ओरेन्टलं ध्यबा लित बीगु

येँ – ओरेन्टल कोअपरेटिभ लिमिटेडया बचतकर्ता व अपार्टमेन्ट न्यायेत ध्यबा बियातःपिनिगु ध्यबा लिहां वइगु जूगु दु । समस्याग्रस्त सहकारी संस्था व्यवस्थान समितिं सहकारीया बचतकर्ता व अपार्टमेन्ट न्यायेत ध्यबा बियातःपिंत सुचं जारी यासें समितिया ज्याकुथी स्वापू तयेत धाःगु दु ।

समितिं वइगु वैशाख २ निसें ६ गते तक प्रमाण सहित दावी पेश यायेत इनाप याःगु दु । प्रमाणया आधारय् ध्यबा कायेफइगु खँ समितिं धाःगु दु । समितिया विराटनगर, वीरगञ्ज, यल, ख्वप, पोखरा, नेपालगञ्ज, सुर्खेत, धनगढीया ज्याकुथी प्रमाण सहित थःपिंसं कायेमाःगु ध्यबा दावी याये फइ ।

मागदावी पेश यायेगु इलय् थःपिंसं बचत यानागु ध्यबाया निस्सा, शेयर सदस्यताया प्रमाणपत्र, अपार्टमेन्ट बुकिङ याःगु इलय् ध्यबा जम्मा याःगु निस्सा, धितो तयातःगु चलअचल सम्पत्तिया विवरण व नागरिकताया फोटोकपि दुथ्याकेमाःगु खँ धाःगु दु । माग दावी पुष्टि मजुल धाःसा ध्यबा मबीगु खँ नं समितिं स्पष्ट याःगु दु ।