सिमेन्ट उद्योगय् १९ अर्ब थप लगानी वइगु

येँ – चालु आर्थिक दँया न्हयला दुने सिमेन्ट उद्योगय् जक निजी क्षेत्रं १९ अर्ब ६६ करोड ४५ लाख तका बराबरया लगानी यायेगु प्रतिवद्धता वःगु दु । थुपिं उद्योगपाखें १ हजार ७५० म्हेसित रोजगारी बिइगु लक्ष्य नं तयातःगु खँ धाःगु दु । उद्योग विभागय् दर्ता जूगु उद्योगतय् आधारय् थौंकन्हय् निजी ख्यः सिमेन्ट उद्योग स्थापना यायेत आकर्षित जुयाच्वंगु खनेदुगु खः ।

आः सिमेन्ट उद्योगय् लगानी यायेत ग्यास उद्यमी शिवप्रसाद घिमिरे लिसें न्हून्हूपिं उद्यमीत न्ह्यःने वयाच्वंगु दु । विभागय् वःगु आवेदन कथं झापाया तोपगाछीइ ए प्लस सिमेन्ट उद्योग तयेत गुणराज खत्रीं आवेदन बिउगु दु । थ्व उद्योगया कूल पुँजी ४० करोड ८० लाख जुइ । थुकी ६ हजार मेट्रिक टन पिपिसी व ६ हजार मेट्रिक टन ओपिसी सिमेन्ट उत्पादन याइसा ६० म्हेसित रोजगारी बी ।

अथेहे स्याङजाया वालिङ १य् अथर्व सिमेन्ट उद्योग स्थापना यायेत उद्यमी पितोम्बर गैरें विभागय् उद्योग दर्ता यानादीगु दु । थ्व उद्योगया कूल पुँजी छगू अर्ब ५० करोड जुइ । थ्व उद्योगं निसःत्याम्हेसित रोजगारी बीगु खँ दु । थ्व उद्योगं छगू लाख ५० हजार मेट्रिक टन ओपिसी, छगू लाख ५९ हजार मेट्रिक टन पिपिसी व ८८ हजार ९८० मेट्रिक टन क्लिंकर उत्पादन जुइ ।

निजी ख्यः दुहां वःगु थ्यंमथ्यं झिंखुदँ लिपा नेपाः सिमेन्टय् आत्मनिर्भर जूगु दु । मेगु दँय् नेपाः सिमेन्ट निर्यात यायेगु अवस्थाय् थ्यनी।

कपिलवस्तुया शिवराज नपा ८ य् उद्योग स्थापना यायेगु कथं उद्यमी राहुलकुमार अग्रवालं सिजर्नी सिमेन्ट प्रालि दर्ता याःगु दु । थ्व उद्योगय् ९ अर्ब ७९ करोड ५९ लाख तका बराबरया लगानी जुइगु खँ धाःगु दु । थ्व उद्योगं ३९९ म्हेसित रोजगारी बीसा दँय् ८ लाख ३८ हजार २०० मेट्रिक टन ओपिसी व ३ लाख ३० हजार मेट्रिक टन पिपिसी सिमेन्ट उत्पादन याइ ।

अथेहे थौंकन्हय् संचालनय् वयाच्वंगु मारुती सिमेन्ट उद्योगं सिरहा गोलबजार ९ य् थ्व हे उद्योगया न्हूगु शाखा उद्योग चायेकेत्यंगु दु । थ्व उद्योगय् २ अर्ब ५८ करोड बराबरया लगानी जुइ । थ्व उद्योगं ५८७ म्हेसित रोजगारी बीसां दँय् ६ लाख ६० हजार मेट्रिक टन ओपिसी व १३ हजार २०० मेट्रिक टन क्लिङकर उत्पादन याइ ।

अथेहे उद्यमी देवीप्रसाद मैनालीं काबेली सिमेन्ट इन्डस्ट्रिजया नामं न्हूग उद्योग दर्ता यानादीगु दु । झापा हल्दिबारीइ थ्व उद्योग तइ । उद्योगय् ५० करोडया लगानी जुइसा मुक्कं ७६ म्हेसित रोजगारी बीगु लक्ष्य दु । थ्व उद्योगं दँय् १ लाख ५० हजार मेट्रिक टन ओपिसी व १ लाख मेट्रिक टन पिपिसी सिमेन्ट उत्पादन याइगु खँ धाःगु दु ।

ग्यास व्यवसायी शिवप्रसाद घिमिरें नं गरुड सिमेन्ट उद्योग स्थापना यायेगु तयारी यानादीगु दु । मुक्कं ३७८ म्हेसित रोजगारी बीगु लक्ष्य दुगु थ्व उद्योगया कुल पुँजी ४ अर्ब ८९ करोड १८ लाख जुइगु खँ धाःगु दु । उद्योगं दँय् ६ लाख २३ हजार ७०० मेट्रिक टन ओपिसी सिमेन्ट उत्पादन याइ ।सिमेन्ट उद्योगय् थौंकन्हय् निगू खर्ब लगानी जुयाच्वंगु दुसा दँय् १ खर्ब ५० अर्बया कारोवार जुयाच्वंगु दु ।

नेपाः थुगुसी निसें हे सिमेन्टय् आत्मनिर्भर नं जूगु दु । निजी ख्यः दुहां वःगु थ्यंमथ्यं झिंखुदँ लिपा नेपाः सिमेन्टय् आत्मनिर्भर जूगु खँ सिमेन्ट उत्पादक संघया अध्यक्ष धु्रवराज थापां धयादीगु दु । मेगु दँय् नेपाः सिमेन्ट निर्यात यायेगु अवस्थाय् थ्यनीगु खँ नं वय्कलं धयादीगु दु ।संसारय् सन् १८७५ निसें सिमेन्ट उत्पादन यायेगु सुरु जूगु खःसा नेपालय् सन् १९६० निसें जक उत्पादन सुरु जूगु खः ।

नेपालय् हिमाल सिमेन्टं न्हापांखुसी उत्पादन सुरु याःगु खः । थौंकन्हय् नेपालय् ५६ गू सिमेन्ट उद्योगं उत्पादन याना वयाच्वंगु दु । थुकी मध्ये उदयपुर व हेटौंडा सिमेन्ट उद्योग जक सरकारी स्वामित्वय् दुगु उद्योग खः ।नेपालय् थगुने ९० लाख टन सिमेन्ट उत्पादन जूगु खःसा उलि हे खपत नं जूगु खः ।

नेपाःया उद्योगया क्षमता धाःसा १ करोड ३० लाख टन उत्पादन यायेगु दु । विश्वय् सिमेन्टया कूल उत्पादन वार्षिक ४ अर्ब २० करोड टन दुसा चीनय् दकलय् अप्वः सिमेन्ट उत्पादन जुइ । विश्वय् उत्पादन जुइगु सिमेन्ट मध्ये ५५ प्रतिशत चीनय् जक उत्पादन जुइ ।