ने. सं. ११४६ बछलागा चौथी -

सहकारीया कर्जा सूचना कन्द्र नीस्वनीगु

येँ – छगू हे सम्पत्तियात थीथी सहकारी बरः तयाः वित्तीय अनियमितता यानाः सहकारीतय्त हे ठगे यायेगु ज्यायात निरुत्साहित यायेगु निंतिं तयारी ज्या जूगु दु । थुकिया निंतिं सहकारीया दुजःतय् निक्षेपय् अप्वया वनाच्वंगु जोखिम न्यूनिकरण यानाः सुरक्षित व थप व्यवस्थित यायेगु ताः तयाः कर्जा सूचना केन्द्र नीस्वनीगु जूगु दु ।

कर्जा सुचना कन्द्रं तइगु सुचं फुक्कं पारदर्शी जुइगुलिं लगानी सुरक्षित जुइगु खँ धाःगु दु । सुचना केन्द्रय् तइगु सफ्टवेयरं छगू सहकारीइ आवद्ध दुजः मेगु सहकारीइ आवद्ध जूवन धाःसा वयात स्वंगू पुस्ताया विवरण लिसें मेमेगु प्राविधिक पक्षयात नं उपलब्ध यानाबी जूगुलिं अनियमितता अन्त्य यानाः थ्व क्षेत्रय् वित्तीय सुशासन कायम जुइगु विश्वास यानातःगु दु ।

सहकारी विभागय् आःतक दर्ता जूगु ३४ हजार ५१२ सहकारी मध्ये फुक्कं सहकारीइ छगू हे कथंया लेखा प्रणाली मदुगु, नियमित निकायया रुपय् सहकारी विभागं प्रभावकारी ज्या यायेमफुगु कारणं छुं सहकारीं बिउगु त्यासा जोखिमय् लानाच्वंगु दु ।

थ्वयां न्ह्यव ओरेन्टल, गुण, एक्जिम, परिदृश्यलिसें थीथी सहकारीं सर्वसाधारणया करिब झिगू अर्ब स्वयां अप्वः निक्षेप ठगे याःगु उजुरी लानाच्वंसां कारवाहीया प्रष्ट नियम मदुगुलिं थज्याःपिं सहकारीया संचालकतय्त कारवाही नं यायेफुगु मदुनिसा निक्षेपकर्तातय्सं थःपिनि ध्यबा लित कायेफुगु मदुनि ।

छुं दँ न्ह्यव ५० गू सहकारीयात समस्याग्रस्त संस्थाया रुपय् सुचिकृत यानातःगु खःसा उमित गुकथं व्यवस्थापन यायेगु धयागु बारे अझ नं समस्या हे खनेदयाच्वंगु दनि । सहकारी विभाग व सहकारी पत्रकार समाजं शुक्रवाः ग्वसाः ग्वःगु छगू कार्यक्रमय् सहकारीया माध्यमं थौंकन्हय् देन्यंकं स्वंगू खर्ब निगू अर्ब निक्षेप संकलन जुयाः निगू खर्ब ७३ अर्ब लगानी जुयाच्वंगु जानकारी बिउगु खः ।

सहकारी विभागया रजिष्ट्रार टोकराज पाण्डेया कथं सहकारी क्षेत्रय् आःतक थ्यंमथ्यं ७३ अर्ब शेयर पूँजी कायम दु । थ्व क्षेत्रपाखें निष्क्रिय पुँजीयात बचत यानाः वित्तीय पहुँच मथ्यंथाय्पिंत थीथी वस्तु उत्पादनय् ग्वाहालि व सेवा बीगु यानाच्वंगु दु ।विभागं सहकारी क्षेत्रय् विकासया निंतिं थीथी तालिम, प्रशिक्षणव सुचं उपलब्ध यायेगु याना वयाच्वंगु दु ।

स्वास्थ्य, दुग्ध, तरकारी व फलफूल, जडिबुटी, मौरीपालन, कृषिया थीथी क्षेत्र कफि, पालु, च्या, ग्वय्, कस्ति, जुनार व खाद्य प्रशोधनया लिसें यान्त्रिक सामग्रीइ नं सहकारी मार्फत लगानी जुयाच्वंगु दु ।देय्या परिवर्तित संरचनाय् स्थानीय तहया फुक्कं वडाय् कारोवार याइगु सहकारीयात स्थानीय तह अन्तर्गत तःगु दु ।

छगू स्थानीय तहय् दर्ता याःगु सहकारीं मेगु स्थानीय तहय् कारोवार न्यंका यंकल धाःसा व प्रादेशिक सरकारी अन्तर्गत लाइ । छगू प्रदेशं मेगु प्रदेशय् कारोवार यायेगु क्षमता विकास यानातःगु सहकारीयात संघीय सरकारं नियन्त्रण यायेगु व्यवस्था यानातःगु दु ।सहकारी नियमावली २०४९यात संशोधन यायेत आः निर्माण जुयाच्वंगु नियमावली मन्त्रिपरिषद्पाखें पारित यानाः राजपत्रय् प्रकाशत यायेगु झ्वलय् दु ।

थ्व नियमावलीं सहकारी विभागयात छुं अधिकार प्रत्यायोजन याइ । विभागं सहकारीयात प्रशिक्षण, उत्पादन, बजार, वितरणलिसे स्वायेगु लिसें समस्याग्रस्त घोषणा यायेगु, संचालकया खाता रोक्का, संचालक व सरोकार पक्षया पासपोर्ट रोक्क यायेगु, संस्था व्यवस्थापनया निंतिं हस्तक्षेप यायेफइगु, व्यवस्थापन समिति दयेकेगु लगायतया अधिकार नियमावलीइ दुथ्याकातःगु खँ धाःगु दु ।