
येँ – पाकिस्तानी क्षेत्रय् लाःगु काश्मीरय् म्हिगः ६.३ म्याग्निच्युटया भुखाय् ब्वःगु दु । उकी लानाः न्याम्ह सीगु स्थानीय जनता सीगु दुसा मेपिं ७६ म्ह घाःपाः जूगु दु । पाकिस्तानया राजधानी इस्लामावादं १३४ किलोमिटर तापाक च्वंगु पाकिस्तान अधिनस्थ क्षेत्र काश्मिरया मीरपुर केन्द्र विन्दु जुयाः भुखाय् ब्वःगु खँ भारत व पाकिस्तानी सञ्चार माध्यमं धाःगु दु ।
समाचार कथं भुखाय्या केन्द्र ४० किलोमिटर गहिराइलय् दुगु व म्हिगः पाकिस्तानी ई कथं ३ बजे भुखाय्या न्हापांगु धक्का महसुस याःगु खः । भुखाचं मीरपुरबो सतक बांमलाक क्षति जूगु दुसा स्थानीय वासिन्दातय्सं अनया स्थितियात कयाः सामाजिक सञ्जाल मार्फत सतक व
छेँय्या बारे पोष्ट याःगु दु ।
भुखाचय् लानाः घाःपाः जूपिंत थीथी अस्पतालय् भर्ना यानातःगु दुसा उमिगु स्थिति गम्भीर जूगु खँ धाःगु दु । लिसें सीपिनिगु ल्याः नं अप्वये फइगु खँ धाःगु दु । पाकिस्तान सरकारं भुखाचं प्रभावित जूगु थासय् सेना परिचालन याःगु दु । मीरपुरया डेपुटी कमिश्नर राजा केसरं भुखाचं आपालं मनूत घाःपाः जूगु व उमिगु स्थिति तसकं गम्भीर जूगु खँ धाःगु दु । भुखाचं जूगु क्षतिया विवरण संकलन यायेगु ज्या जुयाच्वंगु दनि ।
LEAVE YOUR COMMENTS