थनिंनिसें पूर्वाधार सम्मेलन

येँ – समृद्धिया आधारया रुपय् दयाच्वंगु पूर्वाधार विकासय् बः बिउगु ताःतयाः ग्वसाः ग्वयेत्यंगु नेपाल पूर्वाधार सम्मेलन २०१९ य् मुक्कं १०३ परियोजनाया शोकेश याइगु जूगु दु । सम्मेलनया समग्र तयारी बारे जानकारी बीत उद्योगढ परिसंघपाखें म्हिगः छगू पत्रकार सम्मेलन यासें प्रदेशस्तरया ८२ गू व लगानी बोर्डपाखें २१ गू परियोजना शोकेश यायेगु जानकारी बिउगु खः ।

भौतिक पूर्वाधार तथा यातायात मन्त्रालय व नेपाल उद्योग परिसंघया मंकाः ग्वसालय् जुइत्यंगु थ्व सम्मेलन थौं व कन्हय् येँय् जुइत्यंगु दु ।
‘दिगो विकासया निंतिं मजबूत पूर्वाधार’ धयागु मू नारा बियाः जुइत्यंगु थ्व सम्मेलनय् न्हय्गुलिं प्रदेशया मुख्यमन्त्रीं प्रादेशिक पूर्वाधार विषयय् सहलह यानादी ।

प्रदेश सरकारं थःथःपिनि प्रदेशया पूर्वाधारय् निजी लगानी हयेत ५४ गू परियोजना न्ह्यब्वयेगु कार्यक्रम दु । निन्हु तक जुइगु थ्व सम्मेलनय् देय् व देशं पिनेया यानाः न्यासलं मल्याक लगानीकर्तातय् सहभागिता दइ । विकास साझेदार संस्थाया प्रमुख व उपप्रमुखं थुगु सम्मेलनय् ब्वति कयादी ।

दक्षिण कोरियाया पुलांम्ह प्रधानमन्त्री डा. हान सेयु सोया विशेष सहभागिता दइगु थ्व सम्मेलनय् भारतया ऊर्जा तथा नवीकरणीय ऊर्जा मन्त्रालयया युनियन स्टेट मिनिस्टर राजकुमार सिंह, विश्व बैंकया उपाध्यक्ष जिगदोग ह्वा, एशियाली विकास बैंकया महानिर्देशक वोचोग युमलिसें उच्च सरकारी अधिकारी व पूर्वाधारया थीथी निजी लगानीकर्तात सहभागी जुइ ।

सम्मेलनय् विश्व बैंक, एशियाली विकास बैंक, युएनडिपी लिसेंया संस्था व देय् दुनेया थीथी संस्था यानाः ४० गू साझेदारया रुपय् दइसा ८० स्वयां मल्याक विशेषज्ञपिंसं मू वक्ताया कथं सहभागि जुयादी । सम्मेलनय् थीथी न्हय्गू सत्रय् सहलह जुइ ।

थ्व सम्मेलन थगुने जूगु लगानी सम्मेलनय् २०१९ या फलोअप सम्मेलनया रुपय् जुइगु खँ परिसंघं धाःगु दु । परिसंघया नायः सतिकुमार मोरं थ्व सम्मेलनं आन्तरिक संवादया लुखा चालिगु खँ धयादिल । वय्कलं सम्मेलनय् जनताया व देय्या आकांक्षा कथं पूर्वाधार निर्माणया बारे सहलह जुइ ।