किपू यातायातय् विद्युतीय भुक्तानी प्रणाली

किपू- किपू नगरय् संचालन जुइगु यातायातय् आवंलिं विद्युतीय भुक्तानी प्रणाली लागू जुइगु जूगु दु । किपुलिइ संचालन जुयाच्वंगु सार्वजनिक यातायातय् विद्युतीय भुक्तानी प्रणाली शुरु यायेत्यंगु खः ।

किपू बस सेवा प्रा.लिं. यात्रुतय् निंतिं सुरक्षित, विश्वसनीय व प्रभावकारी सुविधा बीगु उद्देश्यं विद्युतीय भुक्तानी सेवा (ई टिकेटिङ) प्रणाली लागू यायेत्यंगु खः । उकिया निंतिं वंगु वालय् छगू सम्झौता नं जुइधुंकूगु दु । सम्झौताकथं किपू बस सेवा प्रा.लि.पाखें संचालन जुयाच्वंगु यातायातय् ई टिकेटिङ सेवा लागू याइगु जूगु दु ।

माघ १६ गते जूगु चौपक्षीय सम्झौताय् किपू नगरपालिकाया नगरप्रमुख रमेश महर्जन, किपू बस सेवा प्रा.लि.या अध्यक्ष अर्जुन सिंह, एनक्लाउडया प्रमुख कार्यकारी अधिकृत दीपेन्द्रनारायण श्रेष्ठ व वी पे प्रा.लि. या अध्यक्ष डा. शंकरप्रसाद आचार्यं ल्हाःचिं तयादीगु खः ।
थ्व स्वयां न्ह्यः कम्पनीपाखें परीक्षणया रुपय् ई टिकेटिङ सेवा शुरु याःगु खःसा आः वयाः नगरपालिकालिसे जूगु सम्झौता लिपा औपचारिक रुपं हे थ्व सेवायात संचालनय् हःगु दु । ।