ने. सं. ११४६ बछलागा तृतीया -

निजामती सेवाय् दुहां वनेगु उमेर १६ कि १८ ?

येँ÷ निजामती सेवाय् दुहां वनेगु निंतिं म्होतिं नं झिंखुदँ दयेमाःगु प्रावधान तयेत सांसदतय्सं प्रस्ताव यानाच्वंगु इलय् पुलांपिं प्रशासकतय्सं धाःसा आः दुगु १८ वर्षया प्रावधान नं बांलाःगु बिचाः प्वंकूगु दु । निजामती सेवाय् दुहां वनीपिं मनू परिपक्व जुइमाःगु व ज्ञानया ल्याखं नं झिंच्यादँया प्रावधानया हे बांलाःगु तर्क वय्कःपिनि दु ।

मेखे सांसदय् धाःसा निजामती सेवाय् दुहां वनेगु उमेरय् थीथी सांसदतय्सं थीथी कथंया प्रस्ताव तयाच्वंगु दु । छुं छुं सांसदतय्सं एसईई पास जूपिनिगु निंतिं नं निजामति सेवाय् पद तयातःगु दु व झिंखुदँय् हे नागरिकता बीगु प्रावधान दुगुलिं निजामती सेवाय् नं उमेरया मापदण्ड झिंखुदँय् हे जुइमाःगु तर्क तयाच्वंगु दु ।

पुलांम्ह मुख्यसचिव राजेन्द्र किशोर क्षेत्रीं बिबिसीलिसे खँ ल्हासें धाःगु दु, ‘निजामति सेवाय् झिंखुदँया उमेर धयागु तसकं हे म्हो खः । झिंच्यादँ हे ठीक खः । छुं भचा ला परिपक्व जुइ माल नि । बिना आधार १८ दँयात झिंखुदँ यायेमजिउ । लिपा वनाः झिंखुदँ जिउसा झिंप्यदँ छाय् मजिउ, हाकनं झिंप्यदँ जिउसा झिंनिदँ छाय् मजि धयागु खँ वइ ।’

अथेहे पुलांम्ह मुख्यसचिव सोमलाल सुवेदीं झिंच्यादँयात क्वकयाः झिंखुदँ यायेवं छुं फाइदा मजुइगु बिचाः तयादीगु दु । लोकसेवा आयोगया पुलांम्ह दुजः कयोदेवी यमिं नं झिंच्यादँया उमेरय् भचा परिपक्वता वइगु जूगुलिं झिंच्यादँ हे ठीक जूगु खँ धयादी । वय्कलं धयादी, ‘झिंखुदँया उमेरयापिंके परिपक्वता हे गाइ थें मखु, सरकारया ज्या यायेत ला भचा परिपक्व जुइमाल नि ।’

संसदया राज्य व्यवस्था व सुशासन समितिं आः मेमेगु कानुनयात लिचवः लाइ–मलाइ स्वयाः जक निर्णय यायेगु खँ धाःगु दु । थौंकन्हय् समितिइ संघीय निजामती सेवा गठन, सञ्चालन व सेवा शर्त सम्बन्धी व्यवस्था यायेत दयेकूगु विधेयकय् सहलह जुयाच्वंगु दु । समितिया दुजः व पुलांम्ह सामान्य प्रशासनमन्त्री रेखा शर्मां धयादीगु दु, ‘मेमेगु प्रचलित कानुनत दु ।

सुयात नागरिक माने यायेगु, सुनां श्रम याये जिउ, सुनां यायेमजिउ धयागु खँ नं वइ । थुकिया लिच्वः यक्व थासय् लाइ, उकिं असर लाइगु क्षेत्र स्वयाः सल्लाह यायेगु जुइ ।’सांसदतय्सं निजामती सेवाय् दुहां वनेदइगु अधिकतम उमेरया हद नं म्हो यायेत प्रस्ताव याःगु दु । थौंकन्हय् ३५ वर्ष तकयापिं जक निजामती सेवाय् दुहां वनेत दय । मिसा व अपाङ्गता दुपिनि निंतिं धाःसा थ्व उमेरहद ४० दँ तक यानातःगु दु ।