८ प्रतिशत आर्थिक वृद्धि जुइगु अर्थमन्त्रीया दावी

येँ – अर्थमन्त्री युवराज खतिवडां वइगु आर्थिक दँय् च्यागू प्रतिशत आर्थिक वृद्धि चूलाइगु दावी यानादीगु दु । प्रतिनिधि सभाया म्हिगः च्वंगु बैठकय् सांसदतय् न्ह्यसःया लिसः बीगु झ्वलय् अर्थमन्त्री खतिवडां सरकारं हःगु बजेटया कारणं वइगु आर्थिक दँय् ८ प्रतिशत आर्थिक वृद्धि चूलाइगु दावी यानादीगु खः ।

वय्कलं धयादीगु दु, ‘सरकार, निजी ख्यः व सहकारी जानाः ज्या यायेगु खःसा च्यागू प्रतिशत आर्थिक वृद्धिदर धयागु तःधंगु खँ मखु ।’
थ्व झ्वलय् वय्कलं बजेटय् तराई–मधेसयात उच्च प्राथमिकता बियागु खँ नं धयादीगु खः । ‘दिगो विकासया लक्ष्य चूलाकेत बजेटया आकार अप्वयेकेमाःगु धयादिसें वय्कलं भौतिक पूर्वाधारय् जक छगू खर्बं मल्याक बजेट विनियोजन यानागु खँ नं धयादीगु खः ।

अथेहे अर्थमन्त्री खतिवडां दक्षिण एशियाय् हे दकलय् अप्वः वैदेशिक त्यासा काइगु देय् नेपाः जुयाच्वंगु खँ न्ह्यथँसें भुखाय्या पुनर्निर्माण क्वमचातले वैदेशिक ऋण अप्वयेफुगु व थज्याःगु त्यासायात राष्ट्रिय उत्पादकत्व व द्रुत विकासय् खर्च यायेगु खँ नं धयादिल ।

सांसद डिला संग्रौलां अर्थमन्त्रीं हःगु बजेट वितरणमुखी व याकनं लोकप्रिय जुइगु कथंया जूगु द्वपं बियादीगु खः । अथेहे सांसद प्रेम सुवालं वैदेशिक त्यासा कयाः कर्मचारीतय् तलब छाय् अप्वयेकल धकाः न्ह्यसः तयादीगु खः ।