ने. सं. ११४४ कौलाथ्व तृतीया -

बन्दीपुरय् नं केबुलकार !

येँ – स्वनिगलं पिनेच्वंगु नेवाःतय् ऐतिहासिक नगर बन्दीपुरय् नं आः केबुलकार चले यायगु जूगु दु । आर के बी रियल स्टेट एण्ड कन्स्ट्रक्सन व स्थानीय व्यापारी ताराप्रसाद उपाध्यायया लगानी बन्दीपुर केबलकार संचालन यायेत्यंगु खः ।

थ्व केबुलकार बन्दीपुरया ठूलढुंगा निसें बराल चोक तक चले जुइगु खँ धाःगु दु । केबुलकार दयेकेत ५६ करोड लागत जुइगु अनुमान यानादीगु दु । थ्व केबुलकार दयेकेत स्थानीय व्यापारी ताराप्रसाद उपाध्यायं ३० प्रतिश व आर के बी रियल स्टेटं ७० प्रतिशत लगानी याइगु जूगु दु । छगू किलोमिटर ६०० मिटर ताःहाकःगु थ्व केबुलकारय् न्हय्गू टावर दइ ।

केबुलकार दयेकेत आवश्यक जग्गा न्यायेगु व फुक्क थासं स्वीकृति कयाहयेधनागु व डिपीआर तकं तयार जुइधुंकूगु खँ कम्पनीया अध्यक्ष उपाध्यायं कनादीगु दु ।

नेवाः बस्ती, संस्कृति न्ह्यब्वयाच्वंगु बन्दीपुरया पुलांगु वस्ती स्वदेशी विदेशी पर्यटकतय् निंतिं आकर्षणया केन्द्र जुयाच्वंगु दु । थौंकन्हय् थन थप ६० करोड लगानी सुविधासम्पन्न खुगू होटल दयेकेगु ज्या नं जुयाच्वंगु दु । पर्यटकतय् अप्वया वःलिसे थन होटल दयेकेगु ज्या धमाधम न्ह्याना व ःगु खः ।

पहाडया रानी नामं नांजाःगु बन्दीपुरय् थौंकन्हय् चिनियाँ व स्पेनीस पर्यटकत अप्व वयाच्वंगु खँ धाःगु दु । थन न्हिं सछिम्ह विदेशी थ्यनाच्वंगु दुसा आन्तरिक पर्यटकत नं वयेगु अप्वयाच्वंगु खँ स्थानीय पर्यटन व्यवसायतिय्सं धाःगु दु ।
बन्दीपुर थीथी हिमाल व सूर्योदय स्वयेगु निंतिं तसकं लोकंह्वाः । थनया पुलांगु बस्तीया छेँ ख्वपया नेवाः पहया छेँ जुयाच्वंगु दुसा थज्याःगु हे छेँय् होटल संचालन यानाच्वंगुलिं नं पर्यटकत आकर्षित जुयाच्वंगु दु ।