प्यान्डोरा पेपर्स – विश्वया थीथी नेतातय्सं सुचकातःगु गोप्य धन व लेनदेन

एजेन्सी- अन्तर्राष्ट्रिय खोज पत्रकारतय्गु सञ्जाल ‘आइसीआइजें’ पिकाःगु छगू रिर्पोटय् विश्वया नेता, राजनीतिज्ञ व तःमिपिं मनूतय्गु गोप्य धन व लेनदेनया खुलासा याःगु दु । विश्वया ११७ गू देसय् च्वंपिं ६५० सिबें अप्वः पत्रकारत जानाः पिकाःगु थ्व रिपोर्टयात ‘प्यान्डोरा पेपर्स’ धकाः ना छूगु दु । विश्वया ९० गू देसय् च्वंपिं स्वसःसिबें अप्वः नेता, राजनीतिज्ञ व तःमिपि मनूतय्सं थःगु देसय् कर छले यानाः ‘ट्याक्स हेभन’ मुलुकय् अफशोर कम्पनी चायेकाः गोप्य धन सुचुकातःगु खः । थीथी देसया राष्ट्रपति, प्रधानमन्त्री, व्यवसायी, सेलिब्रेटी निसे अपराधीतय्गु नां थुकी दु ।

थ्व धलखय् झिंखुम्ह नेपाली व्यवसायीतय्गु नां न दुथ्यानाच्वंगु दु । नेपाःया नेतातय्गु नां मदुसां थुगु धलखय् उद्योगपति विनोद चौधरी व गोल्छा परिवारया नां दुथ्यानाच्वंगु दु । धलखय् विश्वया वर्तमान ३५ म्ह शीर्ष नेतातय्गु नां नं दुथ्याः ।

थ्व धलखय् रुसया राष्ट्रपति भ्लादमिर पुटिन, चेक गणतन्त्रया प्रधानमन्त्री आन्द्रेज बाबिज, केन्याया राष्ट्रपति उहुरु केन्याता, जोर्डनया जुजु अब्दुल्लाह, बेलायतया पुलांम्ह प्रधानमन्त्री टोनी ब्लेयर थेज्याःपिं नेतातय्गु नां दु । अथे हे भारतीय अर्बपति अनिल आम्बनी, क्रिकेटर सचिन तेन्दुलकर, अभिनेता ज्याकि श्राफया नां नं दु । पाकिस्तानया प्रधानमन्त्री इमरान खानया मन्त्रिपरिषद्य् च्वपिं मन्त्री व छेँजःया नां नं धलखय् दु ।

‘आइसीआइजें’ १४गू स्रोत पाखें छगू करोड १९ लख स्वद्वः व ६७६ गू दस्तावेज व २.९४ टिबी डाटाया अध्ययन याःगु खः । आइसीआइजेया थ्व आतकया हे दकलय् तःधंगु रिसर्च खः ।