ने. सं. ११४३ तछलाथ्व दशमी -

रुस व युक्रेन दथुइ सोमवाः मेगु वार्ता

एजेन्सी- रुस व युक्रेनया दथुइ सोमवाः स्वंगूगु चरणया वार्ता जुइगु जूगु दु । रुस व युक्रेनया दथुइ जुयाच्वंगु युद्धया दथुइ थ्व शान्ति वार्ता जुइत्यंगु खः । थ्वयां न्ह्यः निक्वःतक जूगु शान्ति वार्तां छुं नं निष्कर्ष पिहां मवःगु खः ।

न्हापांगु व निगूगु चरणया वार्ता बेलारुस व युक्रेनया सिमानाय् जूगु खःसा स्वंगूगु चरणया वार्ता गन जुइ धयागु सीमदुनि । युक्रेनया वार्ता पुचःया छम्ह दुजलं सामाजिक सञ्जाल मार्फत रुस व युक्रेनया दथुइ स्वंगूगु चरणया वार्ता जुइत्यंगु जानकारी बिउगु खः । रुस व युक्रेन दथुइ निक्व तक जूगु वार्तां छुं नं लिच्वः मवःगुलिं थ्व वार्तां नं खास हे छुं नं निष्कर्ष वइगु खनेमदु ।

थ्व हे झ्वलय् युक्रेनया मेरिपोलय् हाकनं युद्धविरामया घोषणा याःगु दु । युक्रेनया मेरिपोल शहरय् स्थानीय ई कथं आइतवाः सुथय् १० ताः ईनिसें बहनी ९ ताः ई तक अस्थायी युद्धविरामया घोषणा याःगु युक्रेनया सिटी काउन्सिलं जानकारी बिउगु दु । सर्वसाधारणतय्त १२ ताः इलय् निसें शहर त्वःतेत अनुमति बिउगु दु । वंगु शनिवाः नं रुसं मेरिपोल व भोल्नोभाखाय् अस्थायी युद्धविरामया घोषणा याःगु खः, तर रुसं युद्धविरामया दथुइ हे आक्रमण याःगु खः ।

रुस व युक्रेन युद्धया दथुइ रुसयात थीथी प्रतिबन्ध तयेगु ज्या नं जारी हे दु । सामाजिक सञ्जाल फेसबुक, ट्विटर, युट्युबं रुसय् प्रतिबन्ध तयेधुंकूगु दु । गुुगल, एप्पल व माइक्रो स्पटं नं रुसय् थःपिनिगु सेवा बन्द याःगु दु । अथे हे मास्टर कार्ड व भिसा कार्ड सञ्चालनय् प्रतिबन्ध तःगु दु ।