वीकृत यायेगु, सम्बन्धित मन्त्रालयपाखें अधिकार प्रत्यायोजन जूकथं ‘स्कोपिङ डकुमेन्ट’ व कार्यक्षेत्रगत शर्त स्वीकृति यायेगु ज्या नं याइ ।
वातावरणीय प्रभाव मूल्यांकन स्वीकृतिया निंतिं सहजीकरण, छक्वःया छगू लाख डलर तकया विदेशी विनिमय स्वीकृत यायेगु व व स्वयां अप्वः स्वीकृतिया निंतिं सहजीकरण यायेगु, उद्योगं कयातःगु छुट, सुविधा, सहुलियतया सही ढंगं उपयोग जू÷मजू अनुगमन यायेगु, मूल्यांकन यानाः आवश्यक सुधार यायेगु, उद्योग संचालनय् वइगु पंगः निराकण यायेत सार्वजनिक निजी संवादया ज्या नं केन्द्र पाखें याइ ।

केन्द्रपाखें सेवा सुविधा बीबलय् वइगु समस्याया समाधन यायेत आवश्यक निर्णय यायेगु, स्थायी लेखा नम्बर बीगु, आयात निर्यात संकेत नम्बर (एक्जिम कोड) बीगु, निकासी अनुदान उपलब्ध याकेगु, पूँजी व क्षमता वृद्धि, उद्देश्य थप व परिवर्तन, नामसारी, ठाउँसारी वा स्थानान्तरणया स्वीकृति बीगु ज्या नं याइ ।
औद्योगिक व्यवसाय ऐन २०७३ या दफा ३५ या उपदफा (१) य् उद्योग वा लगानीकर्तायात चूलाइगु छुट, सुविधा वा सहुलियत व उद्योगया लागि आवश्यक जुइगु पूर्वाधार सम्बन्धी सेवा इलय् हे सरल व सहज रुपं छगू हे थासं उपलब्ध याकेगु ताः तयाः एकल विन्दु सेवा केन्द्रया स्थापना यायेगु व्यवस्था यानातःगु दु ।

सरकारं वंगु चैत १५ व १६ गते येँय् जूगु अन्तर्राष्ट्रिय सम्मेलनय् लगानी सम्बन्धि फुक्क कथंया सेवा छथासं हे बीगु कथं केन्द्र स्थापना यायेत पहल यायेगु प्रतिबद्धता प्वंकूगु खः । थ्व केन्द्रय् ४१ दरबन्दी दइगु व तत्कालया निंतिं केन्द्रया प्रमुख कार्यकारी कथं उद्योग विभागया महानिर्देशकयात हे जिम्मेवारी बीगु मन्त्रालयं धाःगु दु ।
केन्द्रय् छम्ह महानिर्देशक, च्याम्ह निर्देशक, छम्ह उपनिर्देशक, १५ म्ह शाखा अधिकृत, ११ म्ह नायब सुब्बा व न्याम्ह कार्यालय सहयोगी दइ । उद्योग विभाग, कम्पनी रजिष्ट्रारया ज्याकू, आन्तरिक राजश्व विभाग, ऊर्जा, जलस्रोत तथा सिँचाइ मन्त्रालय, वन तथा वातावरण मन्त्रालय, भूमि व्यवस्था सहकारी तथा गरिबी निवारण मन्त्रालय, अध्यागमन विभाग, श्रम तथा व्यवसायजन्य सुरक्षा विभाग, भन्सार विभाग, भौतिक पूर्वाधार तथा यातायात मन्त्रालय, वाणिज्य आपूर्ति तथा उपभोक्ता हित संरक्षण विभाग, नेपाल राष्ट्र बैंक, नेपाल विद्युत प्राधिकरण व नेपाल दूरसञ्चार प्राधिकरणया कर्मचारी थ्व केन्द्रय् खटे जुइ ।

लगानीया लुखा चाल

केन्द्रया उलेज्या यासें उद्योगमन्त्री यादवं आः देशय् लगानीया लुखा चाःगु खँ धयादीगु दु । वय्कलं न्हापा थीथी बहाना यानाः लगानीकर्तातय्त निरुत्साहित यायेगु प्रवृत्ति दुगु स्वीकार यासें आः सेवा प्रवाह सरल व सहज यायेत सरकारं ज्या यानाच्वंगु खँ धयादिल । थ्व झ्वलय् वय्कलं कर्मचारीतय्त पुलांगु मानसिकता त्वःताः सदाचार नालाः ज्या यायेत निर्देशन नं बियादीगु दु । मन्त्री यादवं धयादीगु दु, ‘भ्रष्टाचारं बहुआयामिक रुप धारण यानाच्वंगु दु, म्हिगः तक टेबुल तलं गलत क्रियाकलाप जुइगु, आः सेटिङ्ग मिले यानाः हे भ्रष्टाचार यायेगु प्रवृत्ति खनेदया वःगु दु । सेवाग्राही व कर्मचारी निम्हं नैतिकवान जुयाः ज्या यात धाःसा समृद्ध नेपाल दयेकेगु सरकारया लक्ष्य अवश्य चूलाइ ।’ उद्योग सचिव यामकुमारी खतिवडां आवंलि लगानीया निंतिं छुं कथंया प्रक्रियागत झन्झन फयेमाली मखुगु दावी यासें लगानीकर्तात थीथी निकायय् ब्वाँय् जुइगु माःगु अवस्थाया अन्त्य यायेत केन्द्र संचालनय् हयागु खँ कनादिल ।

निजी ख्यः उत्साहित

सरकारं छगू हे थासं लगानीसम्बन्धी फुक्क सेवा चूलाकाबीगु कथं एकल विन्दे सेवा सुरु यायेवं निजी ख्यः नं उत्साहित जूगु दु । निजी ख्यलं ताःई न्ह्यवनिसें गतिशील उद्योग प्रशासन दयेकेत एकद्वार प्रणालीया माग याना वयाच्वंगु खः । नेपाल उद्योग परिसंघया महानिर्देशक मेघनाथ न्यौपानें लिबाक हे जूसां सरकारं लगानीकर्ताया माग सम्बोधन याःगु धासें थुकिं लगानीकर्ता थप आशावादी जूगु खँ धयादिल । विदेशय् नं एकद्वार प्रणाली सकं सफल जूगु उदाहरण दु । विशेष यानाः जःलाखःला देय् चीन, मलेसिया थेंज्याःगु देशय् लगानी सम्बन्धी सेवा उपलब्ध याकेगु निंतिं हःगु एकद्वार प्रणाली तसकं सफल जूगु खनेदुगु खः।