येँ–सिलगुढी बस सेवाया काँकडभित्ताय् विरोध

येँ – पर्यटन दँ सन् २०२० यात सफल दयेकेगु ताः तयाः झिंन्यान्हु न्ह्यवनिसें सुरु याःगु भारतया सिलगुढी निसें येँय् तकया सिधा बस सेवायात कयाः काँकडभित्ताया स्थानीयं विरोध याःगु दु । भारतया पश्चिम बंगालय् लाःगु सिलगुढीपाखें तप्यंक येँ बस संचालन जुल धायेवं काँकडभित्ताय् आर्थिक गतिविधि धरासायी जुइगु धासें स्थानीय व्यवसायीतय्सं विरोध याःगु खः ।

काँकडभित्ता बचाउ सरोकार समिति हे गठन यानाः अन थीथी विरोध कार्यक्रम सुरु जूगु दु । नेपाःया पर्यटकीय व धार्मिक महत्व दुगु शहर येँय् छुं नं महत्व मदुगु शहर सिलगुढीपाखें तप्यंक बस प्रवेश जुइगु धयागु नेपाः व भारत दथुइ जूगु सम्झौता अःखः जूगु तकं उमिसं तयाच्वंगु दु । स्थानीयपिंसं थ्व बस सेवा तुरुन्त दिकेत माग याःगु दु ।

प्रदेश नं. १ या सांसद श्रीप्रसाद मैनालीं सन् २०१४ या डिसेम्बरय् नेपाः–भारतमैत्री बस संचालन बरो सम्झौता जूबलय् राजधानीनिसें –राजधानीतकया पर्यटकीय व धार्मिक शहरपाखें संचालन यायेगु धकाः सम्झौता जूगु खःसा थुकिया अःखः बस सेवा संचालन याःगु धासें स्थानीयत विरोधय् कुहां वःगु खः ।

वय्कलं धयादिल, ‘कोलकत्ता, गुहावटी निसें येँय् तक संचालन याःगु खःसा जिमित आपत्ति मदु, नेपाः व भारत सरकार दथुइ सम्झौता जुइधुंकूगु दु । तर सम्झौता अःखः भारतया महत्वहिन सहरपाखें येँय् थ्यंज्याःगु ऐतिहासिक धार्मिक पर्यटकीय क्षेत्रय् तप्यंक बस सेवा संचालन यायेदइमखु, उकियात तुरुन्त दिकेमाः ।’

वय्कलं केन्द्रीय व प्रदेश सरकारयात नं ध्यानाकर्षण याकागु खँ धयादीगु दु । पुलांम्ह यातायात व्यवसायी सांसद मैनालीं नेपालय् यक्व गाडी व्यवसायी दुसां भारतीय गाडीलिसे प्रतिस्पर्धा याये फइमखु धासें थ्व सेवां राजश्वय् नं प्रभाव लाकीगु खँ धयादिल ।झापा जिल्ला ट्राभल्स संघया अध्यक्ष निरबहादुर कार्कीं बस सेवां पर्यटन प्रवद्र्धनय् ग्वाहालि मजुइगु खँ धासें पूर्वय् लिच्वः लाकीगु खँ धयादिल ।