कलंकी मालपोत चैतं निसें स्मार्ट ज्याकू

येँ – वइगु चैत १ गनेनिसें कलंकीया मालपोत ज्याकू स्मार्ट ज्याकुथिइ रुपान्तरण जुइगु जूगु दु । कलंकीया मालपोत ज्याकुथिइ अनलाइन प्रणालीइ जडान यायेवं थ्व दकलय् न्हापांगु स्मार्ट ज्याकू जुइत्यंगु खः । दकलय् अप्वः व्यस्त जुइगु मालपोत ज्याकू मध्ये छगू जुयाच्वंगु कलंकी मालपोतयात न्हापांगु चरणय् ‘नमूना स्मार्ट ज्याकू’ दयेकूगु खः ।

स्मार्ट मालपोत दयेकेगु निंतिं झिम्ह प्राविधिकं वंगु निवाः न्ह्यवंनिसें ज्या यानाच्वंगु खँ भूमि व्यवस्था तथा सहकारी मन्त्रालयं धाःगु दु । फागुन महिनाया दुने फुक्कं प्राविधिक ज्या क्वचायेकाः चैत १ गते स्मार्ट ज्याकूया उलेज्या यायेगु तयारी मन्त्रालयं यानाच्वंगु दु ।
स्मार्ट ज्याकूया अवधारणा लागू जुइवं आः यानाच्वंगु लेखापढीया प्रावधान नं मदइगु खँ धाःगु दु ।

स्मार्ट प्रविधि लागू जुल
धाःसा घौछिया दुने मालपोतय् जग्गा पास यायेगु ज्या क्वचाइगु खँ धाःगु दु ।

मालपोतय् दुथ्याकेमाःगु जानकारी फुक्कं कम्प्युटरय् इन्ट्री याःसा गाःगुलिं लेखापढीया ज्या मदइगु जूगु दु । स्मार्ट प्रविधि लागू जुइधुंकाः जग्गा न्यायेगु व मीगु निंतिं जग्गाया कित्ता नम्बर, क्षेत्रफल, जग्गा दुगु थाय्, सम्बन्धित जग्गाधनीया नां परिचय खुले जुइगु विवरण तयेवं जग्गाया भ्वं सम्बन्धी फुक्कं ज्या कम्प्युटरं जुइ ।

मालपोत अधिकृतया रोहवरय् जग्गाधनीया किपा तयाः व ल्हाःचिंया बायोमेट्रिक यायेधुंकाः सम्बन्धित अधिकारीं नामसारी वा न्याःगु–मीगु प्रमाणित यायेवं जग्गाया ज्या पूवनीगु खँ धाःगु दु । स्मार्ट प्रविधि लागू जुइधुंकाः लेखापढीया ज्या नं मालपोत ज्याकूया कर्मचारीं हे यानाबी । मालपोत कार्यालय कलंकीयात स्मार्ट प्रणालीइ यंकेगु निंतिं मन्त्रालयं ३१ लाख तका बजेट फ्यानातःगु दु ।

स्मार्ट प्रविधि लागू जुल धाःसा घौछिया दुने मालपोतय् जग्गा पास यायेगु ज्या क्वचाइगु खँ धाःगु दु । न्हापा प्यंतँ थाय् कयाः सेवाग्राहीयात सेवा बिया वयाच्वंगु खःसा आः छगू हे तल्लां फुक्कं ज्या यायेफइगु खँ मन्त्रालयं धाःगु दु । कलंकी मालपोतयात स्मार्ट प्रणालीइ यंकेधुंकाः देय्न्यंकंया १३१ गू मालपोत ज्याकूयात नं स्मार्ट प्रविधिइ यंकेगु कथं ज्या जुयाच्वंगु खँ धाःगु दु ।