नेपाःया ११२ गू देय् लिसे व्यापार घाटा

येँ –  भन्सार विभागं नकतिनि पिथंगु चालु आर्थिक दँया लिपांगु स्वलाःया प्रतिवेदन कथं नेपालं विश्वया ११२ गू देय्पाखें व्यापार घाटा फये मालाच्वंगु दु । प्रतिवेदन कथं वंगु स्वला दुने नेपालं १४० गू देय् लिसे व्यापार याःगु दुसा थुकी २८ गू देय् लिसे जक व्यापार नाफा खनेदु, मेगु फुक्क देय् लिसे व्यापारि घाटा जूगु दु ।

नेपालं दकलय् अप्वः व्यापारि घाटा फयेमालाच्वंगु देय् धाःसा जःलाखःला देय् भारत व चीनपाखें खः । वंगु स्वला दुने भारतलिसे जक निगू खर्ब २२ अर्ब ९५ करोड ९२ लाख तकाया व्यापारघाटा जूगु दु । थ्व स्वला दुने भारतं नेपालय् निगू खर्ब ३६ अर्ब ३४ लाख १९ हजार तकाया सामान दुहां वःगु दुसा नेपाः पाखें भारतय् मुक्कं १३ अर्ब १६ करोड ४२ लाख १४ हजार तका बराबरया सामान निर्यात जूगु दु ।

अथेहे चीनं वंगु स्वलाया दुने ५३ अर्ब ११ करोड ५६ लाख ८५ हजार तका बराबरया सामान आयात ज ूगु दुसा थ्व ईया दुने नेपाःपाखें मुक्कं ५६ करोड ४० लाख तका बराबरया सामान जक निर्यात जूगु दु । थ्व ल्याखं चीन लिसे नेपाःया व्यापार घाटा थ्व स्वलाया दुने जक ५२ अर्ब ५५ करोड १५ लाख ८९ हजार थ्यनेधुंकूगु दु ।

नेपालं व्यापार घाटा फयेमालाच्वंगु देशय् चीन निगूगु थासय् लानाच्वंगु दुसा थ्व धुंकाः युरोपेली देय् फ्रान्सलिसे दकलय् अप्वः घाटा फये मालाच्वंगु दु । फ्रान्सं १४ अर्ब २६ करोड ५३ लाखया सामान नेपाः दुहां वःगु दुसा नेपालं मुक्कं ३५ करोड २२ लाख ८८ हजार तका बराबरया सामान फ्रान्स वंगु दु । थ्व ल्याखं फ्रानसलिसे जक १३ अर्ब ९१ करोड ३० लाख १३ हजारतका बराबरया घाटा जुइधुंकूगु दु ।

अथेहे युनाइटेड अरब इमिरेट्स, थाइल्यान्ड, स्वीट्जरल्यान्ड, इन्डोनेसिया, क्यानडा, मलेसिया, अर्जेन्टिना, युक्रेन, साउदी अरब, दक्षिण अफ्रिका, इटाली भियतनाम, दक्षिण कोरिया, अष्ट्रेलिया, जापान, सिंगापुर, हंगकंग थेंज्याःगु देय् यानाः ११२ गू देलिसे व्यापार घाटा फयेमालाच्वंगु दु ।नेपालं अमेरिका लिसे धाःसा व्यापारय् नाफा कायेखनाच्वंगु दु ।

अमेरिकाय् नेपाःपाखें स्वंगू अर्ब १९ करोड ७८ लाख ५९ हजार तकाया सामान निर्यात जुइधुंकूगु दुसा अनं नेपालय् मुक्कं निगू अर्ब ५२ करोड ९५ लाख तका बराबरया जक सामान दुहां वंगु दु । थ्व ल्याखं अमेरिका लिसे ६६ करोड ८३ लाख बराबरया नाफा जूगु दु । नेपालं नर्वे, फिनल्यान्ड, अष्ट्रिया, माल्दिभ्स, मोरक्को, इस्टोनिया, अफगानिस्तान, लेवनान, एल साल्भाडोर, उरुग्वे, साइप्रस लिसेया व्यापारय् जक लबः कायेखनाच्वंगु दु ।

सम्बन्धित बुखँ

LEAVE YOUR COMMENTS