न्यूरोडय् पसः चायेके मबिल, प्रहरी व व्यापारी दथुइ झडप

येँ – लकडाउन ताःहाकः जूगुया विरोध यासें येँया न्यूरोडय् पसः चायेकःवःपिं व्यापारी व प्रहरी दथुइ थौं सुथय् छझाः झडप जूगु दु । न्यूरोडया रञ्जना, फसिकेब, विशालबजार क्षेत्रय् पसः चायेकः वःपिंत प्रहरीं पसः बन्द यायेत धायेवं छझाः झडप जूगु खः ।

लकडाउन ताःहाकः जुयावयेवं व्यापारीतय्सं पसः चायेकेगु माग याना वयाच्वंगु खः । थ्व हे झ्वलय् नेपाल राष्ट्रिय व्यवसायी महासंघं व्यापारीतय्सं हे स्वतस्र्फूत रुपं पसः चायेकेगु घोषणा याःगु खः । थ्व हे झ्वलय् निन्हुस्वन्हु न्ह्यवनिसें थाय्थासय् पसः चायेकेगु सुरु जुयावःगु खः । थ्वहे निर्णय कथं थौं न्यूरोड पसः चायेकेगु कुतः जुइवं प्रहरीं पसः बन्द यायेत धाःगु खः । थ्व इलय् छझाः तनाव जूगु खँ महासंघया महासचिव टेकबहादुर शाक्यं धयादीगु दु ।

झडप लिपा प्रहरीं न्यूरोडय् छुं नं पसः चायेके धाःसा मबिल । जबर्जस्ति पसः चायेकूपिं फुक्कसितं पसः बन्द याकूगु खः । आः न्यूरोड लागाय् पूवंक हे पसः जुयाच्वंगु दु । येँ महानगर प्रहरी परिसर जनसेवां थःपिंत पसः चायेके बीगु च्वय्या आदेश मदुगुलिं पसः बन्द याकागु खँ धाःगु दु ।